ខេត្តប៉ៃលិន៖ សមត្ថកិច្ចកងរាជអាវុធហត្ថខេត្តចំនួន៥នាក់ ដឹកនាំដោយលោក ថុល គឹមហ៊ឹង ព្រះរាជអាជ្ញារងខេត្តប៉ៃលិន បានចុះបង្ក្រាបទីតាំងលួចលាក់បើកលេងល្បែងអាប៉ោងដុះស្លែរមួយកន្លែងខាងត្បួងផ្សារប៉ាហ៊ី ដោយឃាត់ខ្លួនអ្នកញៀនល្បែងចំនួន៨នាក់ ប្រាក់១៦៩០០០រៀល ។ ហេតុការណខាងលើនេះ បានកើតឡើងកាលពីវេលាម៉ោង១២និង២០នាទីរសៀលថ្ងៃទី៦ ខែមករា ឆ្នាំ២០១៦ ស្ថិតនៅខាងត្បូងផ្សារសាមគ្គីហៅផ្សារប៉ាហ៊ី ក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ អ្នកញៀនល្បែងដែលសមត្ថកិច្ចឃាត់ខ្លួនទី១.ឈ្មោះ ប៊ុត ស៊ីយ៉ាន ភរទប្រុស អាយុ៤៧ឆ្នាំ ជាម្ចាស់ផ្ទះ ទី២.ឈ្មោះ សុខ តាំ ភេទប្រុស អាយុ៤៤ឆ្នាំ ,ទី៣.ឈ្មោះ ម៉ាន រ៉គីប ភេទប្រុស អាយុ៣៩ឆ្នាំ,ទី៤.ឈ្មោះ អី សុគន្ធី ភេទប្រុស អាយុ៤៦ឆ្នាំ ,ទី៥.ឈ្មោះ វ៉ាន់ អឹម ភេទប្រុស អាយុ ៤៣ឆ្នាំ,ទី៦.ឈ្មោះ លី ស្មាន ភេទប្រុស អាយុ៦៤ឆ្នាំ ,ទី៧.ឈ្មោះ សេង ចេក ភេទប្រុស អាយុ៣២ឆ្នាំនិងទី៨.ឈ្មោះ គឹម សុខថៃ ភេទប្រុស អាយុ៣១ឆ្នាំ ទាំងអស់រស់នៅក្នុងក្រុងប៉ៃលិន ខេត្តប៉ៃលិន ។
ប្រភពព័ត៌មានពីកន្លែងកើតហេតុបានឲ្យដឹងថា៖ ទីតាំងបើកលេងល្បែងខាងលើ មានជាយូរមកហើយដោយពុំមានសមត្ថកិច្ចណាហ៊ានបង្ក្រាបនោះទេ ដោយពេលខ្លះគេឃើញមាននរគបាលមានសំលៀកបំពាក់ស៊ីវិលចូលលេងផងដែរ ចំណែកម្ចាស់ផ្ទះក៏មានការបង់ប្រាក់ខែជាប្រចាំឲ្យសមត្ថកិច្ច ដោយមានការឃុបឃិតគ្នាតាំងពីក្រោមដល់លើ ។ ប្រភពព័ត៌មានបន្តថា៖ ដោយមានការបង់ប្រាក់ជាប្រចាំដូច្នោះទើបម្ចាស់ផ្ទះ ក៏ដូចអ្នកញៀនល្បែងទាំងនោះមិនខ្លាចនិងលេង ,មានអ្នកញៀនល្បែងខ្លះចាញ់រាប់ម៉ឺនរៀល ខ្លះទៀតយកម៉ូតូទៅបញ្ចាំគេ ដើម្បីបានលុយយកមកលេង ហើយខ្លះទៀតមានខ្លីគ្នាបង្វិល អាចនិងមានការទាស់ទេងពាក្យសម្តីគ្នាបន្តិចបន្តួចផងដែរ ។ ប្រភពព័ត៌មានបន្តទៀតថា៖ នៅថ្ងៃកើតហេតុប្រជាពលរដ្ឋមានការត្រេកអរយ៉ាងខ្លាំងដែលសមត្ថកិច្ចកងរាជអាវុធហត្ថខេត្ត បានចុះទៅបង្ក្រាបព្រមទាំងឃាត់ខ្លួនអ្នកញៀនល្បែងទាំងនោះ ។
លោក នង វណ្ណី ប្រធានមន្ទីរស្រាវជ្រាវនិងយុត្តិធម៌ នៃទីបញ្ជាការកងរាជអាវុធហត្ថខេត្តប៉ៃលិន បានឲ្យដឹងថា៖ ដោយមានបញ្ជារពីលោក ថុល គឹមហ៊ឹង ព្រះរាជអាជ្ញារងខេត្តប៉ៃលិន លោកបានដឹកនាំកម្លាំងចំនួន៥នាក់ ចុះបង្ក្រាបទីតាំងកន្លែងហាងកាហ្វេ ដែលបើកលេងអាប៉ោងក្ដាប់ និងអប៉ោងបង្វិលខាងលើ ព្រមទាំងធ្វើការឃាត់ខ្លួនអ្នកញៀនល្បែងចំនួន៨នាក់ ព្រមទាំងរិបអួសបានចានអាប៉ោងចំនួនមួយ ,មេអាប៉ោងមួយ,កំរាលលេងបៀរចំនួនមួយ,សន្លឹកបៀរចំនួន៥២សន្លឹក(១ហ៊ូ) ,ទូរស័ព្ទចំនួន11គ្រឿង និងថវិកាចំនូន១៦៩០០០រៀល ។ លោកបន្តថា៖ បច្ចុប្បន្នអ្នកញៀនល្បែងអាប៉ោងខាងលើ សមត្ថកិច្ចជំនាញកំពុងរៀបចំសំណុំរឿងបញ្ជូនទៅតុលាការខេត្តប៉ៃលិន វេលាម៉ោង២និង០០នាទីរសៀលថ្ងៃទី ៧ខែមករា ឆ្នាំ២០១៦ នេះហើយ ៕
