ភ្នំពេញ៖យុវជនពីរនាក់ជិះម៉ូតូឌុបគ្នាក្នុងល្បឿនលឿនបានជ្រុលចង្កូតទៅបុករថយន្តម៉ាកKIA បណ្ដាលឲ្យរងការខូចខាតទាំងសងខាង។ក្នុងហេតុការណ៍គ្រោះថ្នាក់ចរាចរណ៍ខាងលើនេះបានបង្កឲ្យមានការភ្ញាក់ផ្អើលដល់ប្រជាពលរដ្ឋដែលនៅក្បែរកន្លែងកើតហេតុ កាលពីវេលាម៉ោង១២និង៣០នាទីរំលងអាធ្រាត នៅចំណុចផ្លូវលេខ៥១ កែងផ្លូវ១៧៨ ស្ថិតក្នុងសង្កាត់ផ្សារថ្មី៣ ខណ្ឌដូនពេញ។
តាមសាក្សីដែលឃើញហេតុការណ៍គ្រោះថ្នាក់ចរាចរណ៍ខាងលើនេះបានឲ្យដឹងថា មុនពេលកើតហេតុគេសង្កេតឃើញយុវជនពីរនាក់ជិះម៉ូតូបង្កម៉ាកសង់ប៊ិច សេ១១០ ពណ៌ខ្មៅ ពាក់ស្លាកលេខភ្នំពេញ1BK.2921 ទិសដៅពីជើងទៅត្បួងតាមបណ្ដោយផ្លូវ៥១ ក្នុងល្បឿនលឿន ខណះមកដល់ចំណុចកើតហេតុក៏ជ្រុល
ទៅបុករថយន្តម៉ាកKIA ពណ៌ស ពាក់ស្លាកលេខភ្នំពេញ2AF.6946 ដែលបើកបរដោយភេទពី៣ មានគ្នា៤ទៅ៥នាក់ ទិសដៅពីលិចទៅកើត ដែលបញ្ច្រាស់ត្រង់ចំណុចផ្លូវកែងគ្នា បុកចំពីចហៀងមុខពេញទំហឹងបណ្ដាលឲ្យរថយន្តបែកស្ទុបផ្នែកខាងឆ្វេង រីឯម៉ូតូបង្កបានបែកកាបាំងផ្នែកខាងស្ដាំរងការខូចខាតទាំងសងខាង តែសំណាងល្អក្នុងហេតុការណ៍គ្រោះថ្នាក់ខាងលើនេះមិនបណ្ដាលឲ្យនរណាម្នាក់រងរបួសនោះទេ។
ក្រោយកើតហេតុភាគីទាំងសងខាងបានជជែកគ្នាទាំងតឹងសរសៃកដាក់គ្នាបង្កឲ្យមានប្រជាពលរដ្ឋដែលនៅក្បែរកន្លែងកើតហេតុឈរមើលព្រងព្រៀត ដោយពួកគាត់និយាយយកត្រូវរៀងខ្លួន។ ប្រហែលជាកន្លះម៉ោងក្រោយទើបមានសមត្ថកិច្ចមូលដ្ឋានចុះមកដល់កន្លែងកើតហេតុ ដោយសារតែរថយន្តនិងម៉ូតូខូចខាតដូចគ្នា ទើបពួកគេបានសម្របសម្រួលចែកផ្លូវគ្នារៀងៗខ្លួន ដោយមិនរំខានដល់សមត្ថកិច្ចឡើយ៕ដោយ៖ជីម ភារ៉ា
