ខេត្តតាកែវ៖យ៉ាងហោចណាស់កម្មការិណីចំនួន៧នាក់បានរង់របួសធ្ងន់និងកំពុងជួយសង្គ្រោះបន្ទាន់នៅឃ្លីនិចឯកជនមួយកន្លែងក្នុងហេតុការណ៍គ្រោះថ្នាក់ចរាចរណ៍មួយកាលពីព្រឹកម៉ោង៦ និង ៣០នាទីថ្ងៃទី២៤ខែសីហាឆ្នាំ២០១៥។ គ្រោះថ្នាក់នេះកើតឡើងតាមបណ្តោយផ្លូវជាតិលេខ៣ ចន្លោះគីឡូម៉ែត្រលេខ៦០ ៦១ នៅកណ្តាលផ្សារថ្នល់បត់ ភូមិពេជ្រចង្វា ឃុំបឹងត្រាញ់ខាងជើង ស្រុកសំរោង ខេត្តតាកែវ។ តាមប្រភពពីប្រជាពលរដ្ឋដែលនៅទីនោះបានឲ្យដឹងថា រថយន្តដែលបង្កម៉ាកហ្វូស៊ោ ពាក់ស្លាក់លេខតាកែវ ៣គ ១១៨១ បើកបរដោយបុរសម្នាក់មិនទាន់ស្គាល់អត្តសញ្ញាណម្នាក់ ក្នុងទិសដៅពីត្បូងមកជើង លុះមកដល់កណ្តាលផ្សារក៏បានបុកជាមួយនិងរថយន្តកូរេដឹកកម្មកររោងចក្រមួយគ្រឿងពាក់ស្លាកលេខ ដ ៣៧០៦ ភព២ ដែលបើកបរបញ្ច្រាស់ទិសគ្នាយ៉ាងពេញទំហ៊ឹង បណ្តាលឲ្យកម្មករដែលជិះទាំងប៉ុន្មានរងរបួសធ្ងន់និងស្រាលជាច្រើននាក់។ បើតាមសម្តី លោក វង់ ង៉ែត អធិការរងទទួលបន្ទុកសណ្តាប់ចរាចរណ៍ស្រុកសំរោងបានឲ្យដឹងថា អ្នករងរបួសធ្ងន់មានចំនួន៧នាក់ ប៉ុន្តែនៅពេលអ្នកសារព័ត៌មានសួររឿងឃាត់ខ្លួនជនដែលបើករថយន្តបង្ក ស្រាប់តែលោក វង់ ង៉ែត ឆ្លើយថាអ្នកការសែតសួររឿងនេះធ្វើអ្វី? រួចលោកឆ្លើយដូចជាមិនទទួលខុសត្រូវថា ប្រហែលជាកូនចៅលោកឃាត់ខ្លួនបានហើយទេដឹង លោកមិនដឹងទេ។
បច្ចុប្បន្នអ្នករបួសកំពុងសម្រាក់ព្យាបាលនៅឃ្លីនិចឯកជនក្បែរៗកន្លែងកើតហេតុ ចំណែករថយន្តទាំងត្រូវបានវាស់វែងនិងកំពុងដោះស្រាយគ្នា។៕