ខេត្តតាកែវ ៖ បញ្ហាគ្រឿងបានដុតកំដៅសមត្ថកិច្ចយើងជារៀងរាល់ថ្ងៃមិនថាទីក្រុង តាមខេត្ត ស្រុកនោះទេ គឺពួកលោកខំបង្ក្រាបការជួញដូរគ្រឿងញៀនគ្មានពេលសម្រាកដើម្បីចាប់ខ្លួនជនសង្ស័យយកទៅផ្តន្ទាទោសបានជាបន្តបន្ទាប់ ក៏ការបង្ក្រាបនេះនៅតែមិនអស់ ព្រោះតែសមត្ថកិច្ចដែលជាអ្នកអនុវត្តច្បាប់បែរជាជាប់ពាក់ព័ន្ធរកស៊ីជួញដូរគ្រឿងញៀនទៅវិញ ។ ដូចជាករណីដែលចាប់បានជនសង្ស័យម្នាក់កាលពីវេលាម៉ោង៤ និង១២ល្ងាច ថ្ងៃទី០៥ ខែកញ្ញា ឆ្នាំ២០១៥នៅស្រុកគិរីវង់ ខេត្តតាកែវ ខណៈពេលដែលជនសង្ស័យបានជិះម៉ូតូ១គ្រឿងធ្វើសកម្មភាពចែកចាយថ្នាំញៀននៅចំណុចផ្លូវលំក្នុងភូមិពោធិ៍ ឃុំព្រះបាតជាន់ជុំ ស្រុកគីរីវង់ រួចនាំមកកាន់អធិការដ្ឋាននគរបាលស្រុកដើម្បីចាត់ការបន្ត ។លោកវរសេនីយ៍ទោ យុគ សារ៉ាត់ អធិការនគរបាលស្រុកគីរីវង់បានឱ្យដឹងថា ជនសង្ស័យចែកចាយគ្រឿងញៀនដែលប៉ូលិសបង្ក្រាបបាននៅពេលនេះមានឈ្មោះ យឹម វណ្ណថៃ ភេទប្រុស អាយុ២០ឆ្នាំ រស់នៅភូមិតាឡឹង ឃុំភ្នំដិន ខណៈពេលជនសង្ស័យកំពុងតែជិះម៉ូតូ១គ្រឿងចែកចាយគ្រឿងញៀននៅចំណុចកើតហេតុខាងលើ ។លោកអធិការបានបន្តទៀតថា ពេលប៉ូលិសចាប់ខ្លួន ហើយបានឆែកឆេររកឃើញថ្នាំញៀនមានម៉ាទឹកកកចំនួន៤កញ្ចប់ធំ លុយដែលលក់ថ្នាំញៀនចំនួន៥០ម៉ឺនរៀល និងសម្ភារ:មួយចំនួនទៀត រួមនឹងម៉ូតូវ៉េវកញ្ចាស់១គ្រឿងផងដែរ ។នៅចំពោះមុខសមត្ថកិច្ច ជនសង្ស័យបានសារភាពថា រូបគេពិតជាបានចែកចាយថ្នាំញៀនពិតប្រាកដមែន ហើយថ្នាំញៀនទាំងអស់នេះរូបគេទទួលបានពីឈ្មោះ ជ័យ វីរៈ ជាមន្ត្រីប៉ូលិសការពារព្រំដែនគោកលេខ៦០៣ ចំនួន៤លើកមកហើយ ដែលលក់ទៅឱ្យជនជាតិវៀតណាម៣លើក និងលក់ឱ្យខ្មែរ១លើក ។ ចំពោះថ្នាំញៀនទាំងអស់នេះជនសង្ស័យបានប្រាប់ថា ឈ្មោះ ជ័យ វីរៈ ទទួលបន្តពីឈ្មោះ ឈុន សុមេធា ជានាយការិយាល័យប្រឆាំងការជួញដូរគ្រឿងញៀន នៃកងរាជអាវុធហត្ថខេត្តតាកែវ ជាអ្នកផ្តល់ឱ្យក្នុងហាងបាយឈ្មោះនីនីជាយក្រុង ។ពេលនេះសមត្ថកិច្ចប៉ូលិសការិយាល័យប្រឆាំងការជួញដូរគ្រឿងញៀនខេត្តកំពុងកសាងសំណុំរឿងបញ្ជូនជនសង្ស័យ និងវត្ថុតាងទៅតុលាការដើម្បីចាត់ការតាមច្បាប់ ។ទាក់ទិននឹងបញ្ហាជនសង្ស័យឆ្លើយថាសមត្ថកិច្ចជាអ្នកផ្តល់ថ្នាំញៀនឲ្យលក់នេះ កម្ពុជាថ្មី ព្យាយាមស្វែងរកទំនាក់ទំនងពីឈ្មោះ ជ័យ វីរៈ ជាមន្ត្រីប៉ូលិសការពារព្រំដែនគោកលេខ៦០៣ និងឈ្មោះ ឈុន សុមេធា ជានាយការិយាល័យប្រឆាំងការជួញដូរគ្រឿងញៀន នៃកងរាជអាវុធហត្ថខេត្តតាកែវ ដែរ តែមិនទាន់ទាក់ទងបានទេនៅពេលនេះ។