ខេត្តកំពង់ឆ្នាំង៖ ម៉ូតូហុងដាឌ្រីម សេរី០១៥មួយគ្រឿងត្រូវបាន ពួកចោរលួចកាច់ក យកទៅបាត់ដោយសុវត្ថិភាព ពីក្រោមដើមស្វាយជាប់ការិយាល័យរដ្ឋបាលមន្ទីរពេទ្យបង្អែកខេត្តកំពង់ឆ្នាំង នៅពេល ម្ចាស់ម៉ូតូ ជាប់រវល់យករថយន្តសង្គ្រោះរបស់មន្ទីរពេទ្យខេត្តទៅប៉ះកង់នៅផ្សារ ករណីនេះបានកើតឡើងនៅវេលាម៉ោង ៩និង៤៥នាទីព្រឹក ថ្ងៃទី០៤ ខែមករា ឆ្នាំ២០១៦ ក្នុងមន្ទីរពេទ្យខេត្ត ស្ថិតនៅក្នុងភូមិកណ្តាលសង្កាត់កំពង់ឆ្នាំង ក្រុងកំពង់ឆ្នាំង។
ប្រភពព័ត៌មានពីក្នុងមន្ទីរពេទ្យខេត្តបានអោយដឹងថា៖ បុរសជាម្ចាស់ម៉ូតូខាងលើមានឈ្មោះ មាន វណ្ណៈ លោកជាអ្នកបើករថយន្តសង្គ្រោះរបស់មន្ទីរពេទ្យបង្អែកខេត្ត ។ មុនពេលកើតហេតុ ម្ចាស់ម៉ូតូបានជិៈ ម៉ូតូរបស់ខ្លួនម៉ាកហុងដាសេរី២០១៥ ពណ៌ខ្មៅ ពាក់ស្លាកលេខកំពង់ឆ្នាំង 1D.3998 យកមកទុកចាក់សោរកជាប់ នៅក្រោមដើមស្វាយ ខាងត្បូងអាគាររដ្ឋបា របស់មន្ទីរពេទ្យ ហើយបានបើករថយន្តសង្គ្រោះមន្ទីរពេទ្យចេញទៅប៉ះកង់ លុះពេលត្រឡប់មកវិញ ស្រាប់តែបាត់ម៉ូតូធ្វើអោយមានការឆោរឡោតែម្តង។
តាមសាក្សីជាអ្នកគ្រូពេទ្យម្នាក់បានប្រាប់សមត្ថកិច្ចអោយដឹងថា៖ មុនពេលមានការឆោរឡោបាត់ម៉ូតូ គាត់បានឃើញមនុស្សចម្លែក៣នាក់អង្គុយនៅលើបង់ថ្ម ក្រោមដើមអំពិល មុខអាគាររដ្ឋបាល តែគាត់មិនចាប់អារម្មណ៍នោះទេ ស្មានតែបងប្អូនអ្នកជម្ងឺ មកសម្រាកនៅទីនោះ ស្រាប់តែពេលឆោរឡោបាត់ម៉ូតូ ក៏ស្រាប់តែបាត់មនុស្សទាំងនោះដែរ ។
ប្រជាពលរដ្ឋបានលើកឡើងថា៖ នៅក្នុងមន្ទីរពេទ្យខេត្ត ធ្លាប់បាត់ទ្រព្យសម្បត្តិ របស់អ្នកជម្ងឺញឹកញាប់ណាស់ដូចជាទូរសព្ទ័ដៃ កាបូបលុយជាដើមនៅពេលយប់ ព្រោះមានជនខិលខូចបន្លំធ្វើជាបងប្អូនអ្នកជម្ងឺចូលក្នុងមន្ទីរពេទ្យខេត្ត ហើយបន្លំលួចទ្រព្យសម្បត្តិរបស់អ្នកជម្ងឺមិនដែលចាប់ចោរទាំហនោះបានឡើយ។ ប្រជាពលរដ្ឋជាអ្នកជម្ងឺបានលើកឡើងថា មន្ទីរពេទ្យខេត្តគួរតែមានសន្តិសុខ សម្រាប់យាមកាម ការពារទើបមានសណ្តាប់ធ្នាប់សន្តិសុខល្អប្រសើរ ៕