ខេត្តសៀមរាប៖កម្លាំងកងរាជអាវុធហត្ថខេត្តបានចុះប្រតិបត្តិក្រោមការបញ្ជាដឹកនាំផ្ទាល់ដោយលោកឧត្តមសេនីយត្រី ប៉ោ វណ្ណនិត មេបញ្ជាការកងរាជអាវុធហត្ថខេត្ត បានឱ្យកម្លាំងក្រោមឱវាទដឹកនាំដោយលោកវរសេនីយ៍ ថា ដាលុច ប្រធានមន្ទីរយុត្តិធម៌ កងរាជអាវុធហត្ថខេត្តបានឱ្យលោកអនុសេនីយ៍ ធាវ ច័ន្ទតារា នាយការិយាល័យកងរាជអាវុធហត្ថប្រឆាំងគ្រឿងញៀនខេត្ត ចុះព័ទ្ធចាប់ មុខសញ្ញាចែក ចាយប្រើប្រាស់ គ្រឿងញៀន យ៉ាងសកម្ម នៅ៣ចំនុចផ្សេងគ្នាក្នុងក្រុងសៀមរាប បានជាបន្តបន្ទាប់ រហូតឈានដល់ឃាត់ខ្លួនបានជនសង្ស័យចំនួន៧នាក់និងវត្ថុតាង នាំយកមកការិយាល័យប្រឆាំងគ្រឿងញៀនខេត្ត ដើម្បីសួរនាំ។
ហេតុការចុះប្រតិបត្តិការបង្ក្រាបរហូតឈានដល់ធ្វើការឃាត់ខ្លួនបានជនសង្ស័យ៧នាក់ធ្វើឡើងនៅថ្ងៃទី៤កុម្ភៈ ២០១៦ស្ថិតនៅ៣ចំនុចផ្សេងគ្នា ក្នុងសង្កាត់ស្វាយដង្គំ២កន្លែងនិង សង្កាត់ស្លក្រាម១កន្លៃង ក្នុងក្រុង/ខេត្តសៀមរាប ខណៈពួកគេកំពុងចែកចាយតាមផ្លូវសាធារណៈនិងនៅក្នុងផ្ទះបន្ទប់ខារ៉ាអូខេ ។
លោកអនុសេនីយ៍ ធាវ ច័ន្ទតារា នាយការិយាល័យកងរាជអាវុធហត្ថប្រឆាំងគ្រឿងញៀនខេត្ត បានធ្វើ ការឃាត់ខ្លួនបាន ៧នាក់ មានទី១/ឈ្មោះ ប៊ុន ធឿន ភេទប្រុសអាយុ២៥ឆ្នាំមុខរបរបុគ្គលិកផ្ទះសំណាក់ រស់នៅភូមិវត្តបូព៌ សង្កាត់សាលាកំរើក(ជួញដូរ)ទី២/ឈ្មោះ វ៉ឹន រ៉ូ ភេទប្រុសអាយុ១៨ឆ្នាំមុខរបរកម្មករសំណង់ មានទីលំនៅភូមិអូរ ឃុំកណ្តែក ស្រុកប្រាសាទបាគង(ជួញដូរ) ទី៣/ឈ្មោះ ហេង សំណាង ភេទប្រុសអាយុ១៧ឆ្នាំមុខរបរកម្មករសំណង់(ជួញដូរ) រស់នៅភូមិតាភុល សង្កាត់ស្វាយដង្គំ ទី៤/ ឈ្មោះ ដូង ហុងលាង ភេទប្រុសអាយុ១៧ឆ្នាំមុខរបរជាងពិដាន (ប្រើប្រាស់) ស្នាក់នៅភូមិមណ្ឌល៣ សង្កាត់ស្លក្រាម ទី៥/ឈ្មោះ សា នឿន ភេទប្រុសអាយុ២៨ឆ្នាំមុខរបរចុងភៅ រស់នៅភូមិជន្លង់ សង្កាត់សាលាកំរើក(ជួញដូរ) ទី៦/ឈ្មោះ សុខ ចាន់រ័ត្នហេង ភេទប្រុសអាយុ១៦ឆ្នាំមុខរបរមិនពិត មានទីលំនៅភូមិចុងកៅស៊ូ សង្កាត់ស្លក្រាម (ប្រើប្រាស់)និង ទី៧/ឈ្មោះ ណាត់ ម៉ារី ភេទប្រុសអាយុ៣០ឆ្នាំមុខរបរអ្នកសារព័ត៌មាន ក្រុងកម្ពុជា ប្រចាំសៀមរាប រស់នៅភូមិចុងកៅស៊ូ សង្កាត់ស្លក្រាម(ជួញដូរ)។ក្រោយពីធ្វើការឃាត់ខ្លួនបានជនសង្ស័យខាងលើកម្លាំងជំនាញបានធ្វើការដកហូតវត្ថុតាងមាន៖ ទូរស័ព្ទចំនួន៧គ្រឿង,ម្ស៉ៅមេតំហ្វេតាមីន(ម៉ាទឹកកក)ចំនួន១២កញ្ចប់ ទម្ងន់ស្មើ៤.៣៣ក្រាម ម៉ូតូចំនួន៣គ្រឿង ព្រមទាំងឧបករណ៍វិចខ្ចប់សំរាប់លក់និងប្រើប្រាស់មួយចំនួន។
បច្ចុប្បន្ន កម្លាំងជំនាញកងរាជអាវុធហត្ថខេត្តបានធ្វើការកសាងសំណុំរឿង បញ្ជូនទាំងជនសង្ស័យចំនួន៧នាក់ រួមទាំងវត្ថុតាងទៅតុលាការនៅរសៀលថ្ងៃទី០៥ខែកុម្ភៈឆ្នាំ២០១៦ ដើម្បីចាត់ការតាមនិតិវិធី។
គួរំលឹកផងដែរថា បន្ទាប់ពីធ្វើការចុះបង្ក្រាបករណីជួញដូរនិងប្រើប្រាស់នៅសារធាតុនៅដើមខែមករាឆ្នាំ២០១៦ចាប់ពីថ្ងៃទី០១ ខែមករា ដល់ថ្ងៃទី០៤ខែកុម្ភៈឆ្នាំ២០១៦ កម្លាំង ការិយាល័យបទល្មើសគ្រឿងញៀននៃកងរាជអាវុធហត្ថខេត្តសៀមរាប បានបង្ក្រាប បាន២៦លើក ឃាត់ខ្លួនបានមនុស្សចំនួន១១៣នាក់ ក្នុងនោះ ស្រីចំនួន៥នាក់(ជួញដូរ)និងដកហូតបានថ្នាំញៀនប្រភេទម៉ាទឹកកកចំនួន១២៥កញ្ចប់ ស្មើនឹងទម្ងន់៦៣.៨៣ក្រាម និងថ្នាំញៀនប្រភេទWYចំនួន៤៨គ្រាប់ និងទូរស័ព្ទដៃ ចំនួន១២១ បញ្ជូនទៅតុលាការទាំងអស់៕