ខេត្តសៀមរាប៖មន្ត្រីគយនិងរដ្ឋាករប្រចាំច្រកព្រលានយន្តហោះអន្តរជាតិខេត្តសៀមរាបបានធ្វើការឆែកឆេររកឃើញនូវ ទូរស័ព្ទម៉ាក iPhone 6s និង iPhone 6s Plus ជិត ៥០០គ្រឿងដោយគ្មានច្បាប់ទម្លាប់ ខណក្រុមឈ្មួញកំពុងលួចនាំចូលពីប្រទេសហុងកុង និងសិង្ហបុរីចូលមកលក់
នៅតាមទីផ្សារនៃព្រះរាជាណាចក្រកម្ពុជា។
ហេតុការណ៍បង្ក្រាបក្រុមឈ្មួញលួចនាំទូរស័ព្ទចូលក្នុងខេត្តសៀមរាបនេះធ្វើឡើងនៅថ្ងៃទី១៤ខែមករាស្ថិតនៅក្នុងព្រលានយន្តហោះ អន្តរជាតិ ខេត្តសៀមរាប។
មន្ត្រីការិយាល័យគយនិងរដ្ឋាករប្រចាំនៅព្រលានយន្តហោះអន្តរជាតិខេត្តសៀមរាបបានឲ្យដឹងថា ៖ ក្រុមឈ្មួញដែលបាននាំចូលទូរស័ព្ទចំនួន៤៩៧គ្រឿងមាន២ម្ចាស់ ដែលមានឈ្មោះ ភិន រស្មី (បាននាំចូលទូរស័ព្ទចំនួន ៧វ៉ាលី)និង ឈ្មោះ ង៉ូវ ធៀងហុង ចំនួន ៤វ៉ាលី។
មន្ត្រីដដែលបានបន្តថា៖ការរឹបអូសយកទូរស័ព្ទដៃទាំងនេះ ខណៈឈ្មួញទាំងពីរនាក់នោះនាំចូលពីប្រទេស ហុងកុង និងសិង្ហបុរី ចូលមកកម្ពុជាតាមច្រកទ្វា អន្តរជាតិ សៀមរាប ដោយមិនបានរាយការណ៍ដល់មន្ត្រីគយនិងរដ្ឋាករ ដែលបានប្រចាំនៅការិយាល័យត្រួតពិនិត្យគយអាកាសយានដ្ឋានអន្តរជាតិខេត្តសៀមរាបនោះទេ។
គួរបញ្ជាក់ផងដែរថា៖បច្ចុប្បន្ន ទំនិញទូរស័ព្ទម៉ាក iPhone 6s និង iPhone 6s Plus ចំនួន៤៩៧គ្រឿង នោះត្រូវបានសមត្ថកិច្ចរឹបអូស យកទៅរក្សាទុក នៅគយព្រលានយន្តហោះខេត្តសៀមរាប ដើម្បីរង់ចាំបន្តនិតិវិធីតាមផ្លូវច្បាប់ ដោយមានបិទត្រាគយ និងមានស្នាមមេដៃរបស់ម្ចាស់ទំនិញ ទាំង២នាក់នោះត្រឹមត្រូវផងដែរ៕ 
ដោយវេហាស៍
