បន្ទាយមានជ័យ:ខ្ទមប្រក់ផ្លាស្ទិក នៅលើដីចំណីផ្លូវរបស់ទុរគត់ជន រស់នៅក្នុងភូមិ កំព្រីង សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ត្រូវបានក្រុមការងារចុះជួយក្រុងសិរីសោភ័ណ ដឹកនាំដោយលោក លីសារី អភិបាលរងខេត្តបន្ទាយមានជ័យ សាងសង់ផ្ទះប្រក់ស័ង្កសី ទំហំ ៣ម៉ែត្រ គុណនិង៥ម៉ែត្រ សម្រាប់រស់នៅក្នុងជីវិតចុងក្រោយ។
ទុរគត់ជនមានឈ្មោះ សុខ ម៉ាប់ ភេទប្រុស អាយុ៥៦ ឆ្នាំ សុំដីគេរស់នៅក្នុងចំណីផ្លូវ មិនមានប្រពន្ធកូន រស់នៅចិញ្ចឹមសត្វមាន់ទា និងដើរស៊ីឈ្នួល បាញ់ថ្នាំស្រូវ ឬដំណាំ និងឃ្វៀលទា។
ដោយមើលឃើញការខ្វះខាត និងសំណូមពរអោយមានការរស់នៅសមរម្យ ក្នុងជីវិតចុងក្រោយរបស់ទុរគត់ជននេះ លោក លីសារី អភិបាលរងខេត្តបន្ទាយមានជ័យ និងជាប្រធានក្រុមការងារចុះជួយក្រុងសិរីសោភ័ណ និងក្រុមការងារចុះជួយក្រុងនេះ បានសាងសង់ផ្ទះថ្មីមួយខ្នង ប្រក់ស័ង្កសី ទំហំ ៣ម៉ែត្រ គុណនិង៥ម៉ែត្រ ប្រគល់ជូន និងនាំយកថវិការផ្ទាល់ខ្លួន មួយចំនួនជូនដល់ទុរគត់ជននេះផងដែរ។
លោក លី សារី មានប្រសាសន៍ថា: រាជរដ្ឋបាលនៃព្រះរាជាណាចក្រកម្ពុជាដែលមានសម្ដេច តេជោហ៊ុន សែន ជានាយករដ្ឋមន្ត្រីមិនបណ្ដាលអោយ ជនណាម្នាក់រស់ដោយទុរគត់ភាពនោះឡើយ ក្រុមការងារចុះជួយតែ ផ្ដល់ជូនជាសំភារះ និងថវិការចែករំលែក ដើម្បីលើកកំពស់ជីវភាព រស់នៅដោយសមរម្យ ដូចថ្ងៃនេះ បានប្ដូរពីខ្ទមប្រក់ប្លាស្ទិក មកផ្ទះប្រក់ស័ង្កសី១ខ្នង ជូនទុរគត់ជននៅសង្កាត់ភ្នៀត ៕ដោយ:ឃិន គន្ធា
