កំពតៈ អភិបាលខេត្តកំពកបានមានប្រសាសន៍ អំពាវនាវផ្តាំផ្ញើដល់ថ្នាក់ដឹកនាំបណ្តាមន្ទីរ ពិសេសមន្ទីរពាក់ព័ន្ធត្រូវបង្កើនការចូលរួមយកចិត្តទុកដាក់ជំរុញផ្សព្វផ្សាយណែនាំដល់មន្ត្រីរាជការក្រោមឱវាទនិងប្រជាពលរដ្ឋអោយខ្លាំងក្លាជាប្រចាំចំពោះការអនុវត្តច្បាប់ចរាចរណ៍ផ្លូវគោកថ្មីដែលរដ្ឋសភាជាតិបានអនុម័តមានរយះពេលមួយឆ្នាំកន្លងមក ហើយត្រូវបានរាជរដ្ឋាភិបាល ក៏ដូចក្រសួងមហាផ្ទៃបានដាក់កំណត់អោយប្រជាពលរដ្ឋទូទៅប្រើប្រាស់នាដើមឆ្នាំ២០១៦ក្នុងគោលបំណងដើម្បីបង្ការ ទប់ស្កាត់ និងការកាត់បន្ថយគ្រោះថ្នាក់លើដងផ្លូវអោយមានប្រសិទ្ធភាព។ នៅក្នុងកិច្ចប្រជុំសាមញ្ញលើកទី២០អណត្តិទី២ របស់ក្រុមប្រឹក្សាខេត្ត ក្រោមវត្តមានគណអធិបតី ឯ.ឧ អ៉ឹង-ម៉េងហួរប្រធានក្រុមប្រឹក្សាខេត្តកាលពីថ្ងៃទី០៥ ខែ មករា ឆ្នាំ ២០១៦ នៅសាលាខេត្តកំពត។
ក្នុងនោះមានឯកឧត្តមជាប្រធាគណកម្មការសុវត្ថិចរាចរណ៍ផ្លូវគោកថ្នាក់ខេត្ត ឯកឧត្តមសូមអំពាវនាវនិងផ្តាំផ្ញើដល់ថ្នាក់ដឹកនាំនិងមន្ត្រីរាជការបណ្តាមន្ទីរ អង្គភាពទាំងអស់នៅក្នុងខេត្តត្រូវជំរុញការចូលរួមអនុវត្តច្បាប់ចរាចរណ៍ផ្លូវគោកទាំងអស់គ្នាអោយមានប្រសិទ្ធភាពព្រោះថាការអនុវត្តច្បាប់គឺផ្តើមចេញពីយើងទាំងអស់គ្នាដែលជាមន្ត្រីរាជការដែលមានកំរិតយល់ដឹងខ្ពស់ជាងប្រជាពលរដ្ឋហើយត្រូវធ្វើជាគំរូប្រជាពលរដ្ឋ ។ ដូច្នេះថ្នាក់ដឹកនាំមន្ទីរអង្គភាពខ្លួនឯងផ្ទាល់ រួមនិងមន្ត្រីក្រោមឱវាទទាំងអស់ត្រូវតែជំរុញក្នុងការពង្រឹងអនុវត្តច្បាប់ចរាចរណ៍ផ្លូវគោកនេះអោយបានគ្រប់ៗគ្នា ពិសេសការប្រើប្រាស់យានយន្តគ្រប់ប្រភេទនៅលើដងផ្លូវកប្បីទាំងអស់គ្នាត្រូវមានឯកសារគ្រប់គ្រាន់ដែលច្បាប់តម្រូវអោយមាន ហើយការបើកបរម៉ូតូឫុយានយន្តផ្សេងៗត្រូវតែចូលរួមគោរពទាំងអស់គ្នា នូវការពាក់មូកសុវត្ថិភាពការពារ និងប្រកបដោយសីលធ៌មដោយមិនត្រូវផ្តេកផ្តួលហេតុផលផ្សេងៗផ្ទុយពីច្បាប់ហាមឃាត់ឫុកំណត់អោយប្រើប្រាស់ឡើយ ។
ព្រោះបច្ចុប្បន្ននេះពិនិត្យជារួមសង្ខេតឃើញមានបញ្ហាគ្រោះថ្នាក់ចរាចរណ៍មានការកើនឡើងដែលយើងទាំងអស់គ្នានិងរាជរដ្ឋាភិបាលមានការព្រួយបារម្ភនិងបាននិងកំពង់យកចិត្តទុកដាក់យ៉ាងខ្លាំងក្លា។ បើទោះបីយ៉ាងណាសម្រាប់ការអនុវត្តច្បាប់ចរាចរណ៍ផ្លូវគោកថ្មីនៅក្នុងខេត្តកំពតក្នុងរយះពេលប៉ុន្មានថ្ងៃនេះឃើញថាប្រជាពលរដ្ឋមានការចូលរួមគោរពនិងយល់ដឹងភាគច្រើនដោយសង្កេតឃើញតាមរយះរបាយការណ៍តួលេខផាកពិន័យរបស់នគរបាលចរាចរណ៍មានការថយចុះជាបន្តបន្ទាប់។
ឯ.ឧ អ៉ឹង-ម៉េងហួរ ប្រធានក្រុមប្រឹក្សាខេត្តក៏បានថ្លែងការកោតសរសើរចំពោះគណអភិបាលខេត្ត មន្ទីរអង្គភាពជំនាញទាំងអស់ដែលបានយកចិត្តទុកដាក់រួមគ្នាអភិវឌ្ឍន៍ខេត្តនិងបំរើសេវាសាធារណៈ និងរដ្ឋបាលជូនប្រជាពលរដ្ឋបានល្អ ពិសេសក្នុងឱកាសចុងឆ្នាំនេះរដ្ឋបាលខេត្តបានរៀបចំពិធីបុណ្យសមុទ្រនិងបុណ្យឆ្លងឆ្នាំសកលបង្កការសប្បាយជូនប្រជាពលរដ្ឋក៏ដូចជាភ្ញៀវទេសចរណ៍ជាតិ អន្តរជាតិមកកម្សាន្តក្នុងខេត្តមានការកើនឡើងជាបន្តបន្ទាប់ដែលមានតួលេខរហូតប្រមាណ១លាន៧សែននាក់ផងដែរ ៕
