កំពង់ឆ្នាំង៖ ជនដៃដល់ជាឃាតករ និងជនផ្សំគំនិតជាឪពុក ត្រូវបានសមត្ថកិច្ចស្រាវជ្រាវចាប់ខ្លួនបានក្រោយពេលកើតហេតុបាន៣ថ្ងៃ បន្ទាប់ពីពួកគេបានប្លន់យកម៉ូតូហុងដាឌ្រីមសេរីឆ្នាំ២០១៥មួយគ្រឿង របស់មន្ត្រីធម្មការខេត្ត កាលពីយប់ថ្ងៃទី១៧ ខែសីហា ឆ្នាំ២០១៥ នៅក្នុងព្រៃស្ថិតក្នុងភូមិក្រោលជី ឃុំពពេល ស្រុកបរិបូរណ៌។ជនល្មើសទាំង២នាក់ឪពុកនិងកូននេះត្រូវបានសមត្ថកិច្ចចាប់ខ្លួននៅវេលាម៉ោង១រសៀលថ្ងៃទី២០ ខែសីហា ឆ្នាំ២០១៥ នៅក្នុងវត្តជាងហ្លួង ឃុំពពេល ស្រុកបរិបូរណ៌ ។
លោក ប៉ុល វុទ្ធី ស្នងការរងនគរបាលខេត្ត និងជាប្រធានការិយាល័យកណ្តាលយុត្តិធម៌ បាននិយាយអោយដឹងនៅព្រឹកថ្ងៃទី២១ ខែសីហា ឆ្នាំ២០១៥ថា៖ជនល្មើសទាំង២នាក់ខាងលើនេះ មាន១.ឈ្មោះ អេង សុខា អាយុ២០ឆ្នាំ មុខរបរមិនពិតប្រាកដជាជនដៃដល់ និង២.ឈ្មោះ ជឹម សុផាត អាយុ៤៣ឆ្នាំ ជាឪពុកនិងជាអ្នកបើកបររថយន្តអោយព្រះសង្ឃវត្តជាងហ្លួង ពួកគេរស់នៅក្នុងភូមិក្រោលជី ឃុំពពេល ស្រុកបរិបូរណ៌។ចំណែកជនរងគ្រោះដែលត្រូវពួកគេប្លន់សំលាប់យកម៉ូតូមានឈ្មោះ យ៉ាត សុជាតិ អាយុ២៧ឆ្នាំ ជាមន្ត្រីមន្ទីរធម្មការខេត្ត និងជាគ្រូបង្រៀនពុទ្ធិកៈបឋមសិក្សាវត្តខ្សាម ស្នាក់នៅភូមិត្រោកលិច ឃុំស្រែថ្មី ស្រុករលាប្អៀរ។
លោក ប៉ុល វុទ្ធី បាននិយាយរៀបរាប់ពីដំណើររឿងប្លន់សម្លាប់យកម៉ូតូនេះថា៖មុនពេលកើតហេតុឈ្មោះ អេង សុខា បានលួចលុយជីដូន៤លានរៀលមកដេកស៊ីចាយនៅក្រុងកំពង់ឆ្នាំង បាត់ទៅផ្ទះរយៈពេល១ខែ ដោយភរឪពុកនិងជីដូនថា លុយនោះបានយកមកអោយមិត្តភ័ក្រខ្ទីនៅក្រុងកំពង់ឆ្នាំង។នៅម៉ោង៨យប់ ថ្ងៃទី១៦ ខែសីហា ឆ្នាំ២០១៥ ឈ្មោះ សុខា បានអោយឪពុកឈ្មោះ ជឹម សុផាត ដឹកខ្លួនតាមម៉ូតូមកក្រុងកំពង់ឆ្នាំងដោយភរថា មកទារលុយដែលគេជំពាក់២លានរៀល។ពេលមកដល់សួនច្បារមុខសាលាខេត្តកំពង់ឆ្នាំង ឈ្មោះ អេង សុខា បានទូរស័ព្ទហៅឈ្មោះ យ៉ាត សុជាតិ ជាមិត្តភ័ក្រអោយមកជួបខ្លួន និងបានខ្ចីលុយ១ម៉ឹនរៀលពីឈ្មោះ យ៉ាត សុជាតិ អោយឪពុកចាក់សាំងទៅផ្ទះវិញ។បន្ទាប់មកពួកគេទាំង២នាក់បានទៅច្រៀងលេងនៅហាងការ៉ាអូខេ ពេលចេញមកវិញបានទៅផឹកស្រាបៀរអស់២ថូទៀត រួចក៍បន្តដំណើរទៅផឹកនៅផ្សារព្រៃខ្មែរទៀត។ពេលគេបិតតូបអស់ក៍ត្រឡប់មកដេកនៅផ្ទះសំណាក់មួយនៅភូមិទួលក្រឡាញ់វិញ។
នៅវេលាម៉ោង១រំលងអាធ្រាតឆ្លងចូលថ្ងៃទី១៧ ខែសីហា ឆ្នាំ២០១៥ ពួកគេទាំង២នាក់បានជិះម៉ូតូទៅហៅស្រីស្នេហ៍នៅផ្លូវចូលព្រលានយន្តហោះឃុំពង្រយកមកដេកនៅផ្ទះសំណាក់ ប៉ុន្តែនៅពេលទូរស័ព្ទហៅស្រីស្នេហ៍រូបនោះគេមិនលើកទូរស័ព្ទ។បន្ទាប់មកជនល្មើសបានអោយជនរងគ្រោះ ឌុបម៉ូតូទៅផ្ទះខ្លួននៅភូមិក្រោលជីវិញ ដោយសន្យាអោយថ្លៃ២ម៉ឺនរៀល។ពេលទៅដល់ចំណុចកើតហេតុ ជនល្មើសបានចូលក្នុងខ្ទមស្រែមួយដែលគ្មានមនុស្សនៅ ហើយបានយកអង្រែបុកគ្រឿងមួយមកលបវាយជនរងគ្រោះចំកញ្ជឹងករ ពីក្រោយ និងវាយចំបំពង់ករ ពីមុខចំនួន៤អង្រែទៀត ហើយបានអូសសពជនរងគ្រោះដាក់ក្នុងព្រៃក្បែរនោះ និងបានយកលុយពីកែបម៉ូតូ និងហោប៉ៅបាន២៤.០០០រៀល និងបានជិះម៉ូតូយកទៅទុកនៅផ្ទះរបស់ខ្លួន។
ក្រោយពេលឃាតកម្ម សមត្ថកិច្ចជំនាញបានធ្វើការស្រាវជ្រាវយ៉ាងយកចិត្តទុកដាក់ និងបានដឹងថា ជនល្មើសឪពុក និងកូនបានយកម៉ូតូដែលប្លន់បានទៅផ្ញើនឹងលោកនៅវត្តជាងលួងក្នុងឃុំពពេល បន្ទាប់មកនៅម៉ោង១រសៀលថ្ងៃទី២០ ខែសីហា ឆ្នាំ២០១៥ សមត្ថកិច្ចបានព័ទ្ធចាប់ខ្លួនទាំង២នាក់ឪនិងកូន នៅពេលជួនលោកសង្ឃមកពីខេត្តបន្ទាយមានជ័យវិញ និងបានដកហូតម៉ូតូមួយគ្រឿងរបស់ជនរងគ្រោះ ដែលគេបានផ្ញើទុកនៅក្នុងកុដិលោកក្នុងវត្តជាងហ្លួង។រហូតដល់ម៉ោង១០យប់ថ្ងៃទី២០ ខែសីហា ទើបជនល្មើសទាំង២នាក់ឆ្លើយសារភាពចំពោះមុខសមត្ថកិច្ចថា ពួកគេទាំង២នាក់ពិតជាបានធ្វើសកម្មភាពប្លន់ និងផ្សំគំនិតគ្នា ក្នុងឃាតកម្មខាងលើនេះប្រាកដមែន ពុំមានបក្ខពួកណាផ្សេងទៀតឡើយ។ជនល្មើសទាំង២នាក់ត្រូវបានសមត្ថកិច្ចកសាងសំណុំរឿងតាមផ្លូវច្បាប់ញ្ជូនខ្លួនទៅកាន់តុលាការខេត្តចាត់ការបន្ត៕