ខេត្តសៀមរាប៖អង្គកឋិនទានសាមគ្គីមួយ ដែលបានផ្តួចផ្តើមធ្វើឡើងដោយលោក ឃឹម ប៊ុនសុង អភិបាលនៃគណៈអភិបាលខេត្ត និង លោកជំទាវ ព្រមទាំងក្រុមគ្រូសារ មន្ត្រីរាជការ ព្រះសង្ឃ គណៈកម្មការអាចារ្យវត្ត ពុទ្ធបរិស័ទចំណុះជើងវត្តជោរេនចេស្តា ហៅវត្តកណ្តាល បាន
ស្រុះស្រួលមូលមតិគ្នាធ្វើអង្គកឋិនទានមួយ ដង្ហែរនាំយកនូវបច្ច័យ ស្បង់ជីវ័រ ទៅវេរប្រគេនព្រះសង្ឃ ដែលគង់ចាំព្រះវស្សាអស់កាលត្រីមាស ក្នុងពុទ្ធសីមាវត្តជោរេនចេស្តា ហៅវត្តកណ្តាល ស្ថិតនៅភូមិបេង ឃុំ ជីក្រែង ស្រុកជីក្រែង ខេត្តសៀមរាប ក្នុងគោលបំណងដើម្បីប្រមូល បច្ច័យយកទៅកសាងបង្ហើយនូវព្រះវិហារថ្មីក្នុងទីវត្តនេះ ដែលបច្ចុប្បន្ននេះសាងសង់បានប្រមាណ៧០%ហើយ ។ ពិធីបុណ្យអង្គកឋិនទាននេះបានប្រព្រឹត្តទៅតាមគន្លងប្រពៃណី ទំនៀមទម្លាប់នៃព្រះពុទ្ធសាសនា នៅសណ្ឋាគារបុរីអង្គរ ខេត្តសៀមរាប ។
លុះព្រឹកថ្ងៃ០៥កើត ខែកត្តិក ឆ្នាំមមែ សប្តស័ក ព.ស២៥៥៩ ត្រូវនិងថ្ងៃអាទិត្យ ទី ១៥ ខែ វិច្ឆិកា ឆ្នាំ ២០១៥ ត្រូវបានធ្វើការដង្ហែអង្គកឋិនទាន នាំយកនូវបច្ច័យ និង ស្បង់ជីវ័រ ទៅវេរប្រគេនព្រះសង្ឃគង់ចាំព្រះវស្សាអស់កាលត្រីមាស ក្នុងពុទ្ធសីមាវត្តជោរេនចេស្តា ក្នុងស្រុកជីក្រែង ខេត្តសៀមរាប។ ម្យ៉ាងទៀតអង្គកឋិនទានសាមគ្គី ដែលបានដង្ហែរយកមកវេរប្រគេនចំពោះព្រះសង្ឃក្នុងឱកាសនេះ មិនត្រឹមមានលក្ខណៈសមស្របតាមរដូវកាលប៉ុណ្ណោះទេ ព្រមទាំងសមពេលវេលា ដែលព្រះសង្ឃ គណៈកម្មការ អាចារ្យវត្ត រដ្ឋអំណាចមូលដ្ឋាន ពុទ្ធបរិស័ទចំណុះជើង វត្តជោរេនចេស្តា មានចិត្តជ្រះថ្លាមូលមតិជាឯកច្ឆ័ន ក្នុងការប្រមូលបច្ច័យយកមកសាងនូវសមទ្ធិផលក្នុងទីវត្តអារាមនេះ ។
លោក ឃឹម ប៊ុនសុង ក៏បានលើកឡើងការរស់ឡើងវិញនៃវិស័យព្រះពុទ្ធសាសនា រហូតមានការ អភិវឌ្ឍន៍នៅគ្រប់ទីវត្តអារាម ក្នុងព្រះរាជាណាចក្រកម្ពុជា ដោយស្មាតីថ្ងៃជ័យជំនះ ៧មករា១៩៧៩ ក្រោមកិច្ចដឹកនាំរបស់គណបក្សប្រជាជនកម្ពុជា និង ការដឹកនាំរបស់សម្តចតេជោ ហ៊ុន សែន នាយករដ្ឋមន្ត្រី បានធ្វើឲ្យវិស័យព្រះពុទ្ធសាសនា មានការអភិវឌ្ឍន៍រីកចម្រើននៅទូទាំងប្រទេស ក្រោមគោលនយោបាយឈ្នះៗ និង យុទ្ធសាស្ត្រចតុកោណរបស់រាជរដ្ឋាភិបាល បានធ្វើឲ្យប្រទេសជាតិទាំងមូលទទួលបាននូវសុខសន្តិភាពពេញលេញ និង ធ្វើឲ្យបងប្អូនពុទ្ធបរិស័ទខ្មែរយើង នៅគ្រប់មជ្ឈដ្ឋានបានធ្វើបុណ្យទាន ពិសេសបុណ្យអង្គកឋិនទានដែល បានដង្ហែរនាំមកកាន់វត្តជោរេនចេស្តានេះ ។ លោក ឃឹម ប៊ុនសុង ក៏បានបញ្ជាក់ថា ទីវត្តអារាមនេះហើយ ដែលជាថ្នាល់បណ្តុះ បណ្តាល និង ជាជង្រុកនៃគ្រឹះវប្បធម៌ និង អក្សរសាសស្ត្រខ្មែរយើង នាសម័យដើម ។ ក្នុងនោះលោកក៏បានធ្វើការណែនាំមួយចំនួនដល់ព្រះសង្ឃ គណៈកម្មការ អាចារ្យវត្ត ត្រូវធ្វើការអភិវឌ្ឍន៍ក្នុងទីវត្តនេះ ឲ្យកាន់តែមាន សោភណ្ឌភាព ពីព្រោះថាព្រះពុទ្ធសាសនាបានកំពុងទាក់ទាញអារម្មណ៍ភ្ញៀវទេសចរណ៍ ចូលមកទស្សនាកម្សាន្ត ទៀតផង ។ ម្យ៉ាងទៀតដើម្បីអភិវឌ្ឍន៍វត្តអារាមឲ្យមានការរីកចម្រើនទៅបាន ទាំងព្រះសង្ឃ គណៈកម្មការ អាចារ្យវត្ត និង ពុទ្ធបរិស័ទចំណុះជើងវត្ត ត្រូវស្វែងរកនូវបច្ច័យ តាមរយៈការធ្វើបុណ្យផ្កាប្រាក់ និងទំនាក់ទំនងសប្បុរសជន ជិតឆ្ងាយ ក្នុងការប្រមូលផ្តុំបច្ច័យ ដើម្បីកសាងសមទ្ធិផល ព្រះវិហារថ្មីក្នុងវត្តនេះ ។ លោកក៏បានថ្លែងអំណរគុណ ដល់បងប្អូនពុទ្ធបរិស័ទ ប្រជាពលរដ្ឋចំណុះជើងវត្ត ដែលបានចូលរួមដង្ហែរអង្គកឋិន សូមឲ្យទទួលបាននូវមគ្គផល កុសលផលបុណ្យ ដែលកើតចេញឡើងពី អង្គកឋិនទាននាថ្ងៃនេះផងដែរ ។
ផ្តើមចេញពីអង្គកឋិនទាននេះ បច្ច័យដែលប្រមូលបានពីការចូលរួមចាប់មគ្គផល របស់ឯកឧត្តម លោកឧកញ៉ា លោកជំទាវ អស់លោក លោកស្រី សប្បុរសជនគ្រប់មជ្ឈដ្ឋាននិងពុទ្ធបរិស័ទចំណុះជើងវត្ត ក្នុងនោះបច្ច័យសង្កត់ត្រ័យរបស់លោក ឃឹម ប៊ុនសុង និង លោកជំទាវ មានចំនួន(៤៣៣០៨ដុល្លា) និង បច្ច័យសង្កត់ ត្រ័យ របស់បងប្អូនពុទ្ធបរិស័ទចំណុះជើងវត្ត ចំនួន (២២៨៣១ដុល្លា) សរុបរួមចំនួន(៦៦១៣៩ដុល្លា) ត្រូវបានវេរប្រគេនព្រះសង្ឃទៅតាម ប្រពៃណី ទំនៀមទម្លាប់នៃព្រះពុទ្ធ សាសនា ដើម្បីយកទៅប្រើប្រាស់ ក្នុងការកសាងសមទិ្ធផលព្រះវិហារថ្មីក្នុងវត្តជោរេនចេស្តា ក្នុងទិសដៅជម្រុញឲ្យវិស័យព្រះពុទ្ធសាសនា ដែលជាសាសនារបស់រដ្ឋ មានការអភិវឌ្ឍន៍ រីកចម្រើនទៅថ្ងៃអនាគត ៕
វេហាស៍
