ភ្នំពេញៈ ដើម្បីចូលរួមអបអរសាទរដល់ស្ត្រីដែលទើបតែសម្រាលកូន ដោយទទួលបានសមាជិកថ្មីមករួមរស់នៅក្នុងក្រុមគ្រួសារ និងចូលរួមនូវការរំលែកទុក្ខដល់ក្រុមគ្រួសារមួយចំនួនផ្សេងទៀត ដែលសមាជិកបានមរណៈភាពនោះ ថវិការមូលនិធិរបស់សម្តេចក្រឡាហោមសខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ត្រូវបាននាំយកទៅផ្តល់ជូនដល់ប្រជាពលរដ្ឋសរុបចំនួន៦១គ្រួសារ ដោយក្នុង១គ្រួសារទទួលបាន២០ម៉ឺនរៀល ស្ថិតក្នុងឃុំពពឺស ស្រុកស្វាយអន្ទរ ខេត្តព្រៃវែង តាមរយះ ឯឧ ប៉ុល ពិធេយ្យ ប្រធានក្រុមការងារថ្នាក់ជាតិចុះជួយឃុំពពឺស រួមជាមួយនឹងក្រុមការងារ នាព្រឹកថ្ងៃទី២៩ ខែមករា ឆ្នាំ២០១៦ ។
ក្នុងឱកាសចុះដល់ខ្នងផ្ទះប្រជាពលរដ្ឋ ឯឧ ប៉ុល ពិធេយ្យ បានផ្តាំផ្ញើរនូវការសាកសួរសុខទុក្ខពីសំណាក់សម្តេចក្រឡាហោមសខេង និងបានសម្តែងនូវក្តីសប្បាយរីករាយចំពោះក្រុមគ្រួសារស្ត្រីដែលទើបតែសម្រាលកូនចំនួន៥១គ្រួសារ បានសម្រាលកូនដោយសុវត្ថិភាព និងទទួលបាននូវសមាជិកថ្មីមករួមរស់នៅក្នុងក្រុមគ្រួសារបន្ថែមទៀត ។ មិនតែប៉ុណ្ណោះឯឧ ក៏បានចូលរួមនូវការរំលែកទុក្ខយ៉ាងក្រៀមក្រំ ចំពោះប្រជាពលរដ្ឋចំនួន១០គ្រួសារ ដែលបានបាត់បង់សមាជិកជាទីស្រឡាញ់របស់ខ្លួន ត្រូវជាឳពុក ម្តាយ បងប្អូន និងកូន ដែលបានទទួលមរណៈភាពផងដែរ ។ កាយវិការមនុស្សធម៌នេះ បានបង្ហាញឱ្យឃើញពីការយកចិត្តទុក្ខដាក់របស់ថ្នាក់ដឹកនាំជាន់ខ្ពស់របស់រាជរដ្ឋាភិបាល ជាពិសេសសម្តេចក្រឡាហោមសខេង ដែលតែងតែបានគិតគូរ និងយកចិត្តទុកដាក់ជាមួយបងប្អូនប្រជាពលរដ្ឋនៅក្នុងមូលដ្ឋាន ដោយមិនប្រកាន់និន្នាការនយោបាយ ពណ៍សម្បុរ ឬសាសនាអ្វី នោះទេ។ ឯកឧត្តមប្រធានក្រុមការងារបន្តថា សកម្មភាពទាំងនេះ គឺជាការផ្តួចផ្តើមគំនិតរបស់សម្តេចក្រឡាហោមសខេង ដើម្បីឱ្យក្រុមការងារទាំងអស់មានទំនាក់ទំនងកាន់តែជិតស្និត និងនៅជិតប្រជាពលរដ្ឋ ហើយឯកឧត្តមក៏បានណែនាំឱ្យស្ត្រីដែលទើបតែសម្រាលកូនទាំងអស់ ត្រូវចេះថែរក្សាសុខភាពខ្លួន និងកូនឱ្យបានល្អ ទៅចាក់ថ្នាំការពារជំងឺផ្សេងៗជាប់ជាប្រចាំ ហើយសកម្មភាពនេះនឹងតែបន្តធ្វើដូចភ្លៀងរលឹម ។ប្រជាពលរដ្ឋដែលបានទទួលអំណោយជាថវិការ នាពេលនេះ បានសម្តែងនូវក្តីសប្បាយរីករាយ និងថ្លែងអំណរគុយយ៉ាងជ្រាលជ្រៅបំផុត ចំពោះសម្តេចក្រឡាហោមសខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងក្រុមការងារទាំងអស់នូវការយកចិត្តទុកដាក់ដែលធ្វើឱ្យពួកគាត់ មានភាពកក់ក្តៅចំពោះពួកគាត់ និងកូនៗ ដែលមិនអាចបំភ្លេចឡើយ ៕