កណ្តាល៖ រណ្តៅដីជាច្រើនកន្លែងមើលទៅហាក់បីដូចជារន្ធបាយខុមដែលពួកក្រុមឈ្មួញ បានធ្វើអាជីវកម្មបូមបាចពង្រីងទឹកបឹង ដើម្បីយកអាចម៍ដីដឹកជញ្ជូនយ៉ាងអនាធិបតេយ្យ ទាំងថ្ងៃទាំងយប់ ។
ប្រជាពលរដ្ឋជាច្រើនគ្រួសារដែលរស់នៅក្នុងភូមិព្រែកហូរលិចទិ១ សង្កាត់ព្រែកហូរ ក្រុងតាខ្មៅ បានឲ្យដឹងកាលពីព្រឹកថ្ងៃទី ២៧ ខែមករា ឆ្នាំ២០១៦ ថា ផ្លូវរបស់ពួកគាត់ត្រូវបានខ្ទេចខ្ទាំបើកបរស្ទើរតែមិនកើត ដោយហេតុមានគ្រលុកធំៗជាច្រើន បំផ្លាញដោយរថយន្តដឹកដីរបស់លោកឧកញ៉ាស្រីម្នាក់ ដែលមានអំណាចរស់នៅក្រុងតាខ្មោ ហើយធ្វើអាជីវកម្មបូមបាចពង្រីងដើម្បីកាយយកអាចម៍ដីជាយូរឆ្នាំណាស់មកហើយ គេពុំដែលឃើញសមត្ថកិច្ចថ្នាក់ណា មកហាមឃាត់នូវអាជីវកម្មខុសច្បាប់បែបនេះបានឡើយពីព្រោះខ្លាចអំណាចលោកស្រីឧកញ៉ាម្នាក់នោះ ។
ជាមួយគ្នានេះដែរមន្ត្រីនគរបាលម្នាក់នៅមូលដ្ឋាននោះសុំមិនបញ្ចេញឈ្មោះបានឲ្យដឹងដែរថា មន្ត្រីប៉ូលិសរបស់ពួកគាត់មិនដែលហ៊ានទៅឈរអើតក្បែររណ្តៅដីនោះទេ ហើយរណ្តៅដីដែលមើលទៅហាក់ដូចជារន្ធបាយខុមទាំងនោះ គឺជាកម្មសិទ្ធរបស់ឈ្មួញម្នាក់ឈ្មោះលោកស្រីឧកញ៉ា សៀង ចាន់ហេង ដែលជាមេឈ្មួញម្នាក់រកស៊ីទិញ លក់ដី និងធ្វើអាជីវកម្មដឹកដីលក់បានយ៉ាងងើលមិនខ្លាចប៉ះពាល់បរិស្ថានណាមួយ ដល់បងប្អូនប្រជាពលរដ្ឋម្នាក់ណាឡើយ ធ្វើយ៉ាងណាឲ្យតែខ្លួនបានសុខ និងទទួលលាភសក្ការៈ (លុយកាក់) ចុលក្នុងហោប៉ៅរបស់ខ្លួនតែប៉ុណ្ណោះ គឺអ្នកស្រីឧកញ៉ារូបនេះ មិនបានគិតពីផលប៉ះពាល់ដល់អ្នកដទៃឡើយ ។
ពាក់ព័ន្ធទៅនឹងបញ្ហាទាំងអស់នោះ អ្នកយកព័ត៌មានយើងបានតេទូរស័ព្ទទៅអ្នកស្រីចៅសង្កាត់ព្រែកហូរ តែដោយទូរស័ព្ទអ្នកស្រីចៅសង្កាត់បិតរហូត មិនអាចតេទាក់ទងសុំការបំភ្លឺបាន ។ ដោយឡែកលោក ហេង ធៀម អភិបាលក្រុងតាខ្មៅ ក៏មិនអាចទាក់ទងបាននូវបញ្ហានេះនៅឡើយពីព្រោះលោកនៅមិនទាន់ក្តាប់ជុំនូវបញ្ហាដឹកកកាយដីអាចម៍ដីខាងលើបែបនេះ អ្នកយកព័ត៌មានទូរទស្សន៍អប្សារាយើងនឹងព្យាយាមសុំការបំភ្លឺជុំវិញបញ្ហាខាងលើនេះ ជាមួយនឹងលោកអភិបាលក្រុងដើម្បីបញ្ជាក់ឲ្យដឹងការពិតថា តើមានច្បាប់ឬក៏អត់ច្បាប់ ៕ ដោយ ខាត់ សុឃឿន