ខេត្តព្រៃវែង៖ខ្យល់ព្យុះលាយឡំនិងទឹកភ្លៀង បានបោកបក់យ៉ាងខ្លាំងបណ្តាអោយលិចទូកធ្វើអោយបុរសពីរនាក់ស្លាប់បាត់បង់ជីវិតគួរអោយអាណោចអាធ័ម ។ ហេតុការនេះ បានកើតឡើងវេលាម៉ោង ១៦ និង៤៥នាទី នៅថ្ងៃទី ០១ ខែ កញ្ញា ឆ្នាំ២០១៥ ស្ថិតនៅក្នុងភូមិជ្រៃ
ក្រហឹម ឃុំកំពង់ឬស្សី ស្រុកពោធិ៍រៀង ខេត្តព្រៃវែង ។
លោក អ៊ុង ផាន អធិការស្រុកពោធិ៍រៀង បានប្រាប់កម្ពុជាថ្មីអោយដឹងថា ជនរងគ្រោះដែលបានស្លាប់បាត់បង់ជីវិត ទី១ ឈ្មោះ សៅ ប៉ោស៊ួ ភេទប្រុស អាយុ ៣៦ឆ្នាំ មានទីលំនៅភ្នំពេញ មុខរបរនគរបាលរាជធានី ទី២ឈ្មោះ ចាន់ សុគន្ធារី ភេទប្រុស អាយុ ៣១ឆ្នាំ ទីលំនៅភ្នំពេញ មុរបរជាងស័ក្ខរូប ។
លោក អ៊ុង ផាន បានអោយដឹងទៀតថា ជនរងគ្រោះបានមកពីភ្នំពេញលុះមកកំពង់ទូក ក៏ឡើងជិះទូកបងប្អូន ដែលនៅចាំទទួលហើយ ក៏ធ្វើដំណើរទៅកាន់ភូមិជ្រៃក្រហឹម ឃុំកំពង់ឬស្សី ស្រុកពោធិ៍រៀង ដោយមានគ្នាទាំង៦នាក់ ប៉ុន្តែនៅសល់តែប្រមាណ៣០០ម៉ែត្រ ប៉ុណ្ណោះ និងដល់ច្រាំងស្រាប់តែមានព្យុះបោកបក់បណ្តាលទូកលិច ហើយអ្នកទាំងបួននាក់បានស្រែកប្រាប់ជនរងគ្រោះអោយតោងទូកអោយជាប់ ប៉ុន្តែជនរងគ្រោះទាំងពីរនាក់បានឃ្លាតឆ្ងាយពីទូក ព្រោះខ្យល់បោកបក់ខ្លាំង ហើយបានស្លាប់ទាំងស្លៀកខោខូវបោយជើងវែងផងនោះ ស្រូបទឹកហែលមិនបានស្លាប់គួរអោយអាណោចអាធ័ម ។ ចំណែកអ្នកភូមិក៏បានចេញទូកមកជួយតែសង្គ្រោះបានតែ៤នាក់ ហើយជនរងគ្រោះក៏បានស្លាប់បាត់បង់ជីវិត ។
លោក អ៊ុង ផាន អធិការស្រុកពោធិ៍រៀង បានអោយដឹងទៀតថា ចំណែកសាកសពជនរងគ្រោះ លោកបាន អោយកំលាំងរបស់លោកប្រមាណ ៧នាក់ និងជួលអ្នកជំនាញមុជទឹក រាវរកប្រមាណម៉ោង ៩យប់ទើបរកសាកសពឃើញ ហើយសាកសពក៏ត្រូវបានប្រគល់អោយសាច់ញាតិយកទៅធ្វើបុណ្យតាមប្រពៃណី ៕
