ខេត្តសៀមរាប៖ មជ្ឈដ្ឋានមហាជនរស់នៅក្រុងសៀមរាប បានបង្ហាញទស្សនៈរបស់ខ្លួនថា បើតាមការរៀបចំតុបតែងដ៏តិចតួចនៃសណ្ឋាគារនានាក្នុងក្រុងសៀមរាប ដើម្បីអបអរបុណ្យចូលឆ្នាំថ្មី ចូលឆ្នាំចិន ឆ្នាំ២០១៦នេះ ប្រហែលជាមានភ្ញៀវទេសចរចិនដ៏តិចតួចប៉ុណ្ណោះ ដែលបាន
ចូលមកកំសាន្តក្នុងក្រុងសៀមរាប និងទស្សនាឧទ្យានរមណីយដ្ឋានវប្បធម៌ ប្រវត្តិសាស្ត្រ-អង្គរ ។ ទស្សនៈមជ្ឈដ្នានមហាជនទាំងនោះ បានវិភាគថា ៖ ការសែនព្រលឹងដូនតាក្នុងថ្ងៃចូលឆ្នាំចិន គឺសំខាន់ណាស់សម្រាប់ប្រពៃណីជំនឿរបស់ប្រជាជនចិន ដូច្នេះភ្ញៀវទេសចរចិន មិនអាចធ្វើទស្សនាចរណ៍ កំសាន្តឆ្លងប្រទស នោះឡើយ ។
នៅថ្ងៃទីពីរ នៃថ្ងៃចូលឆ្នាំចិន ត្រូវនឹងថ្ងៃទី០៨ ខែកុម្ភៈ ឆ្នាំ២០១៦ មន្ទីរជំនាញខាងទេសចរណ៍ ពុំទាន់បានចេញរបាយការណ៍បូកសារុបចំនួនភ្ញៀវទេសចរណ៍ ដែលបានចូលកំសាន្តនៅក្នុងតំបន់សៀមរាប-អង្គរនៅឡើយនោះទេ ក៏ប៉ុន្តែការបង្ហាញក្រៅផ្លូវការ ឲ្យទូរទស្សន៍BTVបានដឹង ដោយអ្នកគ្រប់គ្រងសណ្ឋាគារមួយចំនួននៅក្រុងសៀមរាបបានបញ្ជាក់ថា ៖ រយៈពេល៣ថ្ងៃ នៃថ្ងៃចូលឆ្នាំចិន ( ថ្ងៃទី០៧ ទី៨ និងថ្ងៃទី០៩ ខែកុម្ភៈ )នេះ គ្រប់បណ្តាសណ្ឋាគារទាំងអស់នៅក្នុងក្រុងសៀមរាប ពេញដោយភ្ញៀវទេសចរចិន ។
ជាមួយនឹងការបង្ហាញឲ្យដឹងខាងលើ នៅតាមបណ្តាទីកន្លែងថតរូបអនុស្សាវរីយ៍ និងនៅតាមបណ្តាប្រាង្គប្រាសាទនានា នៃឧទ្យានប្រវត្តិសាស្ត្រអង្គរ ជាពិសេសនៅប្រាសាទអង្គរវត្ត សម្រាប់ថ្ងៃច័ន្ទ ថ្ងៃទី២ នៃថ្ងៃចូលឆ្នាំចិន (ឆ្នាំ២០១៦) គេសង្កេតឃើញមានវត្តមានភ្ញៀវទេសចរណ៍ជាតិនិងអន្តរជាតិ ជាពិសេសគឺភ្ញៀវទេសចរចិន ស្ថិតក្នុងចំនួនគួរឲ្យកត់សម្គាល់ ។
ដោយឡែកអំពីការកត់សម្គាល់នៃចំនួនភ្ញៀវទេសចរជាតិនិងអន្តរជាតិ ចូលទស្សនាអង្គរសៀមរាប នាថ្ងៃបុណ្យចូលឆ្នាំចិន គេក៏សង្កេតឃើញផងដែរទិដ្ឋភាពក្នុងក្រុងសៀមរាប ។ ហាងលក់ទំនិញ ឬក៏ផ្ទះបើធ្វើអាជីវកម្មផ្សេងៗ ប្រមាណជា៣៥% ត្រូវបានបិទទ្វារសម្រាកការលក់ដូរ ។ គេកត់សម្គាល់ផងដែរថា បណ្តាហាងអាជីវកម្មផ្សេងៗ ដែលទាក់ទងទៅនឹងសេវាកម្មទេសចរណ៍ ជាពិសេសនោះគឺភោជនីយដ្ឋាន គឺមិនសម្រាកការលក់ដូររបស់ខ្លួនឡើយ ។ បើទោះជាយ៉ាងណា នៅតាមបណ្តាដងវិថីនានា ស្ថិតក្នុងស្ថានភាពមិនស្ងាត់ពេកនោះទេ ក៏ប៉ុន្តែនៅតាមដងផ្លូវទៅកាន់រមណីយដ្ឋានអង្គរ នាព្រឹកថ្ងៃទី០៨កុម្ភៈ មានសភាពកុះករខ្លាំង ។
នៅក្នុងផ្សារលើធំថ្មី ចាប់ពីម៉ោង៩ព្រឹក មានសភាពស្ងាត់ជាងថ្ងៃធម្មតា ។ តូបលក់ដូរ ប្រមាណជា ៦០% ត្រូវបានបិទទ្វារ ។ អ្នកលក់បន្លែ ត្រី សាច់ និងអ្នកលក់គ្រឿងទេស និយាយថា ៖ មុនចូលឆ្នាំចិន រហូតដល់ថ្ងៃសែន គឺលក់ដាច់ខ្លាំងណាស់ ក្រោយថ្ងៃសែន លក់ដាច់តិចៗ រហូតដល់បញ្ចប់ថ្ងៃចូលឆ្នាំ ទើបលក់ដាច់ឡើងវិញ ។ ចំណែកឯអ្នកលក់ផ្លៃឈើនិយាយថា ៖ ក្រោយថ្ងៃសែន ស្ងាត់ភ្ញៀវខ្មែរ តែភ្ញៀវទេសចរ នៅតែមានតម្រូវការមកទិញផ្លែឈើរបស់ពួកគាត់ ៕
