ខេត្តសៀមរាប៖ ផ្ទះគ្រូទាយមួយខ្នងត្រូវបានអគ្គិភ័យលេបត្របាក់ទាំងព្រឹក ខណៈម្ចាស់ផ្ទះអុជធូបបន់ស្រន់ថ្ងៃសិល្ប៍នៅកន្លែងអស្សនៈទុកចោល ហើយចុះមកអង្គុយនៅផ្ទះបាយខាងក្រោយ មិនបានប្រុងប្រយ័ត្ន ទើបបណ្តាលឱ្យមានការ ឆាបឆេះចេញពីកន្លែងអស្សនៈអស់ផ្ទះទាំងស្រុងតែម្តង ។
ហេតុការឆាបឆេះដែលបណ្តាលឱ្យមានការភ្ញាក់ផ្អើលទាំងថ្ងៃព្រឹកនេះកើតឡើងនៅវេលាម៉ោង១១ថ្ងៃត្រង់ថ្ងៃទី២២ខែសីហា ឆ្នាំ២០១៥ស្ថិតនៅក្រុមទី៨ ភូមិថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។
តាមប្រភពពីម្ចាស់ផ្ទះបានប្រាប់ឱ្យដឹងថា មុនពេលកើតហេតុពួកគាត់ទាំង២នាក់ប្តីប្រពន្ធ បានអុជធូបសែនថ្ងៃសិល្ប៍នៅកន្លែងអស្សនៈលើផ្ទះរបស់គាត់ដើម្បីបន់ស្រន់ឱ្យបានសចក្តីសុខ ព្រោះថ្ងៃនេះជាថ្ងៃសីល ៨កើត រួចនាំគ្នាចុះមកក្រោយផ្ទះ បានមួយសន្ទុះក៏ឃើញផ្សែងហុយទ្រលោមចេញពីលើផ្ទះ រួចពួកគាត់ក៏ស្រែកហៅអ្នកជិតខាងឱ្យមកជួយពន្លត់ភ្លើង ព្រោះភ្លើងបានឆេះផ្ទះរបស់គាត់ហើយ ។
ម្ចាស់ផ្ទះបានបន្តថា ក្រោយពីអ្នកជិតខាងបានមកដល់ ផ្ទះពួកគាត់ ជាម្ចាស់ផ្ទះក៏នាំគ្នាឡើងទៅលើផ្ទះដើម្បីជួយពន្លត់តែអកុសល អណ្តាតភ្លើងក៏ឆេះខ្លាំងឡើងៗ។ ក្រោយពេលកើតហេតុពួកគាត់ក៏បានរាយការទៅនគរបាលប៉ុស្តិ៍ស្វាយដង្គំដើម្បីជួយហៅរថយន្តពន្លត់អគ្គិភ័យឱ្យមកជួយ មួយសន្ទុះធំក៏ឃើញរថយន្តពន្លត់អគ្គិភ័យមកដល់បន្តបន្ទាប់គ្នាចំនួន៣គ្រឿបានជួយបាញ់ទឹកពន្លត់ភ្លើងអស់ទាំង៣គ្រឿងទើបរលត់បាត់អស់និងមិនបន្តឆេះរាលដាលដល់ផ្ទះអ្នកជិតខាង។
លោកវរសេនីយឯក សំ សុជាតិ ស្នងការរងទទួលការងារអាវុធជាតិផ្ទុះអគ្គិភ័យ នៃស្នងការនគរបាលខេត្តសៀមរាបបានឲ្យដឹងនៅរសៀលថ្ងៃទី២២ខែសីហានេះថា ក្រោយពីបានទទួលព័ត៌មានថា មានភ្លើងឆេះផ្ទះពលរដ្ឋនៅសង្កាត់ស្វាយដង្គំ លោកក៏បានឱ្យកម្លាំងរថយន្តពន្លត់អគ្គិភ័យចំនួន៣គ្រឿងរបស់ស្នងការនគរបាលខេត្តទៅជួយពន្លត់ ប៉ុន្តែប្រើទឹកអស់ទាំង៣គ្រឿងទើបអាចទប់ស្កាត់បានមិនឱ្យរាលដាលទៅផ្ទះផ្សេងទៀត ។លោកបន្តថា ម្ចាស់ផ្ទះមានឈ្មោះ នឹម សឿម ភេទប្រុស អាយុ៥៥ឆ្នាំមុខរបរធ្វើស្រែ រស់នៅភូមិ កើតហេតុខាងលើផ្ទះមានទំហំ ៦ម X ៧ម ធ្វើអំពីឈើលើ ថ្មក្រោម ប្រក់ក្បឿង (មូលហេតុនៃការឆេះបណ្តាល មកពីភ្លើងធូប ចំណែកទ្រព្យសម្បត្តិដែលត្រូវភ្លើងឆេះអស់មួយចំនួនធំដូចជាៈ មាសសុទ្ធអស់ចំនួន២តំឡឹង,ប្រាក់ដុល្លាចំនួន១០០០០ដុល្លា, ប្រាក់រៀល៤លានរៀល,ទូរឈើបញ្ឈរ ចំនួន៣ទូរ,គ្រែឈើចំនួន២គ្រែ,ទូរទស្សន៍ចំនួន២,ប្លង់ដីចំនួន១០ប្លង់ ,សំបុត្រកំណើតនិងសំបុត្របញ្ជាក់កំណើតនិងសៀវភៅគ្រួសារ សៀវភៅស្នាក់នៅនិងសំបុត្រអាពាហ៍ពិពាហ៍ ព្រមទាំងសំលៀកបំពាក់និងសម្ភារៈមួយចំនួនទៀតឆេះអស់ទាំងស្រុងដែររីឯម្ចាស់ផ្ទះមិនបណ្តាលឲ្យ រងរបួសឬស្លាប់នោះទេ ។ ចំណែកសំម្ភារៈនិងទ្រព្យសម្បត្តិផ្សេងៗដែលឆេះអស់គិតជាទឹកប្រាក់សរុបនៅមិនទាន់ដឹងនៅឡើយ ៕ ខេង ឧត្តម