ភ្នំពេញ៖ជនត្រូវជាប់សង្ស័យចំនួន៣នាក់ បានជិះម៉ូតូ១គ្រឿងមកធ្វើសកម្មភាពប្លោះរបងប៉ុនប៉ងចូលលួចទ្រព្យសម្បត្តិផ្សេងៗពីរផ្ទះរបស់ជនរងគ្រោះ ប៉ុន្តែត្រូវជនរងគ្រោះឃើញទាន់ស្រែកផ្អើលឆោរឡោរដល់ប្រជាពលរដ្ឋដែលនៅជិតនោះនិងកម្លាំងនគរបាលប៉ុស្ដិ៍ស្វាយប៉ាកមកអន្តរាគមន៍ចាប់ខ្លួនជនត្រូវជាប់សង្ស័យបានម្នាក់ភ្លាមៗខណៈ២នាក់ទៀតដែលជាបក្សពួកបានបើកម៉ូតូជិះរត់គេចខ្លួនបាត់ស្រមោល ។
ហេតុការណ៍ខាងលើបានកើតឡើងនៅវេលាម៉ោង០៣និង៣០នាទីរសៀលថ្ងៃទី០៣ ខែ កុម្ភះ ឆ្នាំ ២០១៦ នៅចំណុចផ្ទះគ្មានលេខ ក្រុមទី8 ភូមិស្វាយប៉ាក សង្កាត់ស្វាយ ខណ្ឌឫស្សីកែវ ។
អធិការរងខណ្ឌឫស្សីកែវ លោកអ៉ីវ ឈុនភេង បានឲ្យដឹងថាជនរងគ្រោះឈ្មោះរ៉េន ភិរុណ ភេទប្រុស អាយុ ២៥ឆ្នាំ មានមុខរបរ ជាអ្នកសារព័ត៌មាន ស្នាក់នៅ ចំណុចកើតហេតុខាងលើ ។រីឯជនសង្ស័យត្រូវឃាត់ខ្លួនឈ្មោះហ្វី សុខលី ភេទប្រុស អាយុ១៩ឆ្នាំ មុខរបរមិនពិតប្រាកដ ស្នាក់នៅ សង្កាត់ច្រាំងចំរេះទី១ ខណ្ឌឫស្សីកែវ ចំណែកបក្សពួក២នាក់ទៀតដែលកំពុងរត់គេចខ្លួន១ឈ្មោះគ្រីម ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅសង្កាត់ច្រាំងចំរេះទី១ ខណ្ឌឫស្សីកែវ ២ឈ្មោះវិត ហៅភ្លោះ អាយុ១៩ឆ្នាំ មុខរបរលក់ត្រី ស្នាក់នៅសង្កាត់ច្រាំងចំរេះទី១ ខណ្ឌឫស្សីកែវ ។លោកអធិការរងបានបន្តថា មុនកើតហេតុជនសង្ស័យ៣នាក់បានជិះម៉ូតូViVA១គ្រឿងដោយមិនចាំស្លាកលេខមកឈប់នៅក្បែរចំណុចផ្ទះកើតហេតុដោយជនត្រូវជាប់សង្ស័យឈ្មោះហ្វី សុខលី ជាអ្នកចាំមើលផ្លូវនិងបក្សពួក២នាក់ទៀតបានប្លោះរបងផ្ទះបំរុងចូលលួចក៍ត្រូវម្ចាស់ផ្ទះឃើញទាន់ស្រែកផ្អើលឆោរឡោរដល់អ្នកជិតខាងនិងកម្លាំងសមត្ថកិច្ចមូលដ្ឋានមកជួយអន្តរាគមន៍ចាប់ខ្លួនឈ្មោះហ្វី សុខលី បានភ្លាមៗដោយឡែកបក្សពួក២នាក់ទៀតភ័យស្លន់ស្លោបានជិះម៉ូតូរត់គេចខ្លួនបាត់ស្រមោលតែម្ដង។សូមបញ្ជាក់ថា ជនត្រូវជាប់សង្ស័យម្នាក់កំពុងសួរនាំនិងឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌឫស្សីកែវដើម្បីរៀបចំកសាងសំនុំរឿងបញ្ជូនខ្លួនបន្តទៅតុលាការចាត់ការតាមនិតិវិធីច្បាប់ព្រមទាំងបន្តស្រាវជ្រាវស្វែងរកចាប់ខ្លួនបក្សពួកជនសង្ស័យចំនួន២នាក់ទៀតដែលកំពុងរត់គេចខ្លួន។ ដោយ ប៊ុន ធី