ខេត្តពោធិ៍សាត់: គ្រាប់បែកក្រឡាផ្លែទៀបចំនួន២គ្រាប់ត្រូវបានគេយកមកប្លុងចោលបង្ក ការភ្ញាក់ផ្អើល និងស្មុគស្មាញដល់ស្ថាប័នសមត្ថកិច្ចទូទាំងខេត្តពោធិ៍សាត់ កាលពីព្រឹកថ្ងៃទី៧ ខែកុម្ភៈ ឆ្នាំ២០១៦ ត្រង់ចំណុចក្បែរជើងសសរជង្រុកដាក់ស្រូវក្នុងបរិវេណផ្ទះរបស់ឈ្មោះ ចាវ វរ៉ូ ភេទប្រុស អាយុ៥៣ឆ្នាំ មុខរបរជាគ្រូបង្រៀន ស្ថិតក្នុងភូមិអន្លុងវិល ឃុំស្យា ស្រុកកណ្ដៀង ខេត្តពោធិ៍សាត់។
ប្រភពព័ត៌មានពីកម្លាំងអាវុធហត្ថបានឲ្យដឹងដែរថា គ្រាប់បែកដែលគេប្រទះឃើញហើយបង្កការភ្ញាក់ផ្អើលដល់ពលរដ្ឋ និងសមត្ថកិច្ចខាងលើនេះគឺម្ចាស់ផ្ទះបានប្រទះឃើញមុនគេដែលគេវេច ខ្ចប់ នឹងក្រណាត់ពណ៌សដ៏ស្អាតមួយ គ្រានោះគាត់បានទៅស្រាយកញ្ចប់មើលឃើញគ្រាប់បែក ក៏បានរត់បាតជើងសព្រាត ក៏មានការភ្ញាក់ផ្អើលដល់សំណាក់ប្រជាពលរដ្ឋជិតខាង ហើយបានរាយការណ៍មកសមត្ថកិច្ចតែម្ដង។
គ្រានោះកម្លាំងស្រុកបានទៅដល់ក៏បានឃើញពិតប្រាកដមែន ហើយសន្និដ្ឋានថា ជាប្រភេទគ្រាប់បែកក្រឡាផ្លែទៀបផលិតនៅប្រទេសសូវៀត ហើយវត្ថុតាងគ្រាប់បែកទាំង២គ្រាប់ត្រូវបាននគរបាលយកទៅរក្សាទុកជា បណ្ដោះអាសន្ន ដើម្បីបន្តតាមនិតិវិធី។
