ខេត្តប៉ៃលិន៖ ក្នុងបរិវេណវត្តសន្តិមារាម ហៅវត្តអូរច្រានាព្រឹកថ្ងៃទី២ ខែធ្នូ ឆ្នាំ២០១៦ មានប្រារព្វពិធីបួងសួង និងសកម្មភាពដើម្បីកុមារ ក្រោមប្រធានបទ«បញ្ឈប់អំពើហិង្សាលើកុមារ» ក្រោមអធិបតីភាពលោកស្រី ជា លាភ អភិបាលរងនៃគណៈអភិបាលខេត្តប៉ៃលិន និងមានការអញ្ជើញចូលរួមពីព្រះគ្រូរតនមុនី ចាន់ គង់ ព្រះមេគណខេត្តប៉ៃលិន ,ព្រះគ្រូសុធារោ សាន់ លី ព្រះមេគណគណៈធម្មយុត្តខេត្តប៉ៃលិន ,លោកស្រី ស៊ុំ ហៀង ប្រធានសភាពាណិជ្ជកម្មខេត្តប៉ៃលិន ,លោក នួន សាវុធ ទីប្រឹក្សាសម្តេចសង្ឃ នន្ទ ង៉ែត និងជាទីប្រឹក្សាសាលាគណ ,លោក ឌឹម គឹម ប្រធានមន្ទីរសាធារណៈការខេត្ត ,លោក លោកស្រីប្រធានមន្ទីរអភិវឌ្ឍន៏ជនបទខេត្ត ,លោកស្រីអនុប្រធានមន្ទីរសង្គមកិច្ចខេត្ត ,ព្រមទាំងលោកចៅសង្កាត់ លោកមេភូមិ លោកគ្រូ អ្នកគ្រូ សិស្សានុសិស្ស សរុប៣៣៤នាក់ ។
បន្ទាប់ពីស្តាប់របាយការណ៏របស់នាយិកាសាលាបឋមសិក្សាហ៊ុន សែន អូរច្រា និងប្រសាសន៏របស់លោកស្រី ប៊ុន គឹមហេង អនុប្រធានមន្ទីរសង្គមកិច្ចរួចមក តំណាងសិស្សានុសិស្សបានឡើងប្តេជ្ញាចិត្តដោយធ្វើជាពលរដ្ឋល្អ សិស្សល្អ កូនល្អក្នុងសង្គមនិងធ្វើជាមនុស្សដែលសង្គមត្រួវការ និងជាសរសរទ្រូងនៃប្រទេសជាតិ។ ប្តេជ្ញាខិតខំប្រឹងប្រែង និងមានភាពស្និតស្នាលជាមួយសិស្សានុសិស្សក្នុងថ្នាក់ឲ្យបានល្អប្រសើរ និងនិយាយថាទេចំពោះគ្រឿងញៀន , ព្រមទាំងសំណូមពរឲ្យលោកគ្រូ អ្នកគ្រូ ស្រឡាញសិស្សានុសិស្សនិងអប់រំដោយមិនប្រើអំពើហិង្សាគ្រប់បែបយ៉ាងលើសិស្សានុសិស្ស , សូមឲ្យលោកឪពុកអ្នកម្តាយគ្រប់រូប បញ្ឍប់ឲ្យបាននូវការប្រើអំពើហិង្សាលើកុមារ ទបស្តាត់នូវការជួញដូរគ្រឿងញៀន ការជួញដូរកុមារ ជាដើម។ល។
ឆ្លៀតក្នុងឪកាសនោះដែរ លោកស្រី ជា លាភ អភិបាលរងនៃគណៈអភិបាលខេត្តប៉ៃលិន តំណាងលោក កើត សុធា អភិបាលនៃគណៈអភិបាលខេត្តប៉ៃលិន បានចូលរួមត្រេកអរ និងយល់ព្រមតាមសំណើររបស់សិស្សានុសិស្ស ដែលឡើងប្តេជ្ញា ហើយលោកស្រីអភិបាលរង បានមានប្រសាសន៏ថា៖ យើងឃើញហើយថាអំពើហិង្សា តែងកើតមានឡើងនៅក្នុងសហគមន៏យើង ក្នុងគ្រួសារយើង ពិសេសទៅលើកុមារ ព្រមទាំងសំណូមពរឲ្យលោកឪពុក អ្នកម្តាយចូលរួមទាំងអស់គ្នាដើម្បីអភិវឌ្ឍន៏សង្គមជាតិ និងគ្រួសាររបស់យើង ហើមិនត្រួវប្រើអំពើហិង្សាលើកុមារនោះទេ ។ លោកស្រីអភិបាលរងបន្តថា៖ អំពើហិង្សាអាចកើតមាននៅលើគ្រួសារពីប្តីវាយប្រពន្ធ ឬប្រពន្ធវាយប្តី ពិសេសការវាយទៅលើកុមារជាដើម ដូច្នោះយើងត្រួវបញ្ឍប់ឲ្យបាននូវការប្រើអំពើហិង្សាលើកុមារគ្រប់រូបភាពទាំងអស់ លោកស្រីអភិបាលរងបញ្ជាក់ថា ប្រសិនបើគ្រួសារមួយ ដែលប្តីឬប្រពន្ធញៀនល្បែងស៊ីសង ស្រវឹងគ្នានថ្ងៃសំរាក់ ឬជាគ្រួសារដែលប្រើប្រាស់គ្រឿងញៀន វាអាចកើតឡើងនូវអំពើហិង្សាជាក់ជាមិនខាន ដូច្នោះយើងទាំងអស់គ្នាជៀសឲ្យឆ្ងាយពីគ្រឿងញៀនទាំងនោះឲ្យបាន ដើម្បីចូលរួមអភិវឌ្ឍន៏ប្រទេសជាតិយើង គ្រួសារយើង សហគមន៏យើងឲ្យមានការរីកចំរើននៅក្នុងតំបន់ ក៏ដូចពិភពលោក ព្រមទាំងនិយាយថាទេចំពោះគ្រឿងញៀន ។ ជាចុងបញ្ជាប់ក៏មានការចែកនូវអំណោយជូនដល់លោកគ្រូ អ្នកគ្រូ សិស្សានុសិស្ស នូវសៀវភៅ ប៊ិច និងថវិកាមួយចំនួនផងដែរ៕