ភ្នំពេញ ៖ ក្រុមចោរប្លន់ចំនួន ២នាក់ បានជិះម៉ូតូស៊េរីទំនើបមួយគ្រឿង បានធ្វើសកម្មភាពធាក់នារីម្នាក់ កំពុង ជិះម៉ូតូនិច មួយគ្រឿង ផ្តួលហើយប្លន់យកម៉ូតូជិះគេចខ្លួនបាត់ស្រមោលភ្លាមៗ កាលពីវេលាម៉ោង ២នឹង ៤០ នាទីឈានចូលថ្ងៃទី ១៤ ខែឧសភា ឆ្នាំ ២០១៤ ស្ថិតនៅចំណុចជិតក្រសួងការពារជាតិ ផ្លូវសហព័ន្ធរុស្សី សង្កាត់ស្រះចក ខណ្ឌដូនពេញ ។
យោងតាមប្រភពព័ត៌មានពីសាក្សីដែលបានឃើញហេតុការណ៍ខាងលើនេះបានឲ្យដឹងថាមុនពេល កើតហេតុ ក្រុមនារីរងគ្រោះបានជិះម៉ូតូនិច ពណ៌សលាយផ្កាឈូក ពាក់ស្លាកលេខ ភ្នំពេញ 1CC 2579 ធ្វើដំណើរតាមបណ្តោយផ្លូវស្តុបក្តាន់២ ឡើងមកផ្លូវសហព័ន្ធរុស្ស៊ី ហើយពេលជិះដល់មុខស្ថានីយ៍ប្រេងឥន្ទៈ ស៊ូគឺមិច ស្រាប់តែលេចមុខជនសង្ស័យចំនួន ២នាក់
ស្លៀកពាក់ស៊ីវិល ជិះម៉ូតូស៊េរីទំនើបមួយគ្រឿង មកក្បែរនារីរងគ្រោះ ហើយបានធ្វើសកម្មភាពធាក់នារីរងគ្រោះបានឲ្យដួលទៅថ្នល់ រួចពួកគេបានប្លន់ដំណ្តើរយកម៉ូតូពីនារីនោះជិះ គេចខ្លួនបាត់ស្រមោលភ្លាមៗ។ ក្រោយកើតហេតុនារីខាងលើបានស្រែកឆោឡោបង្កាការភ្ញាក់ផ្អើលដល់សមត្ថកិច្ចមូលដ្ឋាន ចុះមកអន្តរា គមន៍ដល់កន្លែងកើតហេតុ បានត្រឹមនាំនាងទៅដាក់
ពាក្យបណ្តឹងនៅទីស្នាក់ការនគរបាលប៉ុស្តិ៍ស្រះចកតែប៉ុណ្តោះ ។ ពាក់ព័ន្ធនឹងករណីប្លន់នេះសមត្ថកិច្ចមូលដ្ឋានបានសន្និដ្ឋានថា ក្រុមចោរប្លន់គឺជាមនុស្សធ្លាប់ស្គាល់ គ្នាជាមួយនឹងនារីរងគ្រោះ នេះបើតាមការរៀបរាប់របស់នារីរងគ្រោះប្រាប់ពីភិនភាគជនល្មើស ៕ 
