ខេត្តប៉ៃលិន៖ បុរសម្នាក់បានរងរបួសធ្ងន់ ខណៈពេលជិះម៉ូតូម្នាក់ឯងក្នុងភាពស្រវឹង គ្រប់គ្រងស្មារតីខ្លួនឯងលែងបានក៏រេចង្កូតម៉ូតូធ្លាក់ផ្លូវ បណ្តាលអោយរងរបួសធ្ងន់ ដាច់អណ្តាតចេញមកក្រៅ សន្លប់បាត់បង់ស្មារតី កាលពីវេលាម៉ោង១៥និង៣៣នាទី ថ្ងៃទី០៨ ខែកុម្ភះ ឆ្នាំ២០១៦ លើ ចំនុចផ្លូវជាតិលេខ៥៧ ផ្លូវចោតចុះពីទួលខ្ពស់ ភូមិអូរអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ជនរងគ្រោះ ឈ្មោះ ម៉ឺយ ជំណូ ភេទប្រុស អាយុ ៤០ឆ្នាំ មុខរបរធ្វើចំការ រងរបួសធ្ងន់ ដាច់អណ្តាតចេញមកក្រៅ សន្លប់បាត់បង់ស្មារតី រស់នៅភូមិក្រចាប់លើ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
តាមសាក្សីនៅកន្លែងកើតហេតុ បានឲ្យដឹងថា៖ មុនពេលជួបគ្រោះថ្នាក់ខាងលើ គេឃើញជនរងគ្រោះជិៈម៉ូតូតែម្នាក់ឯងលើកំណាតផ្លូវជាតិលេខ៥៧ ក្នុងស្ថានភាពស្រវឹង លុះដល់ចំណុចផ្លូវចុះទូលក៏បានរេចង្កូតធ្លាក់ផ្លូវ ដួលបណ្តាលអោយរងរបួសធ្ងន់តែម្តង ។ ប្រភពព័ត៌ានបន្តថា៖ជនរងគ្រោះជិៈម៉ូតូ ម៉ាក់ Hongda Dream ព៌ណខ្មៅ សេរីឆ្នាំ ២០១៣ ពាក់ស្លាកលេខ បាត់ដំបង 1S-2604 រងការខូចខាតបន្តិចបន្តួច ដោយធ្វើដំណើរទាំងភាពស្រវឹង ក្នុងទឹសដៅពីកើតទៅលិច ។ ក្រោយពេលកើតហេតុ គេឃើញសាច់ញាតិជនរងគ្រោះមកដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្តបៃលិនភ្លាមៗផងដែរ ។ ប្រភពព័ត៌មានពីគ្រូពេទ្យ បានឲ្យដឹងថា៖ ជនរងគ្រោះត្រួវបានបញ្ជូនបន្តទៅមន្ទីរពេទ្យខេត្តបាត់ដំបងនៅវេលាម៉ោង៦ និង០០នាទីល្ងាចថ្ងៃដដែលផងដែរ ដោយសារស្ថានភាពជំងឺធ្ងន់ធ្ងរពេក ៕
