កំពង់ធំៈ ល្បែងស៊ីសងបៀរ អាប៉ោង និងការចាក់កន្ទុយលេខ កំពុងតែលក់ដូចផ្សាត្រី បង្ករឲ្យមានការ ព្រួយបារម្ភណ៍ យ៉ាងខ្លាំងចំពោះសកម្មភាពនូវល្បែងស៊ីសងទាំងនេះ ដែលអាចឈានទៅដល់ការទាស់ទែងគ្រួសារ និងចោរលួចចោប្លន់ ខណៈពេលដែលប្រមុខរាជរដ្ឋាភិបាល កំពុងតែយកចិត្តទុកដាក់ ពីសុវត្តិភាពរបស់ប្រជាពលរដ្ឋ ថែមទាំងដាក់ បទបញ្ជាឲ្យលុបបំបាត់ទាំងស្រុង នូវល្បែងស៊ីសងគ្រប់ប្រភេទ និងជម្រុញឲ្យកងកម្លាំង មន្ត្រីរាជការ ប្រជាពលរដ្ឋ ចូលរួមគោរពនូវគោលនយោបាយភូមិឃុំមានសុវត្តិភាពទាំង៩ចំនុច។
ក្នុងនោះមានប្រជាពលរដ្ឋជាច្រើន បានសំណូមពរ តាមរយះស្នងការដ្ឋាននគរបាល ខេត្តកំពង់ធំ និងគណៈបញ្ជាការ ឯកភាពស្រុកសណ្តាន់ ក៏ដូចជាអធិការដ្ឋាននគរបាលស្រុកសណ្តាន់ ឲ្យជួយទប់ស្កាត់នូវល្បែងស៊ីសង និងការផ្សងសំណាងដោយចាក់កន្ទុយលេខ ដែលកំពុងតែបង្វក់ស្មារតី ប្រជាពលរដ្ឋ ស្ថិតនៅភូមិ ខោស ឃុំ ទំរីង ស្រុកសណ្តាន់ ខេត្តកំពង់ធំ យ៉ាងគគ្រឹកគ្រេង និងពុំមានការគោរពច្បាប់បន្តិចឡើយ នឹងសំណូមពរឲ្យប៉ុស្តិ៍រដ្ឋបាលឃុំទំរីង ជួយទប់ស្កាត់ការលេងល្បែងស៊ីសង និងការលេងកន្ទុយលេខ ខណៈពេលដែលមាន មេឆ្នោតដ៏ល្បីចំនួន៣នាក់ កំពុងតែយក ឃុំទំរីងធ្វើជាទីតាំងចាក់កន្ទុយលេខ ទី១ ចែម៉ៅ ទី២ ចាន់ ធឿន ទី៣ តានំប៉ាវ បុគ្គលទាំង៣នាក់នេះជាអ្នកលក់កន្ទុយ លេខដ៏សកម្មតែពុំត្រូវបាន បង្ក្រាបនោះឡើយ ។
ជាក់ស្តែងថ្មីៗនេះ សកម្មភាពលក់កន្ទុយលេខ ត្រូវបានចែម៉ៅ ដើរលក់តាមហាងគុយទាវ ហាងកាហ្វេ និងភោជនីយ៍ដ្ឋាន ក្នុងបរិវេណភូមិខោស នៃផ្សារទំរីងយ៉ាងរំភើយ ទោះជាសមត្ថកិច្ចនៅអង្គុយចំពីមុខក្តី ក៏មេឆ្នោតដ៏ល្បីនេះ ហាក់បី ដូចជាពុំមានការភ្ញាក់ផ្អើល ឬមានព្រឹត្តិកម្មបន្តិចឡើយ មិនតែប៉ុណ្ណោះមេឆ្នោតត្រូវបានលាតត្រដាងលក់ដូចទំនិញ សកម្មភាពនេះ បានធ្វើឲ្យមហាជន មានការសង្ស័យថា ប្រហែលជាត្រូវរ៉ូវគ្នាអស់ហើយ បានជាអាចលក់បានដោយរលូននិងពុំមានការខ្លាចញញើតពីច្បាប់ឡើយ ខណៈពេលដែលប្រមុខរាជរដ្ឋាភិបាល កំពុងតែពង្រឹងនិងរឹតបន្តឹងមិន ឲ្យមានល្បែងស៊ីសងគ្រប់ប្រភេ នៅតាមមូលដ្ឋាន ។
ដោយ ប៊ុន រដ្ឋា