ភ្នំពេញ៖បុរសម្នាក់ស្រវឹងស្រាបានបើករថយន្តឡិចស៊ីសRX300 មិនប្រយ័ត្នបានរេចង្កូតទៅបុកកង់ក្រោយរថយន្តតាកូម៉ាដែលចតចោលមុខផ្ទះ បណ្ដលឲ្យរងការខូចខាត តែសំណាងល្អមិនបង្កឲ្យមនុស្សណាម្នាក់រងរបួស។ ហេតុការណ៍គ្រោះថ្នាក់ចរាចរណ៍នេះបានើតឡើងកាលពីវេលាម៉ោង១០និង៣០នាទីយប់ ថ្ងៃទី២១ ខែមករា ឆ្នាំ២០១៦ នៅតាមបណ្ដោយផ្លូវ១០៥ ស្ថិតក្នុងសង្កាត់បឹងប្រលឹត ខណ្ឌ៧មករា។
ប្រភពព័ត៌មានពីប្រជាពលរដ្ឋដែលនៅក្បែរកន្លែងកើតហេតុបានឲ្យដឹងថា នៅមុនពេលកើតហេតុគឺ មានរថយន្តតាកូម៉ា ពណ៌ស្ក ពាក់ស្លាកលេខភ្នំពេញ2X.4523 ដែលគេចតចោលមុខផ្ទះ ក្រោយមកស្រាប់តែមានរថយន្តឡិចស៊ីសRX300 ពណ៌ស ពាក់ស្លាកលេខភ្នំពេញ2AG.4481 បើកបរដោយបុរសម្នាក់ដែលស្រវឹងស្រា តាមបណ្ដោយផ្លូវ១០៥ទិសដៅ
ពីត្បួងទៅជើង ខណះមកដល់ចំណុចកើតហេតុស្រាប់តែរេចង្កូតជ្រុលទៅបុករថយន្តតាកូម៉ា ដែលចតចោល ចំកង់ក្រោយផ្នែកខាងស្ដាំបណ្ដាលឲ្យវៀចកង់ជាប់កាង រងការខូចខាត។
ប្រភពដដែលបានបន្តថា ក្រោយពីរថយន្តឡិចស៊ីសបានបង្ករួចក៏បានបន្ថែមល្បឿនបើកគេចរហូតដល់ផ្លូវក្រោមដីជាប់និងស្ទុបអូរឡាំងពិច ហើយក៏ត្រូវបានសមត្ថកិច្ចមូលដ្ឋានឃាត់បានទាំងម្ចាស់និងរថយន្តបង្កតែម្ដង។បន្ទាប់ក្រោយមក ភាគីខាងរថយន្តបង្កបានសុំសម្របសម្រួលគ្នាជាមួយរថយន្តរងគ្រោះដោយសង់ថ្លៃខូចខាតចំនួន២៥០$ដើម្បីបញ្ចប់រឿង៕