ខេត្តសៀមរាប យុវជននិងយុវនារីបង្គោលកាកបាទក្រហមកម្ពុជាចំនួន២០នាក់ មកពីវិទ្យាល័យចំនួន៥ នៅក្នុងក្រុងសៀមរាប ត្រូវបានទទួលយកនូវការបណ្តុះបណ្តាលរយៈពេល២ថ្ងៃ នៅវិទ្យាល័យ១០មករា ១៩៧៩ វគ្គបណ្តុះបណ្តាលនោះបានផ្តោតជាសំខាន់ទៅលើមេរៀន ស្តីអំពីមូលដ្ឋានគ្រឹះសុវត្តិភាពចរាចរណ៍ ពិការភាព និងការគាំពារកុមារ ។ កាកបាទក្រហមកម្ពុជាសាខាខេត្តសៀមរាប រៀបចំវគ្គបណ្តុះបណ្តាលនេះ ក្រោមការឧបត្ថម្ភដោយ Australian Aid និង កាកបាទក្រហមអូស្ត្រាលី ។
លោក ស៊ុំ សំអន នាយកប្រតិបត្តិ សាខាកាកបាទក្រហមកម្ពុជានៅខេត្តសៀមរាប បានបង្ហាញឲ្យដឹងនានាព្រឹកថ្ងៃទី០៩ ខែកុម្ភៈ ស្តីអំពីគោលបំណងនៃវគ្គបណ្តុះបណ្តាលនេះថា ៖ គឺដើម្បីផ្សព្វផ្សាយបច្ចុប្បន្នភាពច្បាប់ចរាចរណ៍ ការផាកពិន័យ និង វិធីសាស្ត្រធ្វើឲ្យមានសុវត្ថិភាពនៅលើដងផ្លូវ ។ ជាមួយគ្នានេះ សម្រាប់វគ្គសិក្សានេះផងដែរ គឺស្ថិតក្នុងគោលបំណង បង្កើនការយល់ដឹង អំពីគុណតម្លៃរបស់ជនពិការ បំផុសឲ្យយុវជនកាកបាទក្រហមកម្ពុជា អប់រំនឹងផ្តល់ឱកាសឲ្យយុវជនពិការ បានចូលរួមសកម្មភាពសង្គមជាខ្លួន ។ លោកបានបន្តថា ៖ មេរៀនទី៣ នៃវគ្គបណ្តុះបណ្តាលនេះ គឺផ្តល់ចំណេះដឹងចំពោះយុវជនកាកបាទក្រហមកម្ពុជា ចូលរួមទប់ស្កាត់ រាល់ការរំលោភបំពាន កេងប្រវ័ញ្ចកម្លាំងពលកម្ម និងផ្លូវភេទលើកុមារ ។
លោក ស៊ុំ សំអន បានគូសបញ្ចាក់បន្ថែមថា ៖ ទន្ទឹមនឹងការបណ្តុះបណ្តាល លើមេរៀនសំខាន់ៗទាំង៣ខាងលើ វគ្គបណ្តុះបណ្តាលនេះ ត្រូវបានពង្រឹងបន្ថែមលើវិធីសាស្ត្រសម្របសម្រួល ការទំនាក់ទំនង ដើម្បីបង្កើនគុណភាពនៃការផ្ទេរចំណេះដឹង និងផ្សព្វផ្សាយខ្លឹមសារមេរៀនខាងលើ បានទៅដល់មិត្តភក្តិ បងប្អូន អ្នកជិតខាងក្នុងសហគមន៍ និងអភិវឌ្ឍន៍ខ្លួនឯង ឲ្យក្លាយជាមនុស្ស មានសក្តានុពលក្នុងសង្គមជាតិ ។
លោកស្រី លុយ កូឡាប មន្ត្រីសម្របសម្រួលគម្រោងវគ្គបណ្តុះបណ្តាលកាកបាទក្រហមកម្ពុជា និយាយថា ៖ កាកបាទក្រហកម្ពុជាទទួលស្គាល់ថា កុមារគឺជាក្រុមដែលងាយរងគ្រោះបំផុតនៅក្នុងសង្គម ហើយថា ការធ្វើការជាមួយកុមារ គឺជាការទទួលខុសត្រូវដ៏សំខាន់ ។ គ្រប់ពេលវេលា កុមារមានសិទ្ធិទទួលបានសុវត្ថិភាពនិងត្រូវបានទទួលការការពារ ។
លោកស្រី បានពន្យល់ថា ៖ តាមរយៈគោលនយោបាយគាំពារកុមារ និងខ្លឹមសារនៃសៀវភៅមគ្គុទ្ទេសក៍ ស្តីអំពីការគាំពារកុមារ កាកបាទក្រហមកម្ពុជានឹងបង្កើតអង្គការសុវត្ថិភាពកុមារ និងលើកទឹកចិត្តយ៉ាងសកម្មដល់ការអនុវត្តការងារនេះ ។ កាកបាទក្រហមកម្ពុជាសង្ឃឹមថា កុមារនិងយុវជន នឹងត្រូវបានការពារពីគ្រោះថ្នាក់ និងទទួលបាននូវឱកាសទាំងអស់ សម្រាប់ការចូលរួមនៅក្នុងជីវិតរបស់ពួកគេនិងសហគមន៍របស់ពួកគេ ដើម្បីបានក្លាយជាអ្នកដឹកនាំដ៏មានប្រសិទ្ធិភាព និងជាអ្នកសម្រេចចិត្តនាពេលអនាគត ៕
