ខេត្តបន្ទាយមានជ័យ មន្ត្រីសាលាស្រុកថ្មពួកម្នាក់ព្រោះតែខឹងនឹងចោរចូលលួចមាន់ទាញឹកញាប់ពេពបានរាយខ្សែលួសតភ្លើងព័ទ្ធក្នុងដីឡូត៍របស់ខ្លួនបណ្តាលឆក់មនុស្សម្នាក់ស្លាប់ម្នាក់។ជនរងគ្រោះស្លាប់គេប្រទះឃើញនៅវេលាម៉ោង៧និង៣០នាទីព្រឹកថ្ងៃទី២១ ខែសីហា ឆ្នាំ២០១៥ នៅក្នុងដីឡូត៍ ស្ថិតនៅក្នុងភូមិឯកភាព ឃុំគំរូ ស្រុកស្វាយចេក ខេត្តបន្ទាយមានជ័យ។
លោកអ៊ុកសុផាតអធិការងនគរបាលស្រុកស្វាយចេកបានឲ្យដឹងថាជនរងគ្រោះមានឈ្មោះសាំង ម៉ៅ ភេទប្រុស អាយុ៣៦ឆ្នាំ រស់នៅភូមិកើតហេតុ និងជាអ្នកជិតខាងរីឯម្ចាស់ដីឡូត៍មានឈ្មោះសេងគន្ធហៅស៊ុយភេទប្រុសអាយុ៤៦ឆ្នាំរស់នៅភូមិកើតហេត់ុ។ឈ្មោះសេង គន្ធ ហៅ ស៊ុយនេះ គឺជាមន្ត្រី សាលាស្រុកថ្មពួកបានបាត់មាន់ដែលខ្លួនចិញ្ចឹមជាញឹកញាប់ទើបខឹងខ្លាំងបានរាយខ្សែភ្លើងដាក់ដើម្បីដាក់ចោរលួចមាន់តែអកុសលត្រូវបានឆក់អ្នកជិកខាងស្លាប់
ទៅវិញ។លោកអធិការងក្រោយពីទទួលបានព័ត៌មានអំពីករណីឆក់ខ្សែភ្លើងនេះរួចមកកម្លាំងនគរបាលស្រុក បានបង្កើតគណៈកម្មការចុះត្រួតពិនិត្យ និងធ្វើកោសល្យវិច្ច័យលើសពដែលសមាសភាពចូលរួមកម្លាំងនគរបាលប៉ុស្តិ៍ នគរបាលស្រុក មន្ត្រីពេទ្យឃុំ អាជ្ញាធរមូលដ្ឋាន ភូមិ ឃុំផងដែរ ។ ក្នុងកាចុះត្រួតពិនិត្យឃើញថា ជនរងគ្រោះ បានស្លាប់នៅក្នុងដីឡូត៍ ហើយមានស្លាកស្នាមខ្លោច នៅលើដងខ្លួន និងដៃជើងរបស់ជនរងគ្រោះ ។តាមការសន្និដ្ឋាន ការស្លាប់របស់ជនរងគ្រោះ គឺដោយសារតែឆក់ខ្សែភ្លើង។ ទាក់ទិននឹងករណីខាងលើនេះ ម្ចាស់ដីឡូត៍ មិនព្រមសារភាពពីកំហុសរបស់ខ្លួន ដែលលួចដាក់បង្កៃ ខ្សែភ្លើងតភ្ជាប់នឹងខ្សែលួសនោះទេ ។ លុះដល់ល្ងាចនាថ្ងៃដដែល ទើបគេព្រមសារភាពថា បានដាក់បង្កៃខ្សែភ្លើង ភ្ជាប់នឹងខ្សែលួស ដែលរាយព័ទ្ធជុំវិញរបងដីឡូត៍ ផ្ទះរបស់ខ្លួន ពិតប្រាកដមែន។ ការធ្វើបែបនេះ ក៏ព្រោះតែមានចោរ បានចូលលួចមាន់-ទា របស់ខ្លួន បាត់អស់ជាច្រើនក្បាល ។ ចំណែកម្ចាស់ផ្ទះ ត្រូវបានកម្លាំងជំនាញកសាងសំណុំរឿងដើម្បីបញ្ជូនទៅសាលាដំបូង ចាត់ការតាមច្បាប់៕
