តាកែវ៖ ព្រះមង្គលទិព្វលោកមុនី យន វាសនា ព្រះបាឡាតគណខេត្តតាកែវ មានសង្ឃ ដីកាថា នៅថ្ងៃសៅរ៍ និងថ្ងៃអាទិត្យ សប្តាហ៍នេះ ព្រះសង្ឃ ៣៦៣អង្គ ដែលនិមន្តមកប្រឡងយកវិញ្ញាបនបត្រ ពុទ្ធិកបឋមសិក្សា នៅពុទ្ធិកៈវិទ្យាល័យសម្ដេច ជាស៊ីម ក្នុងវត្តសីហរតនារាម នឹងត្រូវបានប្រជាពុទ្ធបរិស័ទក្នុងខេត្តតាកែវ នឹងត្រូវប្រារព្ធពិធីបុណ្យប្រគេនចង្ហាន់ដល់ព្រះសង្ឃ គ្រប់ៗអង្គ ។ក្នុងឱកាសនៃការប្រឡងនេះ ក្រៅពីប្រគេនចង្ហាន់ប្រជាពុទ្ធបរិស័ទក្នុងខេត្ត ក៏មានទេយ្យទានសំរាប់ព្រះសង្ឃទៅតាមសទ្ធាជ្រះថ្លា រៀងៗខ្លួនដែលបានកំណត់ដោយវេណប្រចាំថ្ងៃនីមួយៗ ។
ដោយឡែកនៅថ្ងៃអង្គារ វេលាម៉ោង ៣រសៀល ប្រជាពុទ្ធបរិស័ទក្នុងខេត្តតាកែវ ប្រមាណជាង ១ពាន់នាក់ ក៏បានអញ្ជើញចូលរួមក្នុងការស្ដាប់ព្រះធម៌ នៃការអប់រំជីវិតតាមផ្លូវព្រះធម៌ សម្ដែងដោយលោកគ្រូ អគ្គបណ្ឌិត ប៊ុត សាវង្ស ផងដែរ ។សូមបញ្ជាក់ថា៖ មុខវិជ្ជាដែលត្រូវប្រឡងរួមមាន ១-បាលីប្រែប្រយោគ និងវេយ្យាករណ៍, ២-ប្រស្នាពុទ្ធវិន័យ ពុទ្ធប្បវត្តិ ពុទ្ធសាសនា, ៣-គណិតវទ្យា, ៤-តែងសេចក្ដី, ៥-សរសេរតាមអាន, ៦-ប្រវត្តិវិទ្យា-ភូមិវទ្យា-វិទ្យាសាស្ដ្រ ៕