ព្រៃវែង៖ លោក សែម គន្ធា តំណាង ឯ.ឧ ស សុខា តំណាងរាស្ដ្រគណបក្សប្រជាជនកម្ពុជាមណ្ឌលព្រៃវែង និងជាប្រធានសហភាពសហព័ន្ធយុវជនកម្ពុជាខេត្តបានឱ្យដឹងថា ផ្ទះមួយខ្នងដែលត្រូវសាងសង់ជូនប្រជាពលរដ្ឋមួយគ្រួសារនេះ មានទំហំ ៤ម៉ែត្រ គុណនឹង ៥ម៉ែត្រ សង់ពីឈើប្រក់ស័ង្កសី ជញ្ជាំងស័ង្កសី រនៀបឬស្សី ដោយចំណាយថវិកាសរុបចំនួន ៤លានរៀល ។ ផ្ទះនេះត្រូវបានផ្ដល់ជូនលោកយាយ សួស សារឿន អាយុ ៦២ឆ្នាំ និងចិញ្ចឹមចៅក្នុងបន្ទុកចំនួន ៥នាក់ ។
លោក សែម សុគន្ធា និយាយថា៖ ការចុះជួយសង់ផ្ទះជូន ប្រជាពលរដ្ឋក្រីក្រមួយគ្រួសារ និងផ្ដល់អំណោយជូនប្រជាពលរដ្ឋចំនួន ៥គ្រួសារផ្សេងទៀត នាពេលនេះ បានធ្វើឡើងកាលពីថ្ងៃទី២១ ខែមករា ក្រោមការណែនាំរបស់ឯ.ឧ ស សុខា ដែលត្រូវផ្តល់ជូនជាដំបូងនៅភូមិព្រៃឈ្មោះ ឃុំព្រៃតាសរ ស្រុកពោធ៌រៀង ខេត្តព្រៃវែង ។
លោក សែម សុគន្ធា បន្តថា បន្ទាប់ចុះជួយសាសង់ផ្ទះជូនគ្រួសារលោកយាយ សួស សារឿន រួច ក្រុមការងារក៏បន្តដំណើរ ចុះចែកអំណោយរបស់ ឯ,ឧ ស សុខា ជូនប្រជាពលរដ្ឋចំនួន ៥គ្រួសារទៀត ដែលស្ថិតនៅក្នុងភូមិព្រៃឈ្មោះ ឃុំព្រៃតាសរ ស្រុកពោធ៌រៀង ខេត្តព្រៃវែង ។ លោកថា៖ ប្រជាពលរដ្ឋ៥គ្រួសារនេះ ក្នុងមួយគ្រួសារៗទទួលបាន អង្ករ ២៥Kg, ទឹកត្រី, ទឹកស៊ីអ៊ីវ, ត្រីខ, មី, និងថវិកាចំនួន ៤ម៉ឺនរៀល ។
លោក សែម គន្ធា បានប្រាប់ថា៖ បើទោះជា ឯ.ឧ ស សុខា មមាញឹកក្នុងការងារក្តី តែឯ.ឧ មិនដែលភ្លេច ពីការលំបាករបស់បងប្អូនឡើយ ហើយអំណោយទាំងនេះ មិនបានសមប្រកបទៅតាមការចង់បានក៍ពិតមែន តែអាចជួយសម្រាលការលំបាកបានមួយរយៈ ហើយក្រុមការងារ នឹងខិតខំគៀងគររកសប្បុរសជន ដើម្បីជួយឧបត្ថម្ភដល់បងប្អូនបន្តទៀត តែអ្វីដែលសំខាន់សូមបងប្អូន ត្រូវខិតខំបង្កើនរបរទទួលទានបន្ថែមទៀត ដើម្បីទ្រទ្រង់ជីវភាពប្រចាំថ្ងៃមិនត្រូវអស់សង្ឃឹមក្នុងជីវិតឡើយ ៕
