ខេត្តសៀមរាប កាលពីរសៀលថ្ងៃទី ០១ ខែ តុលា ឆ្នាំ២០១៥ នៅក្លីបកីឡាយុវជន នៃសហភាពសហព័ន្ធយុវជនកម្ពុជា ខេត្តសៀមរាប មានបើកការប្រកួតបាលទាត់ពានរង្វាន់រដ្ឋបាលខេត្តសៀមរាប ក្រោមអធិបតីភាពលោក អ៊ឹង ហឿន ប្រធានក្រុមប្រឹក្សាខេត្តស្តីទី និង លោក ពៅ ពិសិដ្ឋ អភិបាលរងនៃគណៈអភិបាលខេត្ត ដោយមានការអញ្ជើញចូល រួមពីសំណាក់អស់លោក លោកស្រីជាថ្នាក់ដឹកនាំមន្ទីរ មន្ត្រីជាអ្នកគាំទ្រ កីឡាករទាំង ១៨ក្រុម ផងដែរ ។តាមការបញ្ជាក់របស់គណៈកម្មការរៀបចំការប្រកួត បានឲ្យដឹងថា ក្រុមកីឡាករ ទាំង ១៨ក្រុមនេះ គឺជា ថ្នាក់ដឹកនាំ និង មន្ត្រីរាជការ នៃមន្ទីរ អង្គភាពជុំវិញខេត្ត បានចូលមកធ្វើការប្រកួត ដណ្តើមនូវពានរង្វាន់រដ្ឋបាលខេត្ត ប្រចាំឆ្នាំ២០១៥.២០១៦ ក្នុងការវាស់ស្ទង់នូវកម្រិតបច្ចេកទេស និង ការផ្លាស់ប្តូរនូវបច្ចេកទេសពីគ្នាទៅវិញទៅមក ក្នុងការបង្កើននូវគុណភាពវិស័យកីឡា ហើយការប្រកួតកីឡាក្លាយជាផលិតផលទេសចរណ៍ ប្រកបដោយការទាក់ ទាញតាមរយៈការចូលរួមលេងកីឡា កម្សាន្តជាមួយកីឡា និង ការប្រកួតកីឡា ។ លោកក៏បានធ្វើការបញ្ជាក់ផងដែរ អំពីលក្ខ័ន្ត និង បច្ចេកទេសប្រកួត ដោយធ្វើការប្រកួតវិលជុំ ដែលមានរយៈពេល៦ខែ ។
មានប្រសាសន៍បើកការប្រកួតនោះ លោក ពៅ ពិសិដ្ឋក៏បានធ្វើការថ្លែងអំណរគុណ ចំពោះគណៈកម្មការ បាលទាត់ស្ម័ត្រចិត្តរដ្ឋបាលខេត្តសៀមរាប ប្រចាំឆ្នាំ២០១៥.២០១៦ ក្រោមការជួយឧបត្ថម្ភគាំទ្រ ទាំងស្មារតី សម្ភារៈ និងថវិកាដើម្បីបម្រើដល់ការប្រកួតក្រោមការយកចិត្តទុកដាក់ពីថ្នាក់ដឹកនាំនិង មន្ត្រីរាជការស្នេហាវិស័យកីឡាដែលត្រូវបានសាធារណៈមតិជាតិអន្តរជាតិ ដោយផ្តោតយកចិត្តទុកដាក់លើវិស័យកីឡានៅកម្ពុជា។លោកបានគូសបញ្ជាក់ថា ខេត្តសៀមរាបជាខេត្តវប្បធម៌ប្រវត្តិសាស្ត្រ ពោពេញទៅដោយរមណីដ្ឋានទេសចរណ៍ធម្មជាតិ វប្បធម៌ ប្រវត្តិសាស្ត្រ ដែសម្បូរទៅដោយប្រាង្គប្រាសាទ ដែលជាគោលដៅរបស់ភ្ញៀវទេសចរណ៍នៅលើពិភពលោក ។ លោក ពៅ ពិសិដ្ឋ បានបន្តទៀតថា ក្រោមគោល
នយោបាយឈ្នះៗរបស់សម្តេចតេជោ ហ៊ុន សែន នាយករដ្ឋមន្ត្រី បាន ធ្វើឲ្យប្រទេសជាតិមានសុខសន្តិភាពពេញផ្ទៃប្រទេស ដែលធ្វើឲ្យសង្គមមានការឯកភាពជាតិ បូរណភាពទឹកដី ព្រម ទាំងមានកិច្ចអភិវឌ្ឍន៍រីកចម្រើនលើគ្រប់វិស័យ និង មានកេរ្តិ៍ឈ្មោះ មុខមាត់លើឆាកអន្តរជាតិ ។ ឯកឧត្តមបន្តទៀត ថា ដើម្បីឲ្យក្រុងប្រវត្តិសាស្ត្រ ឲ្យកាន់តែមានភាពល្បីល្បាញ និង មានសោភ័ណភាព បរិស្ថាន អនាម័យ ក្នុងការបម្រើលើវិស័យទេសចរណ៍ យើងទាំងអស់គ្នា ត្រូវចូលរួមក្នុងចលនាប្រឡងប្រណាំងក្រុងស្អាត និង ធ្វើការអភិវឌ្ឍន៍ បៃតងប្រកបដោយចីរភាព ។ លោក ពៅ ពិសិដ្ឋ ក៏បានលើកឡើងថា វិស័យកីឡា គឺជាចលករមួយក្នុងការទាក់ទាញដល់ភ្ញៀវទេសចរណ៍ឲ្យចូលមកទស្សនាកម្សាន្តនៅកម្ពុជា។ ម្យ៉ាងទៀតវិស័យកីឡាបានកំពុងរីកចម្រើន យ៉ាងខ្លាំង ដោយមានក្លីបបាល់ទាត់ បាល់ទះ ក្បាច់បុរាណខ្មែរ កាយសម្ព័ន្ធ ល្បុក្តតោ ការ៉ាតេ និង តៃខ្វាន់ដូ គុណដំបង ដែល មានគុណភាព ហើយត្រូវបានប្រកួតជាលក្ខណៈជាតិ អន្តរជាតិទៀតផង។ពិធីបើកការប្រកួតកីឡាបាល់ទាន់ពានរង្វាន់រដ្ឋបាលខេត្តសៀមរាប គឺជាសក្ខីភាពមួយបង្ហាញឲ្យឃើញថា កីឡាមិនគ្រាន់តែ ដើម្បីសុខភាពប៉ុណ្ណោះទេ គឺ បានចូលរួមចំណែក ក្នុងការជម្រុញការអភិវឌ្ឍន៍ សំខាន់វិស័យទេសចរណ៍ ។ 
កត្តាទាំងនេះហើយដែលយើងជាថ្នាក់ ដឹកនាំ មន្ត្រីរាជការ ត្រូវធ្វើការបង្កើននូវគុណភាពសេវាកីឡាឲ្យបានល្អ ហើយសកម្មភាពកីឡានេះ ធ្វើឲ្យយើងរក ឃើញនូវកីឡាករឆ្នើម ហើយក៏វាមិនវាស់ស្ទង់កម្រិតបច្ចេកទេសប៉ុណ្ណោះទេ គឺបានផ្តល់នូវធនធានមនុស្ស ដោយ មានកាយសម្បទាមាំមួន សុខភាពល្អ ប្រាជ្ញាឈ្លាសវៃ ស្មារតីភ្លឺថ្លា មានការសាមគ្គីភាពទូលំទូលាយ និងរួមគា្នថែរក្សា ការពារទឹកដី ប្រពៃណី ទំនៀមទំលាប់ខ្មែរហើយកីឡាជាទូតសន្តិភាពផងដែរ។ក្នុងនោះលោកពៅពិសិដ្ឋ ក៏បានធ្វើក្រើនរំលឹកដល់កីឡាករទាំងអស់ត្រូវយល់ដឹងពីការផ្លាស់ប្តូរបទពិសោធន៍បច្ចេកទេសគ្នា ហើយវិស័យកីឡាធ្វើឲ្យយុវជនគ្រប់រូបជៀសផុតពីការប្រើប្រាស់គ្រឿងញៀន ព្រមទាំងត្រូវគោរពនូវបទដ្ឋានបច្ចេកទេសការប្រកួតដើម្បីឲ្យព្រឹទ្ធការណ៍នៃសកម្មភាពនេះ ក្នុងការរឹតចំណងមិត្តភាពរបស់មន្ត្រីយើងកាន់តែល្អប្រសើរផងដែរ ៕ដោយគឿនវ៉េត
