ខេត្តឧត្តរមានជ័យ បុរសម្នាក់បានស្លាប់បាត់បង់ជីវិត ដែលគេសង្ស័យថា មកពីមូលហេតុផឹក ហេតុនេះ បានកើតឡើងនៅភូមិអូរត្រាំប៉ោង ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។
ជនរងគ្រោះមានឈ្មោះ សូ ម៉ៅ ភេទប្រុស ៤៨ឆ្នាំ មានទីលំនៅក្នុងភូមិឃុំខាងលើ។ តាមការរៀបរាប់ពីប្រពន្ធជនរងគ្រោះបានឱ្យដឹងថា ជនរងគ្រោះមានជំងឺក្រពះ ពោះវៀន និងសួត ប្រចាំកាយ តាំងពីឆ្នាំ២០១១ ដែលបានពិនិត្យមើលនៅគ្លីនិចឯកជនក្នុងស្រុកអន្លង់វែង។
ប្រពន្ធជនរងគ្រោះបន្តថា នៅល្ងាចថ្ងៃទី១៨ ខែមករា ឆ្នាំ២០១៦ ប្តីរបស់គាត់ប្រឡប់មកពីធ្វើការ បានប្រាប់ប្រពន្ធថា ហេវហត់ណាស់ ដោយខ្លួនជាប្រពន្ធប្រាប់ថា ស្អែកកុំទៅធ្វើការទៀត ព្រោះមិនសូវស្រួលខ្លួន។ លុះព្រឹកឡើងប្តីរបស់គាត់បានប្រើកូនស្រីឱ្យទៅទិញការហ្វេផឹក ពេលនោះគាត់នៅក្បែរប្តីដែរ។ ហើយនៅពេលគាត់ដើរទៅបន្ទប់ទឹកគាត់ត្រឡប់មកវិញ ឃើញប្តីកំពុងឈរតោងដៃគោយន្ត គាត់ក៏សួរ ហើយប្តីប្រាប់ថា ផឹកការហ្វេរួចភ្លាម ក៏មានអាការៈញ័រដៃជើង ហើយភ្លាមនោះ គាត់បានរត់ទៅយកស្ករស មកបង្អកប្តីក្រែងពុលការហ្វេ ហើយភ្លាមៗប្តីគាត់ក៏មានអាការៈស្លេកស្លាំងខ្លាំង គាត់ក៏បានហៅរថយន្តឈ្នួលដឹកយកទៅមន្ទីរពេទ្យ តែពេលទៅដល់ពេទ្យ គ្រូពេទ្យបានប្រាប់ថា ជនរងគ្រោះបានស្លាប់បាត់បង់ជីវិតបាត់ហើយ។
គ្រូពេទ្យបានឱ្យដឹងថា ជនរងគ្រោះអាចស្លាប់មកពីមូលហេតុផឹកកាហ្វេ ហើយតាមស្ថានភាពជនរងគ្រោះ អាចមានជំងឺក្រពះ ពោះ និងសួត ហើយក៏អាចមានជំងឺបេះដូងទៀតផង។ ព្រោះប្រភេទជំងឺទាំងនេះ មិនអាចបរិភោគការហ្វេបានទេ។ ហើយណាមួយជនរងគ្រោះធ្វើការធ្ងន់ពុំសូវឈប់សំរាកទៀត។