កណ្តាល= នៅឯបញ្ជរបង់ប្រាក់កំបូល នាថ្ងៃទី០៦ ខែមករា ឆ្នាំ២០១៦ សង្កេតឃើញបុគ្គលិកនៃក្រុមហ៊ុន អេហ្សិត កំពុងមមាញឹកអនុវត្តទៅតាមសេចក្តីណែនាំរបស់រាជរដ្ឋាភិបាល អំពីការសម្រេចលើកលែងមិនយកប្រាក់ចំពោះប្រជាពលរដ្ឋ និងមន្ត្រីរាជការ ដែលធ្លាប់ទទួលបានការអនុគ្រោះតម្លៃ ១៨០០រៀល ចាប់ពីម៉ោង ០០:០០នាទី ថ្ងៃទី០៧ ខែមករា ឆ្នាំ២០១៦ តទៅ ក្នុងនោះសង្កេតឃើញមានដូចជា ការដាក់តាំងបង្ហាញនូវបដាលិខិតរបស់របស់ ក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណៈការ និងដឹកជញ្ជូនការចែកជូននូវច្បាប់ថតចម្លងលិខិត ក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណៈការ និងដឹកជញ្ជូន ដល់អ្នកបើកបររថយន្តគ្រប់ប្រភេទ ការរៀបចំទីស្នាក់ការចុះឈ្មោះសុំការលើកលែងមិនបង់ប្រាក់ សម្រាប់រថយន្តប្រជាពលរដ្ឋ និងមមមន្ត្រីរាជការរស់នៅតាមដងផ្លូវជាតិលេខ ៤ ដែលបានធ្វើដំណើរឆ្លងកាត់ញឹកញាប់ និងជាប្រចាំ ការចែកជូននូវពាក្យស្នើសុំលើកលែងការបង់សេវាប្រើប្រាស់ផ្លូវ។លោក ជួន វ៉ាន់ឌន តំណាងក្រុមហ៊ុន អេហ្សិត អ៊ិនវេសមេន បានបញ្ជាក់ឲ្យដឹងថា គិតត្រឹមម៉ោង ៥:៣០នាទីល្ងាច ថ្ងៃទី០៦ ខែមករា ឆ្នាំ២០១៦ មានប្រជាពលរដ្ឋ និងមន្ត្រីរាជការ មកស្នើសុំពាក្យលើកលែងសេវាប្រើប្រាស់ផ្លូវ ប្រមាណជាង ២០០នាក់ និងមានការដាក់ពាក្យជាបណ្តើរៗ ក្នុងនោះក៏បានចែកជូននូវលិខិតប្រកាសព័ត៌មាន ចំនួនប្រមាណ ៣០០០ច្បាប់ហើយ។
គួរបញ្ជាក់ផងដែរថា កាលពីម្សិលមិញ អនុលោមតាមស្មារតីអង្គប្រជុំរវាង ក្រសួងសេដ្ឋកិច្ច និងហិរញ្ញវត្ថុ ក្រសួងសាធារណៈការ និងដឹកជញ្ជូន ក្រសួងមហាផ្ទៃ និងក្រុមហ៊ុន អេហ្សិត អ៊ិនវេសមេន បានសម្រេចថាៈ បន្ទាប់ពីចេញសេចក្តីប្រកាស ឲ្យអនុវត្តការលើកលែងមិនយកកំរៃសេវាប្រើប្រាស់ផ្លូវចំពោះរថយន្តគ្រួសារ និងមន្ត្រីរាជការ មានទីលំនៅ នៅសងខាងផ្លូវជាតិលេខ ៤ ដែលធ្លាប់ទទួលបានការអនុគ្រោះតម្លៃពិសេស ១៨០០រៀល ចាប់ពីថ្ងៃទី០៧ ខែមករា ឆ្នាំ២០១៦ នាវេលាម៉ោង សូន្យ និងសូន្យ នាទី នេះតទៅ អង្គប្រជុំក៏បានសម្រេចអំពីរបៀបកំណត់អត្តសញ្ញាណរថយន្តអនុគ្រោះពុំបង់ថ្លៃសេវាប្រើប្រាស់ផ្លូវ តាមវិធីសាស្ត្រដែលមានស្រាប់ យកមកអនុវត្តបន្ត ចំពោះរថយន្តគ្រួសារ និងមន្ត្រីរាជការរស់នៅតាមដងផ្លូវជាតិលេខ ៤ ដែលធ្វើដំណើរញឹកញាប់ និងជាប្រចាំ ៕
