ខេត្តបន្ទាយមានជ័យ ៖ សាច់ជ្រូក និងកោះមាន់ ព្រមទាំងប្រហិតថៃត្រូវបានឈ្មួញដឹកតាមរទេះនាំចូលតាមច្រកទ្វារអន្តរជាតិប៉ោយប៉ែតមកស្តុកទុកដើម្បីដឹកចេញតាមរថយន្តទៅលក់នៅក្រុងប៉ោយប៉ែត ឬតាមបណ្តាខេត្តនានាក្នុងប្រទេសកម្ពុជាជារៀងរាល់ថ្ងៃនៅចំណុចអតីតផ្សាររ៉ាចាស់ ស្ថិតក្នុងភូមិប៉ោយប៉ែត សង្កាត់ និងក្រុងប៉ោយប៉ែត តែគ្មានមន្ត្រីជំនាញណាម្នាក់ទប់ស្កាត់ឡើយ។
កម្មករអូសរទេះដែលដឹកសាច់ជ្រូក និងកោះមាន់ខាងលើនិយាយថា សាច់ទាំងអស់ជារបស់ឈ្មួញម្នាក់ឈ្មោះហេងឱ្យខ្លួនជ្រែចេញពីប្រទេសថៃ ប៉ុន្តែគេមិនប្រាប់ពីការនាំចូលតាមច្រកណានោះទេ ហើយមួយសប្តាហ៍នាំចូលម្តង។ តាមប្រភពពីកន្លែងកើតហេតុបានឱ្យដឹងថា ទីតាំងអតីតផ្សាររ៉ានេះមានឈ្មួញលួចនាំចូលសាច់មាន់ ជង្គង់មាន់តាមរទេះបង្កប់ក្រោមទំនិញមកលើកដាក់រថយន្តនៅទីនោះស្ទើររៀងរាល់ថ្ងៃមិនខ្លាចញញើតសមត្ថកិច្ចជំនាញឡើយ។
កម្មករដែលជាអ្នកដឹកសាច់ទាំងអស់ខាងលើបន្តថា សាច់ជ្រូកសរុបប្រហែលជាង៣០០គីឡូក្រាម ក្នុងនោះក៏មានទាំងកោះមាន់ជាច្រើនថង់ផងដែរ។ ក្រៅពីសាច់ជ្រូក និងកោះមាន់នៅរទេះមួយផ្សេងទៀតគេឃើញមានប្រហិតត្រី និងប្រហិតផ្សេងៗជាច្រើនទៀត មិនដឹងថា ជារបស់ខូចគុណភាពឬអត់ទេ។ ជុំវិញព័ត៌មានខាងលើនេះលោកហ៊ុយ ទូច
ប្រធានការិយាល័យផលិតកម្មបសុព្យាបាលខេត្តបានប្រាប់តាមទូរស័ព្ទថា បើការនាំចូលសាច់ទាំងនេះពីថៃគ្មានវិញ្ញាបនបត្រ ឬមិនបានសុំគោលការណ៍អនុញ្ញាតពីក្រសួងកសិកម្ម ឬចុះបញ្ជីការពីក្រសួងពាណិជ្ជកម្មទេ វាជាករណីខុសច្បាប់ទាំងស្រុង៕ 
