ខេត្តប៉ៃលិន៖ ជនសង្ស័យ៣នាក់ ត្រូវបានកម្លាំងការិយាល័យនគរបាលព្រហ្មទណ្ឌកំរិតស្រាល នៃស្នងការនគរបាលខេត្ត ធ្វើការឃាត់ខ្លូន ខណៈពេលកំពុងកត់កន្ទុយលេខ យ៉ាងគក្លើន ផ្ទុយពីបទបញ្ជាទាំង០៩ចំនុច ស្តីពីភូមិ ឃុំ មានសុវត្តិភាពរបស់រាជរដ្ឋាភិបាលកម្ពុជា ។ ហេតុការណ៏ចុះបង្ក្រាបល្បែងកត់កន្ទុយលេខនេះ ធ្វើឡើងកាលពីវេលាម៉ោង ១៥ និង០០នាទីរសៀល ថ្ងៃទី២០ ខែសីហា ឆ្នាំ២០១៥ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ជនសង្ស័យដែលសមត្ថកិច្ចឃាត់ខ្លូនទី១ ឈ្មោះ យិន យុន ភេទស្រី អាយុ៥០ឆ្នាំ ជាម្ចាសផ្ទះ និងជាម្តាយ ,ទី២ ឈ្មោះ ឌួង សុភាក់ ភេទប្រុស អាយុ១៩ឆ្នាំ ត្រូវជាកូន ,ទី៣ ឈ្មោះ ញែម ញឹល ភេទប្រុស អាយុ ១៨ឆ្នាំ ត្រូវជាក្មួយ មានទីលំនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ដោយរិបអូសបានក្រដាស់កត់កន្ទុយលេខមួយចំនួនធំ ។
លោក កែវ ភិន នាយស្តីទីការិយាល័យនគរបាលព្រហ្មទណ្ឌកំរិតស្រាល បានឲ្យដឹងថា៖ក្នុងការចុះបង្ក្រាបនេះគឺ ដោយមានការដឹកនាំនិងបញ្ជារផ្ទាល់របស់លោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្តប៉ៃលិន បានចាត់ឲ្យលោកបញ្ជូនកម្លាំងការិយាល័យចុះទៅបង្ក្រាបដល់ទីតាំងខាងលើ ព្រមទាំងឃាត់ខ្លូនបានចំនួន៣នាក់ ស្ថិតក្នុងភូមិកើតហេតុខាងលើ ។ លោកបន្តថា៖ នេះជាការចូលរួមចំណែកមួយក្នុងការអនុវត្តន៏បទបញ្ជាទាំង០៩ចំនុច របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ស្តីពីភូមិ ឃុំ មានសុវត្តិភាពផងដែរ ៕