ខេត្តឧត្តរមានជ័យ៖ ដើម្បីពង្រឹងជំហរដល់កងយោធពលខេមរភូមិន្ទដែលកំពុងឈរជើងការពារព្រំដែន ខ្មែ-ថៃឲ្យកាន់តែមានភាពប្រសើរឡើង និងមានជំហរការពារជាតិកាន់តែរឹងមាំនោះ នាព្រឹកថ្ងៃទី២១ ខែសីហា ឆ្នាំ២០១៥ នាយឧត្តមសេនីយ៍គន់ គីម អគ្គមេបញ្ជាការរង និង
ជានាយសេនាធិការចម្រុះកងយោធពលខេមរភូមិន្ទ រួមដំណើរដោយនាយទាហាន នាយទាហានរងជាច្រើនរូបផងដែរ បានអញ្ជើញទៅចុះពិនិត្យ និងតាមដានការងារកងទ័ពដែលកំពុងឈរជើងការពារព្រំដែនខ្មែរ ថៃទិសទី៣ និងបានមានមតិ សំណេះសំណាលនៅក្នុងភូមិ-សង្កាត់សំរោង ក្រុងសំរោង ខេត្តឧត្តរមានជ័យ ។
មានប្រសាសន៍សំណេះសំណាលនៅពេលនោះ នាយឧត្តមសេនីយ៍បានជំរុញឲ្យមេបញ្ជាការ មេបញ្ជាការរង កងពល និងកម្លាំង យោធិនទាំងអស់ ដែលមានតួនាទីការពារជាតិមាតុភូមិតាមបន្ទាត់ព្រំដែនខ្មែរ-ថៃ ត្រូវយកចិត្តទុកដាក់ ការងារការពារព្រំដែនឲ្យបានល្អ និងត្រូវបង្កបង្កើនផលបន្ថែមឲ្យបានច្រើនទៀត ដោយមិនត្រូវទុកដីដែលបង្កបង្កើនផលឲ្យនៅទំនេជាដាច់ខាត ។ កងកម្លាំងទាំងអស់ត្រូវចុះជួយដល់គ្រួសារកងទ័ព និងប្រជាពលរដ្ឋផងដែរ នៅពេលដែលពួកគាត់មានទីតាំងនៅជិតអង្គភាពដែលខ្វះខាតអ្វីមួយនោះ ។ ជាមួយនេះដែរ គ្រប់អង្គភាព ត្រូវតែផ្គត់ផ្គង់ជីវភាពគ្រួសារឲ្យមានកម្រិតធូរធាតាមរយៈរួមគ្នាបង្កបង្កើនផល ផ្គត់ផ្គង់អង្គភាព និងគ្រួសារ ដោយមិនពឹងផ្អែកទៅលើជំនួយពីខាងក្រៅ ។
នាយឧត្តមសេនីយ៍ក៏បានបញ្ជាក់ផងដែរ ឲ្យកងទ័ពទាំងអស់ចេះថែរក្សាអាវុធយុទ្ធភ័ណ្ឌ និងឧបករណ៍បំពាក់គ្រប់ប្រភេទ រក្សាឲ្យបានល្អ និងរៀបចំរក្សាទុកដាក់ឲ្យមានរបៀបរៀបរយ ព្រមជាមួយមានគំនិតចេះច្នៃប្រឌិតអាវុធយុទ្ធភ័ណ្ឌមួយចំនួនដើម្បីបម្រើសេចក្តីចាំបាច់នៅពេលមានសង្គ្រាម ។ ថ្វីបើសភាពការណ៍នៅព្រំដែនខ្មែរ-ថៃមានភាពស្ងប់ស្ងាត់ក៏ពិតមែន ប៉ុន្តែយើងមិនត្រូវ សន្តិសុខនិយមពេកនោះទេ ត្រូវមានការប្រុងប្រយ័ត្នខ្ពស់ និងមានភាពឆ្លាតវៃ នៅពេលមានសភាពការណ៍ណាមួយកើតឡើងតាមព្រំដែន ៕
