ខេត្តព្រះវិហារសេចក្តីរាយការណ៍បានអោយដឹងថាប្រជាពលរដ្ឋប្រមាណ១០០នាក់បាននាំកេណ្ឌគ្នាព័ទ្ធជិតមិនអោយសមត្ថកិច្ចជំនាញមេព្រៃចាកចេញពីបរិវេណលំនៅដ្ឋានមួយកន្លែងស្ថិតនៅភូមិពោធិ៍ឃុំពោធិ៍ស្រុកត្បែងមានជ័យខណះក្រុមសមត្ថកិច្ចចុះទៅបង្ក្រាបរឹបអូសឈើគគីរមួយចំនួនកាលពីវេលាម៉ោង៨ព្រឹកថ្ងៃទី០២កុម្ភះ២០១៦។
ភ្នាក់ងារបានអោយដឹងថាលោកនួនសុខុមនាយរងខណ្ធរដ្ឋបាលព្រៃឈើព្រះវិហាបានដឹកនាំកំលាំងមេព្រៃប្រមាណ១០នាក់ចុះទៅកាន់លំនៅដ្ឋានពលរដ្ឋមួយកន្លែងដែលមានស្តុកទុកឈើតាប់គគីរមុខធំៗប្រវែង៣ម៉ែត្រចំនួន៥សន្លឹកនិងឈើមូលមួយចំនួនទៀត។សព្វថ្ងៃនេះតាមដឹងពីឈ្មួញឈើគឺតំលៃហាងឆេងឈើគគីរខ្នាតមុខ១ម៉ែត្រកម្រាស់ជាង១តឹកប្រវែង៣ម៉ែត្រថ្លៃចាប់ពី១០០០ទៅ១៥០០ដុល្លារអាមេរិកឯណោះ។
ប្រភពបន្តថាខណះជំនាញមេព្រៃកំពុងសួរនាំម្ចាស់ឈើដើម្បីធ្វើកំណត់ហេតុស្រាប់តែផ្អើលប្រជាពលរដ្ឋក្នុងភូមិប្រមាណ១០០នាក់មកព័ទ្ធលំនៅដ្ឋានជិតមិនអោយមេព្រៃរឹបអូសយកវត្ថុតាងឈើទាំងនោះទ្បើយ។ក្នុងទីតាំងកើតហេតុមានជំនាញមេព្រៃច្រើននាក់និងរថយន្ត១គ្រឿងថែមទៀត។
ភ្នាក់ងារនិយាយថាដោយឃើញស្ថានភាពរញ៉េរញ៉ៃមិនស្រួលនោះខាងជំនាញមេព្រៃបានទាក់ទងទូរស័ព្ទហៅកំលាំងសមត្ថកិច្ចនគរបាលនិងប៉េអឹមខេត្តមកជួយអន្តរាគមន៍ទើបពេលនោះភាគីមន្ដ្រីរដ្ឋបាលព្រៃឈើបានចាកចេញទៅវិញដោយសុវត្ថិភាព។
លោកប៊ូគឹមទ្បេងមន្ដ្រីរដ្ឋបាលព្រៃឈើត្បែងមានជ័យបានអោយដឹងថាពិតមានករណីប្រជាពលរដ្ឋព័ទ្ធកំលាំងជំនាញមេព្រៃប្រាកដមែនដែលមានលោកនួនសុខុមនាយរងខណ្ឌរដ្ឋបាលព្រៃឈើព្រះវិហារដឹកនាំសហការីរួមមានមន្ដ្រីផ្នែករដ្ឋបាលព្រៃឈើត្បែងមានជ័យនិងមន្ដ្រីសង្កាត់រដ្ឋបាលព្រៃឈើត្បែងមានជ័យ។កំលាំងជំនាញមេព្រៃត្រូវបានពលរដ្ឋក្នុងភូមិព័ទ្ធជាប់ក្នុងលំនៅដ្ឋានប្រជាពលរដ្ឋមួយកន្លែងនៅភូមិពោធិ៍ឃុំពោធិ៍ស្រុកត្បែងមានជ័យ។
លោកនិយាយថាក្នុងបរិវេណលំនៅដ្ឋាននោះឃើញមានស្តុកទុកឈើគគីរមុខ១ម៉ែត្រកម្រាស់ជាង១តឹកចំនួន៤សន្លឹកប្រវែង៣ម៉ែត្រទាំងអស់និងឈើមូល១កំណាត់។ឈើទាំងនោះមិនត្រូវបានបង្ក្រាបរឹបអូសនោះទេដោយសារក្រុមការងារបានដកថយទៅអង្គភាពរៀងៗខ្លួនវិញ។
គួររំលឹកថាករណីដូចគ្នានេះកើតទ្បើងចំនួន៣ដងដែលលើកទី១កាលពីដើមឆ្នាំ២០១៤នៅភូមិក្តាក់ឃុំត្បែង២ស្រុកគូលែនខេត្តព្រះវិហារដែលកាលណោះប្រជាពលរដ្ឋប្រមាណ៣០០នាក់នាំគ្នាលីសុទ្ធតែកាំបិតផ្គាក់និងពូថៅទៅព័ទ្ធជំនាញមេព្រៃត្បែងមានជ័យកន្លះថ្ងៃដល់យប់មិនអោយរឹបអូសយកឈើប្រណីតធ្នង់នាងនួនប្រមាណ២០ម៉ែត្រគូបហើយបង្កអោយជំនាញមេព្រៃភ័យតក់ស្លុតថែមទៀត។
លើកទី២កើតទ្បើងកាលពីចុងឆ្នាំ២០១៥នៅភូមិពោធិ៍ដូចគ្នាដោយស្ដ្រីម្ចាស់ឈើរារាំងមិនអោយមេព្រៃររឹបអូសយកឈើហើយថែមទាំងចោទថាប៉េអឹមបានវាយគាត់ទាំងខ្លួនកំពុងមានផ្ទៃពោះទៀតផងសរុបទៅវាកើតទ្បើងចំនួន៣ដងហើយទាំងលើកនេះដោយបរាជ័យទាំង៣លើកក្នុងការបង្ក្រាបរឹបអូសបទល្មើសព្រៃឈើ៕
