ខេត្តសៀមរាប ផែនការការពារសន្តិសុខ សុវត្ថិភាព សណ្តាប់ធ្នាប់សាធារណៈ ដែលជាកាតព្វកិច្ចចម្បងរបស់ខេត្តទេសចរណ៍វប្បធម៌ប្រវត្តិសាស្ត្រ សៀមរាប-អង្គរ ត្រូវបានផ្តោតការយកចិត្តទុកដាក់ទៅលើការ ការពារលទ្ធផល នៃការផ្ទៀងផ្ទាត់ផែនទីកំណត់ព្រំដែនកម្ពុជា-វៀតណាម នៅក្នុងកិច្ចប្រជុំមួយរបស់គណបញ្ចាការឯកភាព ដែលបានធ្វើឡើងនាថ្ងៃទី២១ ខែសីហា ឆ្នាំ២០១៥នេះ ។ លោកឃឹម ប៊ុនសុង អភិបាលខេត្ត និងជាប្រធានគណបញ្ជាការឯកភាពខេត្តសៀមរាប មានវត្តមានដឹកនាំកិច្ចប្រជុំនេះ ។ មេបញ្ជាការ មេបញ្ជាការរង នៃកងកម្លាំងប្រដាប់អាវុធទាំងបី ( កងរាជអាវុធហត្ថ នគរបាល និងតំណាងឲ្យអង្គភាពតំបន់ប្រតិបត្តិការសឹករងសៀមរាប ) ដែលជាកម្លាំងប្រតិបត្តិការស្នូល ត្រូវបានចូលរួមភិភាគ្សានៅក្នុងកិច្ចប្រជុំនោះ ដោយឡែកមន្ត្រីស្ថាប័នឯករាជ្យ ( តុលាការខេត្តសៀមរាប ) ដែលមានភារកិច្ចសម្របសម្រួល អនុវត្តផែនការការពារសន្តិសុខ ក្នុងទិដ្ឋភាពច្បាប់ ក៏មានវត្តមាន ផងដែរ ។
កិច្ចប្រជុំនេះ បានបង្ហាញនូវការយកចិត្តទុកដាក់ ក្រោយពីមានព្រឹត្តិការណ៍ជាប្រវត្តិសាស្ត្រ នៃការមកដល់ព្រះរាជាណាចក្រកម្ពុជា នូវផែនទី១៨ផ្ទាំង ដែលអង្គការសហប្រជាជាតិឲ្យកម្ពុជាខ្ចី ដើម្បីផ្ទៀងផ្ទាត់ស្វែងរកការពិត ជម្រះមន្ទិល លាងសម្អាតពីការចោទប្រកាន់នានា ក្នុងចេតនា មួលបង្កាច់ថា ផែនទីដែលរាជរដ្ឋាភិបាលកម្ពុជា កំពុងប្រើប្រាស់កំណត់ព្រំដែនកម្ពុជា វៀតណាម ជាផែនទីមិនពិតប្រាកដនោះ ។ កិច្ចប្រជុំ បានឯកភាពទទួលយក នូវក្តីសង្ឃឹមរបស់រាជរដ្ឋាភិបាល ក្រោយពីការផ្ទៀងផ្ទាត់ រវាងផែនទីដែលរាជរដ្ឋាភិបាលកំពុងប្រើប្រាស់២៦ផ្ទាំង ជាមួយផែនទី១៨ផ្ទាំងដែលផ្តល់ឲ្យខ្ចីដោយអង្គការសហប្រជាជាតិ និងផែនទីដែលផ្តល់ឲ្យដោយគណបក្សសង្គ្រោះជាតិ ចំនួន២៤ផ្ទាំង ដែលទទួលបានលទ្ធផលជាវិជ្ជមាន ល្អប្រសើរនោះ ។
ជាមួយគ្នានោះ កិច្ចប្រជុំនេះ បានបង្ហាញនូវសុឆន្ទៈថា៖ លទ្ធផលនៃការផ្ទៀងផ្ទាត់ផែនទីខាងលើ វាជាអត្តសញ្ញាណថ្មី នៃការជួសជុលវប្បធម៌សន្ទនា រវាងគណបក្សសម្លេងច្រើន និង គណបក្សសម្លេងភាគតិចនៅក្នុងសភា និងឈានទៅរកការឯកភាពជាតិ បន្តដំណើររួមគ្នា ដើម្បីស្វែងរកសំណោះស្រាយបញ្ហាព្រំដែន ជាមួយប្រទេសជិតខាង ដោយសន្តិវិធី ក្នុងក្របខ័ណ្ឌនៃកិច្ចសហប្រតិបត្តិការ ដើម្បីព្រំដែនសន្តិភាពនិង ការអភិវឌ្ឍន៍ ។
ផ្តើមចេញពីការរកឃើញនូវតម្លៃពិតខាងលើ កិច្ចប្រជុំរបស់គណបញ្ជាការឯកភាពខេត្តសៀមរាប បានដាក់ចេញនូវផែនការ រាយសំណាញ់សន្តិសុខ សុវត្តិភាពនយោបាយ ការពារលទ្ធផលនៃការខិតខំប្រឹងប្រែងខាងលើ ដោយមិនអនុញ្ញាតិ ឲ្យមានសកម្មភាពវិច្ឆេតកម្មណាមួយ ដែលមានបំណងបំពុលបរិយាកាសសង្គម បាននោះឡើយ ហើយផែនការនេះនឹងត្រូវបានអនុវត្តន៍ ចាប់ពីថ្នាក់ខេត្ត គ្របដណ្តប់រហូតដល់មូលដ្ឋាន ៕ ដោយគឿនវ៉េត