កំពង់ធំ៖ សម្តេចអគ្គមហាសេនាបតីតេជោ ហ៊ុន សែន បានចុចចំពោះក្រុមឧកញ៉ា ដែលរកស៊ីកាងឈើ រួមមាន៖ ឧកញ៉ា លឹម ប៊ុណ្ណា (ហៅ ខ្នា) និង (សឹង្ហ សំអុល) សម្តេចតេជោបានបញ្ជាឲ្យលោកប្រាជ្ញ ចន្ទ អភិបាលខេត្តត្បូងឃ្មុំ និង លោកអភិបាលស្រុកមេមត់ ចាត់ការទៅលើ
ឧកញ៉ាកាងឈើទាំងពីរនាក់នេះ ប្រសិនបើមិនចង់អស់បុណ្យស័ក្តិ។
យោងតាមការផ្សព្វផ្សាយលើទំព័រ Facebook លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានឲ្យដឹងថា នៅក្នុងកិច្ចប្រជុំគណៈរដ្ឋមន្ត្រី នាព្រឹកថ្ងៃទី១៥ ខែមករា ឆ្នាំ២០១៦ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា បានព្រមានធ្ងន់ៗទៅលើឈ្មួញនិងអ្នកឃុបឃិតបើកដៃឲ្យមានការរត់ពន្ធឈើទៅប្រទេសវៀតណាម ហើយបានចេញបញ្ជាឲ្យបិទគ្រប់ច្រករត់ពន្ធឈើទៅប្រទេសវៀតណាម។
ជាមួយនឹងដំណឹងដ៏សែនត្រេកអរនេះ ប្រជាពលរដ្ឋគ្រប់មជ្ឈដ្ឋានបានគាំទ្រវិធាន ការ របស់សម្តេចតេជោយ៉ាងពេញទំហឹង ក្នុងការបិទគ្រប់ច្រករត់ពន្ធឈើទៅប្រទេសវៀតណាម និងចាប់ខ្លួនឧកញ៉ាបំផ្លាញព្រៃឈើ និងរត់ពន្ធឈើពីររូប គឺលឹម ប៊ុណ្ណា ហៅ(ខ្នា) និង សឹង្ហ សំអុល យកមកកាត់ទោទៅតាមច្បាប់ព្រៃឈើ ។
ប្រភពពីប្រជាសហគមន៍ការពារព្រៃឈើតែងតែលើកឡើងថា ឧកញ៉ាទាំងពីររូបខាងលើនេះមានលទ្ធភាពកាប់ឈើ និងប្រមូលទិញឈើល្មើសច្បាប់បានតាមចិត្តដោយសារមានការឃុបឃិតពីនាយកឧទ្យានព្រៃការពារជីវៈចំរុះកែវសីមា និងដែនជម្រកសត្វព្រៃភ្នំព្រេច មានការឃុបឃិតពីជំនាញរដ្ឋបាលព្រៃឈើ និងអាជ្ញធរមូលដ្ឋាន។ ចំណែកការដឹកជញ្ជូនឈើសេះហោះ និងគេចពន្ធកាត់ខេត្តត្បូងឃ្មុំ និងចេញតាមច្រករបៀងបានតាមអំពើចិត្តនោះគឺមានការឃុបឃិតពីមន្ត្រីចម្រុះមាត់ច្រក ហើយគេសង្ស័យថា លោក ប្រជ្ញ ចន្ទ ក៏ជាមេក្លោងផ្សំគំនិតធំជាងគេ។
មតិមហាជនបានលើកឡើងថា រដ្ឋាភិបាលត្រូវតែធ្វើបទស៊ើបអង្គេតករណីនេះឲ្យបានស៊ីជម្រៅ ព្រោះមួយរយៈចុងក្រោយនេះ ឧកញ៉ាថ្លើមធំពីររូបនេះបានពួតដៃគ្នាយ៉ាងកម្រោលលួចកាប់ និងប្រមូលទិញឈើពីព្រៃសហគមន៍ ពីឧទ្យានជីវៈចំរុះកែវសីមា និងដែនជម្រកសត្វព្រៃភ្នំព្រេចដឹកចូលក្រុមហ៊ុនរៀងៗខ្លួន ហើយមួយថ្ងៃៗដឹកចេញទៅវៀតណាមមិនដែលលស់ពេលរាប់រយឡានយីឌុបតាមច្រករបៀងនានាក្នុងខេត្តត្បូងឃ្មុំ ហើយឈើសេះហោះទាំងនេះពួកគេប្រើប្រាស់លុយរត់ការបើកផ្លូវ។
ពាក់ព័ន្ធនឹងបញ្ហានេះដែរ លោក ឆេង គឹមស៊ុន គ្រាដែលឡើងកាន់តំណែងជាប្រធានរដ្ឋបាលព្រៃឈើ ជំនួស លោក ទី សុគន្ធ សម្តេចតេជោធ្លាប់ព្រមានទុក ជាមុនថា អាចបាត់តំណែងវិញនៅពេលមិនចេះធ្វើការ ហើយនៅពេលនេះទៀត សម្តេចតេជោ បានប្រកាស នៅក្នុងកិច្ចប្រជុំគណៈរដ្ឋមន្ត្រី នាព្រឹក ថ្ងៃទី១៥ ខែមករា ឆ្នាំ២០១៦ ឲ្យមានការចាប់ខ្លួនឧកញ៉ា លឹម ប៊ុណ្ណា ហៅ(ខ្នា) និង សឹង្ហ សំអុល ក្នុងកំហុសការកាប់ឈើ និងរត់ពន្ធឈើទៅវៀតណាម ដែលនេះក៏ជាចំណែកមួយ ត្រូវទទួលខុសត្រូវ របស់ លោក ឆេង គឹមស៊ុន ហើយអាចលោក ឆេង គឹមស៊ុន ឡើងបុណ្យ និងធ្លាក់បុណ្យវិញដោយសារ ឧកញ៉ា លឹម ប៊ុណ្ណា ហៅ(ខ្នា) និង សឹង្ហ សំអុលនេះក៏ថាបាន។ 
សូមរំលឹកថាឧកញ៉ា លឹម ប៊ុណ្ណា ហៅ(ខ្នា) និង សឹង្ហ សំអុល កាលពីប៉ុន្មានឆ្នាំមុននោះ ក្នុងនាមជាអ្នកជំនួញឈើ សេះហោះ ធ្លាប់បានធ្វើឲ្យ លោក ទីសុគន្ធ ប្រធានរដ្ឋបាលព្រៃឈើត្រូវសម្តេចតេជោដកចេញពីតំណែង ហើយ ឧកញ៉ា លឹម ប៊ុណ្ណា ហៅ(ខ្នា) និង សឹង្ហ សំអុល បានរត់គេចខ្លួនពីការតាមចាប់ទៅសម្ងំនៅវៀតណាម ហើយរយៈពេលខ្លីបំផុតឧកញ៉ាពីររូបនេះវិលមកធ្វើមុខរបរឈើវិញថែមទាំងឡើងងារ «ឧកញ៉ា» ជាន់ផ្អៀងនៅភូមិភាគឦសានកាប់កម្ទេចព្រៃឈើស្រោងដឹកយកទៅលក់នៅវៀតណាម។ កន្លងទៅសូម្បីតែ សម្តេតេជោ ក៏ឧកញ៉ាថ្លើមធំទាំងពីរនាក់នេះ មិនដែលក្រែងនិងច្បាប់នោះឡើយ ព្រោះពូកគេមានមន្ត្រីគ្រាក់ៗកាងពីក្រោយជារៀងរហូត ៕
យើងរងចាំមើលទាំងអស់គ្នា ថាតើលទ្ធផលឧកញ៉ាថ្លើមធំទាំងពីរនាក់ មានវេសនាយ៉ាងណា ?
