ខេត្តឧត្តរមានជ័យ៖ក្មេងស្ទាវទំនើង១ក្រុមមានគ្នា៤នាក់ ត្រូវបាននគរបាលចាប់ខ្លួនយកទៅសួរនាំ ក្រោយ ពីពួកគេបានធ្វើសកម្មភាពដេញវាយកាប់ចាក់គ្នាដូចកុនហុងកុងនិងយកដុំថ្មទៅគប់ លើកញ្ចករថយន្តដែលដឹកសិស្សសាលា យ៉ាងអណាធិបតេយ្យប្រសេចប្រសាច ពេញផ្លូវ នៅចំនុចលើផ្លូវលេខ១៧១ផ្លូវបំបែកជាបួន ស្ថិតនៅក្នុងភូមិទួលប្រាសាទ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ កាលពីវេលាម៉ោង១០និង២០នាទីថ្ងៃទី៥ ខែកុម្ភះ ឆ្នាំ២០១៦។
សមត្ថកិច្ចបានឲ្យដឹងថាក្មេងទំនើងទាំង៤នាក់ -១ឈ្មោះទួន វណ្ណ ឡាក់ ភេទប្រុស អាយុ១៨ឆ្នាំរស់នៅភូមិជើងភ្នំ ឃុំត្រពាំងប្រិយ៍ ស្រុកអន្លង់វែង ២/ឈ្មោះចំរ៉ុង បញ្ញា ហៅញ៉ា ភេទប្រុសអាយុ១៨ឆ្នាំ រស់នៅភូមិថ្នល់កែង ឃុំអន្លង់វែង ស្រុកអន្លង់វែង.៣/ឈ្មោះ អិន គុណ ហៅគុណ ភេទប្រុស អាយុ២០ឆ្នាំ រស់នៅភូមិលំទងថ្មី ស្រុកអន្លង់វែង ៤/ឈ្មោះ ឡុង វរះយុទ្ធ ហៅយុទ្ធ ភេទប្រុសអាយុ១៦ឆ្នាំ រស់នៅភូមិលំទងថ្មី ស្រុកអន្លង់វែង ខេត្តឧត្តរមានជ័យ អ្នកទាំង៤នោះ ជាសិស្សសាលាអន្លង់វែងទាំងអស់។
លោកវរសេនីយ៍ទោ សុីម វណ្ណេះ អធិការនគរបាលស្រុក បានឲ្យដឹងនៅថ្ងៃទី០៥ ខែកុម្ភះ ឆ្នាំ២០១៦ នេះថា ការឃាត់ខ្លួនក្មេងទំនើងទាំង៤នាក់ ខាងលើគឺសមត្ថកិច្ចយើងធ្វើឡើង ក្រោយពីពួកគេបានធ្វើសកម្មភាពដេញវាយកាប់ចាក់គ្នាយ៉ាងអនាធិបតេយ្យលើដងផ្លូវនិងយកដុំថ្មទៅគប់រថយន្តរបស់គេ។លោកបានចាត់ទុកថា សកម្មភាពរបស់ ពួកគេគឺជារឿងអសន្តិសុខដល់ការរស់នៅរបស់ប្រជាពលរដ្ឋនិងសង្គមជាតិ។
បច្ចុប្បន្នក្មេងទំនើងទាំង៤នាក់ ត្រូវនគរបាលឃាត់ខ្លួនបណ្តោះអាសន្នដើម្បសួរនាំ និងអប់រំឲ្យ គេឲ្យយល់ពីច្បាប់ដើម្បីបញ្ឈប់សកម្មភាពអាវ៉ាសែរបស់ពួកគេ និងប្រគល់ទៅឲ្យអាណាព្យាបាលយកទៅ អប់រំបន្ត តែបើក្នុងករណីមិនរៀងចាល់ និងត្រូវឃាត់ខ្លួនកសាងសំណុំរឿងបញ្ជូនទៅតុលាការចាត់ការ តាមច្បាប់៕