ស្ទឹងត្រែង៖ក្នុងមួយយប់មានគ្រោះថ្នាក់ចរាចរណ៍ចំនួន២ករណីមួយករណីម៉ូតូបុកគូថត្រាក់ទ័រសណ្តោងរ៉ឺម៉ក លើស្ពានមេគង្គ ធ្វើអោយមនុស្សម្នាក់រងរបួសធ្ងន់ និងមួយករណីមួយទៀត រថយន្តកូរ៉េ២តោនកន្លះមួយគ្រឿង ដឹកដំឡូងមីលើសចំណុះបានក្រឡាប់ផ្ងាជើង ចាក់ដំឡូងចោលពេញព្រៃ តែមិនបណ្តាលអោយ មានមនុស្សរងរបួសនោះទេ។
គ្រោះថ្នាក់ចរាចរទាំង២ករណីនេះបានកើតឡើងនៅពេលយប់រំលងអធ្រាត្រឈានចូលថ្ងៃទី១៦ខែមករាឆ្នាំ២០១៦នៅចំណុចផ្សេងគ្នា ម៉ូតូបុកត្រាក់ទ័រចំណុចស្ពានលើស្ពានមេគង្គ ស្ថិតក្នុងភូមិអូរត្រែល ស្រុកថាឡាបរិវ៉ាត់។ចំណែករថយន្តដែលក្រឡាប់ ស្ថិតនៅចំនុចផ្លូវបំបែក ផ្លូវជាតិលេខ៩បត់ទៅផ្លូវជាតិលេខ៧ស្ថិតក្នុងភូមិរាជានុកូល សង្កាត់ ក្រុង ខេត្តស្ទឹងត្រែង។
មន្ត្រីនគរបានប៉ុស្ត៍ថាឡាបានអោយដឹងថាជនរង្គ្រោះ ដែលជិះម៉ូតូបុកត្រាក់ទ័រសណ្តោងរ៉ឺម៉កមា
មានឈ្មោះថាន់ ម៉េងហាក់ហៅចយ ភេទប្រុស អាយុ៣២ឆ្នាំជាមន្ត្រីបរើការងារនៅសាលាស្រុកថាឡាបរិវ៉ាត់ និងជាអ្នកចំរៀងច្រៀងតាមរោងការ និងមានទីលំនៅ ក្នុងភូមិថាឡា ឃុំថាឡា ស្រុកថាបរិវ៉ាត់ខេត្តស្ទឹងត្រែង។
នគរបាលប៉ុស្ត៍បន្តទៀតថានៅយប់កើតហេតុជនរងគ្រោះបានជិះម៉ូតូម៉ាកវ៉េវអាលហ្វាគ្មានស្លាកលេខចេញពីកន្លែងគេច្រៀងក្នុងពិធីមង្គលការ មួយកន្លែងនៅភូមិអូស្វាយត្រឡបមកផ្ទះវិញ ពេលមកដល់ចំណុចកើតហេតុមានត្រាក់ទ័រសណ្តោងរ៉ឺម៉ក២គ្រឿង បើកបរពីកើតទៅលិចក្នុងទិដៅស្របគ្នាដោយលើស្ពានគ្មានភ្លើងបំភ្លឺ និងត្រាក់ទ័រគ្មានភ្លើងសញ្ញាពីក្រោយ ហើយជនរងគ្រោះជិះក្នុងល្បឿនលឿនខ្វះការប្រុងប្រយ័ត្នផងនោះ បានបុកកន្ទុយរ៉ឺម៉កត្រាក់ទ័រពេញទំហឹង របួសធ្ងន់ធ្ងរ។ក្រោយកើតហេតុត្រាក់ទ័រទាំង២គ្រឿង បានបើករត់គេចដល់ចំណុចផ្លូវបំបែកស្រែឬស្សី ក៏ត្រូវបាននគរបាលចាប់ឃាត់ត្រាក់ទ័រទាំង២គ្រឿងរួមទាំងម្ចាស់ផងដែរ។
ដោយឡែករថយន្តកូរ៉េដឹកដំឡូងមីដែលក្រឡាប់ផ្ងាជើងឡើងលើនោះ ត្រូវបានគេនិយាយថាខ្លួនតូច តែដឹកលើសទម្ងន់ខ្ពស់ហួសទ្រង់ ពេលដល់ផ្លូវបំបែកបត់គួរខ្លាំងពេក ទើបបណ្តាលអោយក្រឡាប់បែបនេះ តែសំណាងល្អមិនបណ្តាលអោយមានមនុស្សរងគ្រោះនោះទេ ពេលនេះកំពុងយករថយន្តមួយគ្រឿងទៀតសាងដំឡូងចេញពីរថយន្តក្រឡាប់ដាក់រថយន្តមួយផ្សេងទៀត។
ចំណែកត្រាក់ទ័រត្រូវបានម៉ូតូបុកពីក្រោយនោះ ត្រូវបានសមត្ថកិច្ចនិយាយថា ដោយសារត្រាក់ទ័រទាំង២គ្រឿងមិនបានដាក់ភ្លើងសញ្ញាសម្គាល់ និងម៉ូតូជិះល្បឿនលឿន ទើបបង្កអោយមានគ្រោះថ្នាក់បែបនេះ។បច្ចុប្បន្នជនរងគ្រោះកំពុង ស្ថិតក្រោមការព្យាបាលរបស់ក្រុមគ្រូពេទ្យ យោធាភូមិភាគ១។រីឯត្រាក់ទ័រនិងម៉ូតូត្រូវបាននគរបាលប៉ុស្ត៍ យកមករក្សាទុកនៅអធិការដ្ឋាននគរបានស្រុកថាឡាបរិវ៉ាត់ដើម្បី អោយភាគីម្ចាស់ត្រាក់ទ័រចូលដោះស្រាយតាមផ្លូវច្បាប់៕
