កំពង់ធំៈ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងលោក ព្រឹម រដ្ឋា អភិបាលស្រុកស្ទោង បានប្រជុំពង្រឹងគុណភាព ប្រជាការពារនៅក្នុងឃុំបន្ទាយស្ទោង ស្រុកស្ទោង ខេត្តកំពង់ធំ ដើម្បីពង្រឹងសុវត្តិភាព ក៏ដូចជាការផ្សព្វផ្សាយគោលនយោបាយភូមិ ឃុំមានសុវត្តិភាព របស់រាជរដ្ឋាភិបាល និងបានបំពាក់វិទ្យុទាក់ទង ចំនួន១៥គ្រឿង ជូនដល់១៥ភូមិ ស្ថិតនៅក្នុងឃុំបន្ទាយស្ទោងនៅរសៀលថ្ងៃទី ៣ ខែមករា ឆ្នាំ ២០១៦។
លោក ព្រឹម រដ្ឋា អភិបាលស្រុកស្ទោង បានមានប្រសាសន៍ ផ្តាំផ្ញើរដល់មេភូមិ មេឃុំ ឲ្យយកចិត្តទុកដាក់ លើ ប្រជាពលរដ្ឋ ដើម្បីឲ្យប្រជាពលរដ្ឋទទួលបាននូវភាពកក់ក្តៅ មានសុវត្តិភាពល្អ និងមានទំនុកចិត្តលើអាជ្ញាធរ ដែលមានប្រជាការពារជាអ្នកសេនាធិការ ជួយដល់កម្លាំងសមត្ថកិច្ច ដូច្នេះក៏សូមឲ្យប្រជាការពារទាំងអស់ ខិតខំសហការជាមួយសមត្ថកិច្ចការពារប្រជាពលរដ្ឋ ឲ្យរស់នៅបានសុខសប្បាយ មានសុវត្តិភាពគ្រប់គ្រាន់ ក្នុងកិច្ចការពារនៅក្នុងមូលដ្ឋាន ជាពិសេសប្រជាការពារមិនត្រូវ ធ្វើអ្វីឲ្យប្រជាពលរដ្ឋខ្លាចនោះទេ និងអនុវត្ត ខុសច្បាប់ដោយខ្លួនឯងនោះទេ ត្រូវតែគោរពតាមច្បាប់ព្រះរាជាណាចក្រទាំងអស់ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ កោតសរសើរចំពោះការខិតខំប្រឹងប្រែងរបស់ប្រជាការពារ ដែលបានការពារសុខសុវត្តិភាពជូនប្រជាពលរដ្ឋ ទោះជាមិនមានប្រាក់ខែរក្តី តែនេះគឺជាការស្ម័គ្រចិត្តរបស់ ប្រជាការពារ ដែលស្រឡាញ់ភាពសុខសាន្ត នេះគឺជាទឹកចិត្តដ៏ល្អរបស់បងយុទ្ធជនប្រជាការពារ មិនតែប៉ុណ្ណោះប្រជាការពារជាសរសសៃរឈាមរបស់ភូមិឃុំ ប្រជាការពារជារបងការពារសុវត្តិភាពរបស់ប្រជាពលរដ្ឋនៅក្នុងភូមិដ្ឋាន ដែលបានជួយកិច្ចការសង្គមជាច្រើន ក្នុងកិច្ចការពារ និងអនុវត្តភគោលនយោបាយភូមិឃុំមានសុវត្តិភាព ក្នុងនោះឯកឧត្តម បានបំពាក់វិទ្យុទាក់ទង ចំនួន ១៥គ្រឿង ដល់ប្រជាការពារ១៥ភូមិ ដើម្បីជាឧបករណ៍ជំនួយកិច្ចការ សុវត្តិភាព ដើម្បីធ្វើការទំនាក់ទំនងមកសមត្ថកិច្ចក្នុងកិច្ចការចាំបាច់ ក្នុងនោះក៏បានផ្តាំផ្ញើរដល់ប្រជាការពារទាំងអស់ រក្សានូវសណ្តាប់ធ្នាប់ ឯសណ្ឋាន និងឧបករណ៍ប្រើប្រាស់ និងសំណូមពរមិនឲ្យពាក់ឯកសណ្ឋានដែលជា ខ.រ.ម ឬផ្លាកសញ្ញា កម្លាំង ដែលនាំឲ្យខុសនឹងច្បាប់ ខុសពីតួនាទីរបស់ខ្លួន ។
ដោយ ប៊ុន រដ្ឋា
