ខេត្តឧត្តរមានជ័យ៖ពលរដ្ឋខ្មែ៥នាក់ ត្រូវអាជ្ញាធរថៃចាប់ខ្លួនបញ្ជូនមកកម្ពុជាវិញ ខណះពួកគេបានលួចឆ្លងដែនខុស ច្បាប់ចូលកាប់ឈើគ្រញូង ហើយពួកគេត្រូវបានជាប់ឃុំអស់រយះពេលជាង៥ខែ ទើបដោះលែងឲ្យមាន សេរីភាពនិងបានបញ្ជូនឲ្យមកស្រុកកំណើតវិញ កាលពីវេលាម៉ោង១៣និង២០នាទីថ្ងៃទី១៩ ខែមករា ឆ្នាំ២០១៦ តាមច្រកអន្តរជាតិជាំសាងាំ ស្រុកអន្លង់វែង ខេត្តឧត្តរមានជ័យ។
នគរបាលអន្តោប្រវេសនៅច្រកជាំសាងាំ បានឲ្យដឹងថា ពលរដ្ឋទាំង៥នាក់ ដែលត្រូវសមត្ថកិច្ចថៃ ចាប់បញ្ជូនមកពេលនេះ១/ឈ្មោះគង់ សាវឿន ភេទប្រុសអាយុ៥៧ឆ្នាំរស់នៅខេត្តតាកែវ .២/ឈ្មោះញ្ញាង វិន ភេទប្រុសអាយុ៤៨ឆ្នាំរស់នៅខេត្តឧត្តរមានជ័យ ៣/ឈ្មោះ ស្រី វណ្ណសរ ភេទប្រុសអាយុ៣៩ឆ្នាំរស់នៅខេត្តកំពង់ចាម ៤/ឈ្មោះ មិន សុីនាត ភេទប្រុសអាយុ២០ឆ្នាំរស់នៅខេត្តឧត្តរមានជ័យ ៥/ឈ្មោះនួន វិរះ ភេទប្រុសអាយុ២០ឆ្នាំ រស់នៅខេត្តតាកែវ ។
មន្ត្រីទំនាក់ទំនងព្រំដែនកម្ពុជាថៃ ប្រចាំច្រកជាំសាង៉ាំ បានឲ្យដឹងថា ពលរដ្ឋខ្មែរទាំង៥នាក់ខាង លើត្រូវបានថៃចាប់ខ្លួនកាលពីថ្ងៃទី៦ ខែធ្នូ ឆ្នាំ២០១៥ នៅចំនុចមុខច្រករបៀងអូរស្វាយ ខាងទឹកដីថៃ ពីបទលួចឆ្លងដែនចូលដីថៃកាប់ឈើគ្រញូង។
គួរបញ្ជាក់ថា ច្រករបៀងអូរស្វាយគឺជាច្រករបៀងខុសច្បាប់ដ៏ធំ ដែលគ្រប់គ្រងដោយទាហាន សឹករង ទាហានភូមិភាគ និងច្រកមួយនេះត្រូវបានគេដឹងថា ជាច្រកព្រំដែន មានការឃុបឃិតគ្នារវាងឈ្មួញនិងសមត្ថកិច្ច បើកដៃឲ្យពលរដ្ឋខ្មែរឆ្លងដែនខុសច្បាប់ចូលទឹកដីថៃម៉ា សេរីគ្មានការទប់ស្កាត់និងបង្ក្រាប ព្រោះក្រៅពីនេះក៏មានកម្មករមួយចំនួនត្រូវបានឈ្មួញនិងសមត្ថកិច្ច ជួលឲ្យទៅកាប់ឈើយកមកលក់ផងដែរ៕