ខេត្តសៀមរាប បទល្មើសនេសាទបឹងទន្លេសាបមានច្រើនរូបភាពប៉ុន្តែមន្ត្រីមានសមត្ថកិច្ចអាចបង្ក្រាបបានប្រហែលជា ១០%ប៉ុននោះ។ ជាក់ស្តែងនៅក្នុងឆ្នាំ ២០១៤ នេះមានការកាប់បំផ្លាញព្រៃលិចទឹកយ៉ាងអនាធិបតេយ្យ យកមកធ្វើជាសំរះដាក់លាយឡំជាមួយកំប្លោក នៅចំណុចមួយចំនួន ក្នុងទឹកដី ឃុំអន្លង់សំណរ ស្រុកជីក្រែង ខេត្តសៀមរាប ។
ដូចជា ស្ទឹងកំបុត ចងសេះ ស្ទឹងជ្រៅ មាត់ខ្លា មានចំនួនរាប់រយសំរះ ។ ប៉ុន្តែជំនាញរដ្ឋបាលជលផល មន្ត្រីឧទ្យានុរក្ស និងបរិស្ថាន រួមជាមួយសហគមន៍ មើលមិនឃើញ ព្រោះមន្ត្រីទាំងនេះមានជំងឺស្រវាំងភ្នែក បណ្តាលមកពីធូលីលុយដុល្លាហុយចូលភ្នែក ។
បញ្ហាដែលអាក្រក់បំផុតគឺ ការចងកំប្លោកធ្វើជាសំរះចូលទៅក្នុងតំបន់ការពារ និងអភិរក្សត្រីមេពូជសហគមន៍ស្ទឹងជ្រៅ ដែលជាតំបន់ហាមឃាត់ ។ លោក វុន រស់នៅក្នុងភូមិអន្លង់សំណរ ឃុំអន្លង់សំណរ ជាម្ចាស់សំរះ និយាយថា លោកហ៊ានដាក់ចូលក្នុងដែនអភិរក្សនេះព្រោះ លោកបានបង់លុយអោយទៅបរិស្ថាន និងសហគមន៍ហើយ។
លោក ផ្លោក មានប្រពន្ធឈ្មោះ វុន ស ដែលជាកូនប្រសាររបស់ម្ចាស់សំរះ និយាយថា ប្រសិនបើរាជការមិនឃោឃិត អោយលោកប្រព្រឹត្តបទល្មើសនេសាទនោះទេ លោកនឹង ទៅធ្វើស្រែវិញព្រោះលោកមានស្រែចំនួន ៨ហិចតា ជាប់ទៅនឹងផ្លូវក្រាលគ្រួសក្រហម ។
លោក ឆាត សំណាង ជាប្រធានមន្ត្រីឧទ្យានុរក្សនិងបរិស្ថានប្រចាំស្នាក់ស្ទឹងជ្រៅ បំភ្លឺប្រាប់អ្នកសារព័ត៌មានថា : លោកបានហាមឃាត់ លោក វុន ក្នុងការដាក់សំរះនៅចំណុចនេះដែរ ប៉ុន្តែលោក វុន ចេះតែជជេសដាក់ រឿងលុយកាក់វិញ លោកមិនបានទទួលទេ ។
ករណីបទល្មើសនេសាទច្រើនយ៉ាងនេះ តែជំនាញមានសមត្ថកិច្ចមើលមិនឃើញ ។ តើលោក កៅ ពឿន ប្រធានអង្គការប្រឆាំងអំពើពុករលួយ មានទស្សនៈយ៉ាងណាចំពោះបទល្មើស និងមន្ត្រីមានសមត្ថកិច្ច ។ ដោយ អ៊ុក ផ្លុង (ស្រុកជីក្រែង)
