ខេត្តកំពង់ឆ្នាំង៖កូនត្រីឆ្តោរចំនួន១៨ស្រះជិត៣ម៉ឺនក្បាល ត្រូវបានគេលួចចិញ្ចឹមដោយខុសច្បាប់នៅក្នុងភូមិព្រែកគន្លង ឃុំកំពង់ត្រឡាច ស្រុកកំពង់ត្រឡាច ដែលសមត្ថកិច្ចរដ្ឋបាលជលផល បានចុះទៅធ្វើកំ ណត់ហេតុនៅថ្ងៃទី០៩ ខែកក្កដា ជាមួយសហគមន៍នេសាទ និងម្ចាស់ត្រី អោយចាក់លែងកូនត្រីចូលក្នុងទន្លេវិញដោយខ្លួនឯងអោយអស់នៅថ្ងៃទី១០ ខែសីហា ឆ្នាំ២០១៥ ប៉ុន្តែមកដល់ពេលនេះមិនឃើញអ្នកណាអនុវត្តឡើយ ទាំងម្ចាស់ត្រី និងសមត្ថកិច្ច។
លោក ហ៊ីម វាន់ អនុភូមិព្រែកគន្លង ឃុំកំពង់ត្រឡាច ស្រុកកំពង់ត្រឡាច បានអោយដឹងថា៖កាលពីថ្ងៃទី០៩ ខែកក្កដា ឆ្នាំ២០១៥ ក្រុមការងាររបស់សមត្ថកិច្ចជលផលខណ្ឌ័កំពង់ឆ្នាំងដឹកនាំដោយលោក អ៊ឹង ជីប៉ោ នាយរងខណ្ឌ័បានចុះមកត្រួតពិនិត្យក្នុងភូមិដោយរកឃើញអ្នកចិញ្ចឹមកូនត្រីឆ្តោរចំនួន១៨នាក់ មាន១៨ស្រះ និងមានកូនត្រីជិត៣ម៉ឺនក្បាល។
នៅក្នុងពេលនោះក្រោយពីបានប្រជុំផ្សព្វផ្សាយ ស្តីអំពីការបញ្ឈប់សកម្មភាពចិញ្ចឹមត្រីឆ្តោរដែលស៊ីកូនត្រីជាចំណីខាតបង់ត្រីរាប់ម៉ឺនតោនក្នុង១ឆ្នាំៗ យោងលិខិតជូនដំណឹងលេខ ៣១៨៤ កសក ចុះថ្ងៃទី៩ ខែឧសភា ឆ្នាំ២០១៤ របស់ក្រសួងកសិកម្ម អ្នកចិញ្ចឹមត្រីឆ្តោរបានសំណូមពរដល់ក្រុមការងារ សុំធ្វើការចាក់លែងត្រីដោយខ្លួនឯងអោយអស់នៅថ្ងៃទី១០ ខែសីហា ឆ្នាំ២០១៥ ដោយមានកំណត់ហេតុត្រឹមត្រូវ បើលើសថ្ងៃកំណត់សមត្ថកិច្ចក្នុងក្រុមការងារ និងចុះមកចាក់លែងត្រីទាំងអស់នេះមិនទុកឡើយ។
ប៉ុន្តែមកដល់ថ្ងៃនេះអ្នកចិញ្ចឹមត្រីឆ្តោរទាំង១៨ស្រះ មិនបានអនុវត្តតាមកិច្ចសន្យារបស់ ខ្លួនឡើយ ចំណែកសមត្ថកិច្ចរដ្ឋបាលជលផលក៏មិនទាន់អនុវត្តផែនការចាក់លែងកូនត្រីឆ្តោរនៅក្នុងភូមិព្រែកគន្លងនេះនៅឡើយដែរ ដែលគេគិតថាជារឿងវាយព្រៃបង្អើលត្រីងោយចូលស៊ង ដើម្បីតែផលប្រយោជន៍ និង បើតាមគេដឹងនៅក្នុងឃុំកំពង់ត្រឡាចមានអ្នកចិញ្ចឹមត្រីឆ្តោតតាមស្រះរាប់សិបកន្លែងឯណោះក្នុង១ឆ្នាំ។
ទាក់ទងនិងរឿងនេះលោក អ៊ឹង ជីប៉ោ នាយរងខ័ណ្ឌរដ្ឋបាលជលផលកំពង់ឆ្នាំងនៅព្រឹកថ្ងៃទី១៩ខែសីហា ឆ្នាំ២០១៥នេះ យើងបានទូរស័ព្ទចូលជាច្រើនដងតែលោកមិនទទួល។ដោយឡែកលោកអ៊ូ សោភ័ណ នាយផ្នែករដ្ឋបាលជលផលកំពង់ប្រាសាទបានអោយដឹងថា៖ករណីខាងលើនេះ ដោយមានចំណាររបស់លោកអភិបាលខេត្ត និងលោកនាយខ័ណ្ឌ បានកុំណត់អោយក្រុមការងារចំរុះរួមមានទាំងសមត្ថកិច្ចនគរបាលសេដ្ឋកិច្ចខេត្តផង នឹងចុះទៅធ្វើការណែនាំអប់រំម្តងទៀតក្នុងពេលឆាប់ៗនេះ ដើម្បីអោយប្រជាពលរដ្ឋបញ្ឈប់ការចិញ្ចឹមត្រីឆ្តោរ ដែលច្បាប់ហាមឃាត់។
ដោយឡែកប្រជាពលរដ្ឋជាអ្នកចិញ្ចឹមត្រីភាគច្រើន មានការងឿងឆ្ងល់ថា សមត្ថកិច្ចរដ្ឋបាលជលផលតែមួយច្បាប់តែមួយ តែការអនុវត្តច្បាប់ជលផលនៅតាមខេត្តក្រុងមិនដូចគ្នា គឺពួកគាត់បានឃើញនៅខេត្តកំពង់ចាម ខេត្តកណ្តាល មានគេចិញ្ចឹមត្រីឆ្តោររាប់រយស្រះ និងរាប់រយបែ មិនឃើញសមត្ថកិច្ចជលផលបង្ក្រាប ឬហាមឃាត់ឡើយ។ប្រជាពលរដ្ឋបានលើកឡើងថា៖ រដ្ឋបាលជលផលមិនអោយចិញ្ចឹមត្រីឆ្តោរ តែនុយត្រីឆ្តោរត្រូវបានគេអោយដឹកយកទៅលក់អោយប្រទេសវៀតណាមរាប់ម៉ឺនតោនក្នុងមួយឆ្នាំៗ ហើយការនាំចូលត្រីឆ្តោរមកលក់នៅក្នុងស្រុកខ្មែរក្នុង១ថ្ងៃៗក៏មានរាប់រយតោន ដែលមិនត្រូវបានជលផលទប់ស្កាត់ដែរ បើបែបនេះតើប្រជាពលរដ្ឋខ្មែរជាអ្នកចិញ្ចឹមត្រីលក់នោះ យកទៅលក់អោយអ្នកណាទៅ។ បញ្ហានេះប្រជានេសាទ ស្នើសុំឯកឧត្តម អេង ជាសាន ប្រធានរដ្ឋបាលជលផល បើអាណិតស្រឡាញ់ប្រជាពលរដ្ឋខ្មែរ មេត្តាជួយទប់ស្កាត់ការនាំចូលត្រីពីប្រទេសជិតខាងផង ដើម្បីលើកស្ទួយជីវ
ភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋយើងនៅក្នុងប្រទេស៕
