កំពត ៖ សហប្រធានសហគមន៍អ្នកផលិតអំបិល ខេត្ត កំពត កែប លោក ប៊ុន បារាំង បានឲ្យដឹងថា បរិមាណអំបិលនៅឆ្នាំ ២០១៥នេះ នៅសល់ចំនួនជាង២០ម៉ឺនតោន រួមទាំងបរិមាណអំបិលដែលនៅសល់ពីឆ្នាំ២០១៤ចំនួន៩ម៉ឺនតោនផង។ បរិមាណអំបិលដែលនៅសល់នោះ គឺតិចជាងបរិមាណអំបិលដែលនៅសល់កាលពីឆមាសទី១ ឆ្នាំ២០១៥ ដែលមានរហូតដល់២៧ម៉ឺនតោន។បើតាមលោក ប៊ុន បារាំង បានឲ្យដឹងថា បរិមាណអំបិលដែលនៅសល់នោះ គឺបានថយចុះ ពីចំនួនដែលនៅសល់ ចំនួន២៧ម៉ឺនតោន នាពេលកន្លងមក បន្ទាប់ពីរដ្ឋាភិបាលបានលុបចោលពន្ធលើអារកបន្ថែម១០ភាគរយ ធ្វើឲ្យសហគមអ្នក ផលិតអំបិលអាចបញ្ចុះតម្លៃក្នុងការប្រកួតប្រជែងជាមួយអំបិលនាំចូលពី ក្រៅប្រទេស។
បើតាមលោក ប៊ុន បារាំង បានឲ្យដឹងថា នៅឆ្នាំ២០១៥នេះ សហគមន៍ផលិតអំបិលកំពត កែប ផលិតអំបិលបានសរុប ប្រមាណ១៧ម៉ឺនតោន។
សូមបញ្ជាក់ថា កន្លងមកអំបិលនាំចូលពីក្រៅប្រទេសបានវាយ លុកចូលទីផ្សារ អំបិលនៅប្រទេសកម្ពុជា ប្រមាណ៦០ភាគរយ ចំណែក អំបិលផលិតក្នុងស្រុក លក់ចូលក្នុងទីផ្សារ បានត្រឹមតែ៤០ ភាគរយ ប៉ុណ្ណោះ។
បើតាមលោកប៊ុន បារាំង ក្នុងឆ្នាំ២០១៤ បរិមាណអំបិលដែលនៅសល់ប្រមាណ៩ម៉ឺនតោន ហើយ គិតមកដល់ខែមិថុនា ឆ្នាំ២០១៥នេះ បរិមាណអំបិលដែលនៅសល់មិនអាចលក់ចេញបាន មានរហូតដល់ ប្រមាណ២៧ម៉ឺនតោនផលិត។
លោកប្រធានសហគមន៍អ្នកផលិតអំបិល បានឲ្យដឹងទៀតថា ទោះបីជាមានអន្តរាគមន៍របស់រដ្ឋាភិបាល ក្នុងការលុប ចោលពន្ធអារកបន្ថែម១០ភាគរយ ក៏ដោយ ក៏ការលក់អំបិលផលិតក្នុងស្រុកមានការប្រកួតប្រជែងយ៉ាងខ្លាំង ជាមួយអំបិលនាំចូលពីក្រៅប្រទេសដដែល ៕