ខេត្តសៀមរាប នៅសណ្ឋាគារបុរីអង្គរ ខេត្តសៀមរាប នាព្រឹកថ្ងៃទី២១ ខែ មករា ឆ្នាំ២០១៦នេះ លោកបណ្ឌិតឃឹម ប៊ុនសុងអភិបាលនៃគណៈអភិបាលខេត្តបានជួបធ្វើការសណេះសំណាលជាមួយថ្នាក់ដឹកនាំគ្រីស្ទបរិស័ទទូទាំងខេត្ត សៀមរាប ដែលជាលោកគ្រូអ្នកគ្រូគង្វាល ជាអ្នកបម្រើព្រះដ៏ស្មោះត្រង់ អាជ្ញាធរក្រុង ស្រុក កងកម្លាំងប្រដាប់អាវុធ តំណាងអង្គការ និង ភ្ញៀវជាតិ អន្តរជាតិ ប្រមាណជាង ១៥០នាក់ចូលរួម ។
តាមរបាយការណ៍របស់លោកគ្រូគង្វាលបណ្ឌិតប្រាក់ វុទ្ធីនាយកសមាគមគ្រូគង្វាល និងជានាយក សាលា អាហ្កាប៉េ សៀមរាប បានបញ្ជាក់អំពីលទ្ធផល ក្នុងការចូលរួមបំពេញកាតព្វកិច្ចអភិវឌ្ឍន៍សង្គម ក្នុងសកម្ម ភាពមនុស្ស ក្នុងឆ្នាំ២០១៥ ព្រមទាំងបានប្តេជ្ញា ក្នុងការចុលរួមជាមួយរាជរដ្ឋាភិបាលអាជ្ញាធរខេត្ត ក្នុងឆ្នាំ២០១៦ ថ្នាក់ដឹកនាំ និង គ្រីស្ទបរិស័ទនឹងបន្តស្តារអភិរក្សាអភិវឌ្ឍន៍ប្រទេសជាតិដោយចូលរួមក្នុងការអនុវត្តគោលនយោ បាយភូមិឃុំមានសុវត្ថិភាព ជាមួយរាជរដ្ឋាភិបាលក៏ដូចអាជ្ញាធរនៅតាមមូលដ្ឋានផងដែរ ។
មានចំណាប់អារម្មណ៍របស់ លោកឧកញ៉ាសៀ សុភ័ក្ត្រនាយកសមាគម ព្រះគុណអស្ចារ្យ ដោយ បានបញ្ជាក់ថា នេះជាលើកទី១ហើយនៃការជួបជុំគ្នានៃថ្នាក់ដឹកនាំគ្រីស្ទបរិស័ទហើយក៏ជាលើកទី៦នៅទូទាំង ព្រះរាជាណាចក្រកម្ពុជាក្នុងការពង្រឹងនៃកិច្ចទំនាក់ទំនងរវាងគ្រីស្ទបរិស័ទជាមួយអាជ្ញាធរមូលដ្ឋាន ក្នុងកិច្ចសហការសាមគ្គីគ្នារបស់ព្រយេស៊ូគ្រីស្ទដើម្បីបង្ហាញពីសេចក្តីស្រឡាញ់និង កិត្តិនាមរបស់ព្រះយេស៊ូគ្រីស្ទទូទាំងប្រទេសកម្ពុជា ។
មានប្រសាសន៍នោះលោកបណ្ឌិតឃឹម ប៊ុនសុងបានគូសបញ្ជាក់ថា ពីនីតិកាលមួយ ទៅនីតិកាលមួយ របស់ រាជរដ្ឋាភិបាលក្នុងការដាក់ចេញគោលនយោបាយយុទ្ធសាស្ត្រចតុកោណនៅគ្រប់ដំណាក់កាល សំខាន់ដំណាក់ កាលទី៣ ដើម្បីធានានូវការអភិវឌ្ឍន៍សេដ្ឋកិច្ចសង្គមលើគ្រប់វិស័យ បានធ្វើឲ្យមានការរីកចម្រើនឥតឈប់ឈរ និង វឌ្ឍនភាពគួរឲ្យស្ញប់ស្ញែងទៀតផង។ ឯកឧត្តមបណ្ឌិតបានបន្តទៀតថាផ្នែកសាសនា និងជំនឿផ្សេងៗ ត្រូវបាន លើកកម្ពស់ និង ជម្រុញ ឲ្យមានការរីកដុះដាលជាបន្តបន្ទាប់ នៅគ្រប់តំបន់នៃព្រះរាជាណាចក្រកម្ពុជា។ ជាក់ស្តែង រដ្ឋធម្មនុញ្ញ នៃព្រះរាជាណាចក្រកម្ពុជា បានចែងថា ព្រះពុទ្ធសាសនា ជាសាសនារបស់រដ្ឋហើយត្រូវប្រជាពលរដ្ឋ ភាគច្រើនគោរពប្រតិបត្តិ។ ម្យ៉ាទៀតរាជរដ្ឋាភិបាលកម្ពុជា ក៏បានយកចិត្តទុកដាក់នូវសេរីភាពនៃជំនឿសាសនា ក្នុងកាប្រតិបត្តិខាងផ្លូវសាសនាដទៃទៀតក្នុងលក្ខខណ្ឌមិនប៉ះពាល់ដល់ជំនឿឬសាសនាដ៏ទៃឡើយ។ លោកបណ្ឌិតឃឹមប៊ុនសុងក៏បានបន្តទៀតថាសេរីភាពខាងជំនឿសាសនា ត្រូវបានរាជរដ្ឋាភិបាលយកចិត្តទុកដាក់ និង លើកកម្ពស់យ៉ាងខ្លាំង ដើម្បីចូលរួមក្នុងការងារសង្គម ការងារមនុស្សធម៌ និង កិច្ចការងផ្សេងៗទៀតមិន ថាព្រះពុទ្ធសាសនា , ឥស្លាមសាសនា , គ្រីស្ទសាសនានិង សាសនាដទៃទៀតឡើយ ។លោកបណ្ឌិតបាន គូសបញ្ជាក់ថាប្រជាពលរដ្ឋគ្រប់រូបមានសេរីភាពពេញទីខាងជំនឿសាសនាដែលខ្លួនពេញចិត្ត ដោយគ្មានពលរដ្ឋណាម្នាក់ត្រូវបានបង្ខិតបង្ខំឲ្យជឿលើសាសនាណាមួយឡើយ ។ម្យ៉ាងទៀតក៏ត្រូវមានការអធ្យាស្រ័យគោរពគ្នាទៅវិញទៅមកដែលជាមូលដ្ឋានគ្រឹះនៃវប្បធម៌សន្តិភាព ដូចមានបញ្ញតិ្តក្នុងគោលលទ្ធិជំនឿ និង វិស័យសាសនានីមួយៗ ដោយប្រកាន់ខ្ជាប់នូវគោលជំនឿសាសនារៀងៗខ្លួន ដែលជាមាគ៌ានៃសច្ចធម៌របស់សាសនា ដើម្បីដឹកនាំបរិស័ទនៃសាសនា ឲ្យទទួលបានសេចក្តីសុខស្ងប់ សុភមង្គល ធ្វើឲ្យសង្គមជាតិ មានសន្តិភាព សន្តិសុខសណ្តាប់ ធ្នាប់សង្គមល្អ ធ្វើឲ្យប្រទេសបានអភិវឌ្ឍន៍ រីកចម្រើន ជឿនលឿនដូចបណ្តាប្រទេសនានាលើសកលលោកព្រមទាំងបានធ្វើការគាំទ្រ នូវរាល់សកម្មភាពរបស់គ្រីស្ទបរិស័ទដែលបានលើកឡើងផងដែរ។