បន្ទាយមានជ័យៈ គ្រាប់កាំភ្លើងមួយគ្រាប់ដែលសេសសល់ពីសង្គ្រាម បានផ្ទុះឡើងកាលពីព្រឹកថ្ងៃទី 13.11.2015 វេលាម៉ោង 6/00នាទី បណ្តាលអោយយុវជនម្នាក់រងរបួសធ្ងន់បែកភ្នែកទាំងពីរនិងរបួសសុះពេញរាងកាយហេតុការណ៌ផ្ទុះគ្រាប់នេះកើតឡើងនៅចំនុចខាងជើងបុរីខេធីអេកស្ថិតនៅជិតព្រំដែនកម្ពុជាថៃក្នុងភូមិសាមគ្គីមានជ័យ សង្កាត់ប៉ោយប៉ែតក្រុងប៉ោយប៉ែត ខេត្តបន្ទាយមានជ័យ។លោក ជា ដា មេបញ្ជាការមូលដ្ឋានអាវុធហត្ថក្រុងប៉ោយប៉ែតបានប្រាប់អោយដឹងថាជនរងគ្រោះមានឈ្មោះ ចិត្ត អាយុ25 ឆ្នាំជាកម្មករសំណង់ក្នុងបុរីខេធីអេកមានទីលំនៅ ភូមិស្រះកែវ ឃុំកំពង់ព្រះស្រុកសង្កែ.ខេត្តបាត់ដំបង។
ជនរងគ្រោះត្រូវបានអ្នករួមការងារប្រាប់ថានៅមុនកើតហេតុបានដើរតម្រង់ទៅរកកន្លែងបត់ជើងធំ លុះទៅបានមួយសន្ទុះក៏ស្រាប់តែឮ សំលេងផ្ទុះឡើងនិងមានសំលេងស្រែកអោយជួយ។
សមត្ថកិច្ចក៏បានចុះទៅដល់កន្លែងកើត ហេតុហើយដឹកជនរងគ្រោះទៅកាន់មន្ទីរបង្អែកខេត្តមិត្តភាពកម្ពុជា-ជប៉ុនមង្គលបុរីដើម្បី ជួយសង្គ្រោះបន្ទាន់។ក្រោយពីបានពិនិត្យនៅកន្លែងកើតហេតុសមត្ថកិច្ចបានធ្វើការសន្និដ្ឋានថា គ្រាប់កាំភ្លើងដែលផ្ទុះមិនទាន់ស្គាល់ប្រភេទនៅឡើយវាបានកប់នៅក្នុងដីជាច្រើនឆ្នាំមកហើយ ហើយទើបតែអណ្តែតឡើងពេលយុវជនកំពុងតែបត់ជើងបានយកដុំថ្មទៅគប់លើវាក៏បណ្តាលអោយផ្ទុះឡើងតែម្តង។
រហូតមកទល់ពេលនេះស្ថានភាពជនរងគ្រោះគឺបាននិងកំពុងស្ថិតក្រោមការជួយសង្គ្រោះបន្ទាន់ពីក្រុមគ្រូពេទ្យនៅឡើយ៕