ខេត្តសៀមរាប នៅព្រឹកថ្ងៃទី ០១ ខែ កញ្ញា ឆ្នាំ២០១៥នេះ លោក ពៅ ពិសិដ្ឋ អភិបាលរងនៃគណៈអភិបាលខេត្ត បានជួបធ្វើការប្រជុំពិភាក្សាជាមួយលោកឃឹមយ៉ង់អ៊ុកជាប្រធានអង្គការហាឆាន់ខាំ ក្នុងការដោះស្រាយនូវបញ្ហាពីការសាងសង់ សំណង់គ្មានច្បាប់អនុញ្ញាតព្រមទាំងកាប់រានព្រៃឈើ នៅភូមិត្រាំងពពេល ឃុំតាសៀមស្រុកស្វាយលើខេត្តសៀមរាបដោយមានការចូលរួមរបស់លោកអ៊ុំរាត្រី អភិបាលរងខេត្តបន្ទាយមានជ័យ និង អស់លោកជាថ្នាក់ដឹកនាំមន្ទីរពាក់ព័ន្ធ និង អាជ្ញាធរស្រុកស្វាយលើផងដែរ ។
តាមការបញ្ជាក់របស់លោកអភិបាលរងស្រុកស្វាយលើបានឲ្យដឹងថាក្នុងពេលកន្លងមកនេះ អង្គការហាឆាន់ខាំដែលបានធ្វើការបោះទីតាំងនៅភូមិសាស្ត្រស្រុកស្វាយលើពុំបានសុំច្បាប់ទំលាប់ត្រឹមត្រូវ ព្រមទាំងបានសាងសង់អគារ សិក្សា និង ធ្វើការឈួសឆាយដីព្រៃទៀតផង ។
តាមការបញ្ជាក់របស់លោក ឃឹម យ៉ង់អ៊ុក ប្រធានអង្គការហាឆាន់ខាំ ក៏បានឲ្យដឹងថា ការសាងសង់អគារ សិក្សា និង ទីគោរពសាសនានេះ ក្នុងគោលបំណង ដើម្បីអភិវឌ្ឍន៍នៅតំបន់នោះជូនប្រជាជន ហើយកន្លងមកអង្គការ បានធ្វើការចុះកិច្ចព្រមព្រៀងជាមួយក្រសួងកសិកម្មដើម្បីអភិវឌ្ឍន៍លើវិស័យកសិកម្មនៅក្នុងតំបន់នោះផងដែរ។ លោកក៏បានឲ្យដឹងទៀតថាអង្គការរបស់លោកបានបង្កើតនៅខេត្តបន្ទាយមានជ័យ១កន្លែងនិង ខេត្តសៀមរាប១កន្លែង តែនៅពុំទាន់មានច្បាប់អនុញ្ញាតត្រឹមត្រូវពីអាជ្ញាធរខេត្តសៀមរាប។
ម្យ៉ាងទៀតការមកធ្វើសាលារៀននៅលើទីតាំងនេះ ក្នុងការបំពេញបំណងនៃសេចក្តីស្រឡាញ់របស់ភរិយារបស់លោកដែលមានការស្រឡាញ់ទឹកដីកម្ពុជា ដើម្បីធ្វើអ្វីមួយក្នុងការ ផ្តល់ផលប្រយោជន៍អ្វីមួយដល់ប្រជាជនកម្ពុជា កាលពីមុនពេលភរិយាគាត់ទទួលមរណភាព ដោយគ្រោះថ្នាក់ចរាចរណ៍ នៅប្រទេសកូរ៉េ ហើយក៏បានមកទិញដីព្រៃពីប្រជាពលរដ្ឋនៅភូមិត្រាំងពពេល ឃុំតាសៀម មានទំហំ៣៥០ហិចតា។ ក្នុងនោះលោកក៏បានទទួលនូវកំហុសឆ្គងដែលពុំបានធ្វើទៅតាមច្បាប់នៅប្រទេសកម្ពុជាផងដែរ ។
ក្នុងនោះដែរលោកពៅពិសិដ្ឋក៏បានធ្វើការណែនាំមួយចំនួនដល់ប្រធានអង្គការហាឆាន់ខាំ ព្រមទាំងបានធ្វើ ការបញ្ជាក់ផងដែរដល់លោក អ៊ុំ រាត្រី អភិបាលរងខេត្តបន្ទាយមានជ័យសូមជួយធ្វើការជាមួយអង្គការហាឆាន់ខាំ ឲ្យបាន ស្គាល់ច្បាស់អំពីរបៀបរបបច្បាប់របស់ព្រះរាជាណាចក្រកម្ពុជា ដោយសំអាងលោក ជាថ្នាក់ដឹកនាំមួយរូប ត្រូវតែស្គាល់ច្បាស់ពីការងាររដ្ឋបាលមុននឹងធ្វើការសាងសង់អ្វីមួយ។លោកបានបន្តទៀតថា បើកយោងតាមសេចក្តីរាយការណ៍របស់អាជ្ញាធរស្រុកស្វាយលើ អង្គការមួយនេះពុំបានធ្វើការសុំច្បាប់អនុញ្ញាតពីថ្នាក់ស្រុក ខេត្តឡើយ។លោកពៅពិសិដ្ឋ ក៏បានធ្វើការសាទរផងដែរ អំពីគោលបំណងរបស់អង្គការហាឆាន់ខាំក្នុងការចូលរួមអភិវឌ្ឍន៍នូវធនធានមនុស្សនិងការ កាត់បន្ថយភាពក្រីក្ររបស់ប្រជាជននៅតាមជនបទ ព្រមទាំងបង្កើននូវមុខរបរបច្ចេកទេសជូនដល់បងប្អូនប្រជាពលរដ្ឋ ម្យ៉ាងទៀតនេះក៏ជាការលើកកម្ពស់វិស័យអប់រំនិងសេដ្ឋកិច្ចរបស់ប្រជាជននៅក្នុងតំបន់នោះផងដែរ។ ក្នុងនោះឯកឧត្តម ក៏មានការព្រួយបារម្ភអំពីបញ្ហា ពីផលប៉ះពាល់យ៉ាងខ្លាំងនូវព្រៃឈើ ដែលជាដែនជម្រងសត្វព្រៃ និង ព្រៃអភិរក្សរបស់រដ្ឋ នៅពេលដែលកិច្ចដំណើរការរបស់អង្គការហើយនោះនឹង អាចមានក្រុមជនឆ្លៀតឱកាសមួយចំនួន នឹងចូលធ្វើការបំពានកាប់រានព្រៃយកដីធ្វើកម្មសិទ្ធិនៅតំបន់នោះ។ក្នុងនោះដែរលោកពៅពិសិដ្ឋ ក៏បានដាក់នូវវិធានការមួយចំនួនសម្រាប់ អាជ្ញាធរ សមត្ថកិច្ចមូលដ្ឋាន និង មន្ត្រីជំនាញ ព្រមទាំងអង្គការហាឆាន់ខាំ ដែលបានធ្វើការអភិវឌ្ឍន៍នៅតំបន់នៅត្រូវចូលរួមសហការជាមួយមន្ទីរជំនាញ ក្នុងការសិក្សាស្វែងយល់អំពីតម្រូវការរបស់សិស្សនៅក្នុងតំបន់នោះព្រមទាំងធ្វើកិច្ច សហការជាមួយខណ្ឌរដ្ឋបាលព្រៃឈើលើការសិក្សាអំពីទីតាំងដែនជម្រកព្រៃឈើតើមានផលប៉ះពាល់យ៉ាងណាខ្លះ ឬក៏ជាតំបន់ព្រៃរីករឹលនិងតំបន់ព្រៃស្រោង។ក្នុងនោះដែរលោក ក៏បានឲ្យលោកប្រធានអង្គការត្រូវធ្វើរៀបចំនូវបែបបទឯកសារឲ្យបានត្រឹមត្រូវ ក្នុងការបើកទីស្នាក់ការរបស់ខ្លួននិងត្រូវរៀបចំនូវប្លង់នៃគម្រោងក្នុងកិច្ចអភិវឌ្ឍន៍របស់អង្គការ ដើម្បីដាក់ជូនទៅអាជ្ញាធរខេត្ត និងក្រសួងមហាផ្ទៃក្នុងការសុំអនុញ្ញាតច្បាប់ ដោយបច្ចុប្បន្ននេះព្រះរាជាណាចក្រកម្ពុជា យើងមានច្បាប់គ្រប់គ្រងអង្គការសង្គមស៊ីវិល ដែលរដ្ឋសភាបានអនុម័តកាលពីពេលថ្មីៗនេះផងដែរ ៕ដោយគឿនវ៉េត
