ភ្នំពេញ៖ បុរសសុញគំនិតគិតខ្លីម្នាក់បានសំរេចចិត្តបញ្ចប់ជីវិតដោយលោតសំលាប់ខ្លួនពីលើស្ពានជ្រោយចង្វារ(ស្ពានចាស់) តែសំណាងល្អត្រូវក្រុមអ្នកនេសាទតាមទូកជួយសង្គ្រោះរួចផុតពីស្លាប់ បង្ករអោយមានការភ្ញាក់ផ្អើលកាលពីវេលាម៉ោង ៨.១៥ នាទីយប់ថ្ងៃទី១៤ខែមករាឆ្នាំ២០១៦ នៅលើស្ពានជ្រោយចង្វារស្ថិតក្នុងសង្កាត់ស្រះចក ខណ្ឌ័ដូនពេញ ។
បុរសដែលគិតខ្លីលោតសំលាប់ខ្លួននោះមានឈ្មោះ សុខ ភារម្យ ហៅ កក្តដា ភេទប្រុស អាយុ ២៥ឆ្នាំ មុខរបរបុគ្គលិកហាងលក់គ្រឿងអេឡិចត្រូនិច ម្តុំផ្សារអូឡាំពិក និងមានទីលំនៅ ភូមិបោះអង្កាញ់ សង្កាត់ព្រែកឯង ខណ្ឌ័ ច្បារអំពៅ ។
តាមសំដីរៀបរាប់ប្រាប់របស់ជនរងគ្រោះបានអោយដឹងថា មុនពេលកើតហេតុរូបគេបានជិះម៉ូតូមួយគ្រឿងម៉ាកហុងដាគុបជ្រុងសេ ៩០ ពណ៍ស្ករ ពាក់ស្លាកលេខភ្នំពេញ 1CC-2723 ទៅផឹកស្រាតែម្នាក់ឯងនៅក្នុងហាងមួយកន្លែងនៅត្រើយខាងកើត ដោយផឹកអស់ Anchor ចំនួន៥កំប៉ុង បន្ទាប់មកក៏ជិះត្រលប់មកវិញដល់លើស្ពានជ្រោយចង្វារ ក៏ឈប់ម៉ូតូរួចឡើងលើបង្កាន់ដៃស្ពានលោតចុះតែម្តងទៅ ។ ជនរងគ្រោះបានបន្តទៀតថា មូលហេតុដែលបណ្តាលអោយខ្លួនគិតខ្លីបែបនេះ គឺមកពីខ្លួនមានជំងឺប្រចាំកាយ និងវិបត្តិគ្រួសារបន្តុចបន្តួច ។
បើតាមសំដីរបស់អ្នកនេសាទបានអោយដឹងថា ក្នុងពេលដែលក្រុមខ្លួនកំពុងចែវទូកនេសាទ ក៏លឺសំលេងមនុស្សស្រែកអោយជួយ តែដោយសារទន្លេរងងឹតធ្វើអោយក្រុមខ្លួនមើលមិនឃើញមនុស្ស ក៏ចេះតែចែវទូករកប្រភពសំលេងនោះ ស្រាប់តែប្រទះឃើញបុរសរងគ្រោះ ក៏នាំគ្នាជួយស្រង់យកមកប្រគល់អោយប៉ូលីសការពារស្ពានគោលដៅទី៣ទៅ ។
ក្រោយពេលសាកសួរនាំជនរងគ្រោះហើយ ខាងកំលាំងសម្ថកិច្ចក៏បានទូរស័ព្ទហៅសាច់ញាត្តិអោយមកទទួលជនរងគ្រោះ និងបានអប់រំជនរងគ្រោះថ្ងៃក្រោយកុំអោយគិតខ្លីបែបនេះទៀត ៕
