កំពង់ធំៈ នៅតំបន់ប្រតិបត្តិការសឹករងកំពង់ធំ កាលពីព្រឹកថ្ងៃទី ១២ ខែកុម្ភះ ឆ្នាំ ២០១៦ មានពិធីបញ្ចុះបឋមសិលា សាងសង់អាគាមេបញ្ជាការងមួយខ្នង សម្រាប់បំរើក្នុងវិស័យការពារជាតិ ត្រូវបានសាងសង់ឡើង ស្ថិតនៅក្នុងទីបញ្ជាការតំបន់ប្រតិបត្តិការសឹកដែលមានទីតាំងភូមិត្រពាំងថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានឲ្យដឹងថា ការសាងសង់បន្ទាយ គឺជាការងារចាំបាច់បំផុត សម្រាប់ធ្វើការរបស់មេបញ្ជាការ និងមេបញ្ជាការង រួមទាំងការទំនាក់ទំនង កងកម្លាំង និងការទំនាក់ទំនងជាមួយមហាជន ដើម្បីឲ្យមានទីតាំងធ្វើការសមរម្យ និងការរៀបចំទុកដាក់នូវឯកសារសំខាន់ផងដែរ ក្នុងនោះក៏បានជម្រុញឲ្យ មេបញ្ជាការផ្នែកសឹករង គ្រប់ស្រុកក្រុងយកចិត្តទុក ដាក់ក្នុងការងារជួសជុល សាងសង់បន្ទាយឲ្យមានលក្ខណៈសមរម្យ និងមានអានាម័យជាកន្លែងកងកម្លាំង។
ឯកឧត្តម ឧត្តមសេនីយ៍ត្រី សោម ស៊ុន បានបន្តថា ការសាងសង់បន្ទាយនេះ គឺនៅតាមបណ្តាផ្នែកសឹករង ស្រុកក្រុង និងវរៈសេនាតូចលេខ ១ លេខ២ កំពុងតែត្រូវបានអនុវត្តយ៉ាងមមាញឹក ក្រោមការជំនួយឧបត្ថម្ភ ពីឯកឧត្តម អ៊ុត សំអន អភិបាលខេត្តកំពង់ធំ និងក្រុមហ៊ុន រួមទាំងសម្បុរជននានា ដែលបានលះបង់និងចំណាយថវិកាចូលរួមកសាងក្នុងវិស័យការពារជាតិ ក្នុងនោះដែរក៏មានការចង្អុលបង្ហាញពីឯកឧត្តម ជា ម៉ន មេបញ្ជាការងកងយោធពលខេមរៈភូមិន្ទ និងជាមេបញ្ជាការយោភូមិភាគទី៤ បានណែនាំឲ្យមានការ បើកវគ្គហ្វឹកហ្វឺន ដល់កងកម្លាំង ការងារចងសម្ព័ន្ឋមិត្តភាពជាមួយអាជ្ញាធរ និងប្រជាពលរដ្ឋ និងការរៀបចំ កសាងបន្ទាយ និងទីតាំងស្នាក់នៅរបស់កងកម្លាំងឲ្យបានសមរម្យ។
ជាក់ស្តែងក្នុងថ្ងៃនេះផងដែរ មេបញ្ជាការ និងមេបញ្ជាការង នាយផ្នែក នាយការិយាល័យ បានចូលរួមក្នុងពិធី បញ្ចុះបឋមសិលា ដែលត្រូវបានសាងសង់អាគាមេបញ្ជាការង ដែលមានទំហំ ៦.៥ គុណ២៥ម៉ែត្រ សម្រាប់ បំរើការងារក្នុងតំបន់ប្រតិបត្តិការសឹករងកំពង់ធំ ដែលត្រូវបានចាប់ផ្តើមបដិសន្ធិនៅថ្ងៃនេះផងដែរ។
ដោយ ប៊ុន រដ្ឋា