សៀមរាប ៖ កម្លាំងនគរបាលចរាចរខេត្តសៀមរាប នៅព្រឹកថ្ងៃទី១ ខែមករា ឆ្នាំ២០១៦នេះបានចុះពង្រឹង និងការរឹតបន្តឹងនូវច្បាប់ចរាចរណ៍ថ្មីឲ្យកាន់ប្រសើរឡើង ខណៈនៅខេត្តសៀមរាបនាឆ្នាំ២០១៥កន្លងទៅនេះ មានការគ្រោះថ្នាក់ចរាចរណ៍ថយចុះជាង៣០ករណីបើធៀបទៅនឹងឆ្នាំ២០១៤។ បានឲ្យដឹងនៅព្រឹកថ្ងៃទី១ ខែមករានេះ លោកវរសេនីយ៍ទោ ជឹម សុវណ្ណ នាយការិយាល័យនគរបាលចរាចរណ៍ផ្លូវគោក នៃស្នងការដ្ឋានខេត្តសៀមរាបបានឲ្យដឹងថា នៅថ្ងៃទី០១ដើមឆ្នាំ២០១៦នេះកម្លាំងនគរបាលចរាចរណ៍ នៃស្នងការដ្ឋានខេត្តសៀមរាបមានធ្វើការចុះពង្រឹងច្បាប់ចរាចរណ៍ថ្មីនេះចំនួនពីរគោលដៅ។ គោលដៅទី១ គឺមានការសហការជាមួយយុវជនកាកបាទក្រហម និងយុវជនកាយរិទ្ធ និងនិស្សិតអាហាររូបករណ៍របស់សម្តេចតេជោ បាននាំចុះផ្សព្វផ្សាយ នៅតាមភ្លើងស្តុបចំនួន៣កន្លែងក្នុងក្រុងសៀមរាប ដោយបានចែកខិតប័ណ្ណផ្សព្វផ្សាយអប់រំដល់អ្នកធ្វើដំណើរ។ និងទី២គឺធ្វើនៅភាគខាងកើតនៃក្រុងសៀមរាបនៅតាមបណ្តោយផ្លូវជាតិលេខ៦ម្តុំហាងអាបូឡូប្លាស្សា ក្នុងនោះក៏បានធ្វើការអប់រំ ស្តីពីច្បាប់ថ្មីនិងអនុវត្តន៍ច្បាប់ចាស់បន្ថែមទៀត។ លោកបន្ថែមថា ចំពោះការផាកពិន័យ គឺកម្លាំងនគរបាលមិនផាកយកលុយហើយសរសេរវិក្កយបត្រដូចមុននោះទេគឺសរសេរវិក្កយបត្រឲ្យពួកគាត់ទៅបង់ប្រាក់ដោយខ្លួនឯង។ លោកបានបញ្ជាក់ថា នាឆ្នាំ២០១៥កន្លងទៅនេះនៅខេត្តសៀមរាបគ្រោះថ្នាក់ចរាចរណ៍មានការថយចុះចំនួនជាង៣០ករណីនេះបើធៀបទៅនឹងឆ្នាំ២០១៥។ ជាមួយនឹងការរឹតបន្តឹងនូវច្បាប់ចរាចរណ៍នេះដែរពលរដ្ឋ មានការសាទរទៅនឹងចំណាត់ការនេះណាស់ដោយសារតែច្បាប់នេះនឹងអាចធ្វើឲ្យពលរដ្ឋនាំគោរព និងមានការថយចុះបន្ថែមទៀតចំពោះករណីគ្រោះថ្នាក់ចរាចរ ព្រោះសព្វថ្ងៃនេះគាត់ឃើញករណីគ្រោះថ្នាក់ចរាចរណ៍សម័យនេះឆៅៗពេក។ ទាក់ទិនទៅនឹងការចុះអនុវត្តន៍ច្បាប់ចរាចរណ៍រប់សមត្ថកិច្ចនេះ ដែរលោក សួស ណារិន អ្នកសើបអង្កេតសិទ្ធមនុស្ស នៃគមនាគមន៍អាដហុកប្រចាំខេត្តសៀមរាបបានថ្លែងថា លោកមានការគាំទ្រយ៉ាងពេញទំហឹងទៅ និងចំណាត់ការរបស់ប៉ូលិស។តែលោកស្នើឲ្យការចុះអនុវត្តន៍នោះមានភាពស្មើៗគ្នាមិនមានលម្អៀង។ លោកបន្ថែមថា ចំពោះរឿងរថយន្តពាក់ស្លាកលេខ ខ.ម, ន.ប ឬត្រេអ៊ីនោះគឺខាងសមត្ថកិច្ចនិងគយត្រូវតែបង្កើនការត្រួតពិនិត្យថែមទៀត ព្រោះអីនៅខេត្តសៀមរាបគេឃើញមានរថយន្តប្រភេទនេះកើតមានច្រើន តែគេមិនដឹងថា ជារថយន្តស្របច្បាប់ឬយ៉ាងណា?។ គួរកត់សម្គាល់ផងដែរថា ប្រមុខនៃរាជរដ្ឋាភិបាលកម្ពុជាធ្លាប់បានមានប្រសាសន៍សង្កត់ធ្ងន់ទៅបញ្ហារថយន្តស្លាកលេខខ.ម,ន.ប,ត្រេអ៊ីនេះផងដែរ តែគេសង្កេតឃើញថា នៅខេត្តសៀមរាបហាក់មានភាពធូរលុងនៅឡើយគេសង្ស័យសមត្ថកិច្ចទាំងនោះជាប់ត្រគាកអស់ហើយ៕