ភ្នំពេញៈ យប់ថ្ងៃទី១៥ ខែកុម្ភៈ ឆ្នាំ២០១៦ក្នុងដំណើរបំពេញទស្សនកិច្ច នៅប្រទេសអូស្ត្រាលី លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញចូលរួមហូបបាយសាមគ្គីជាមួយបង្អូនប្រជាពលរដ្ឋខ្មែរដែលកំពុងរស់នៅទីក្រុងស៊ីដនី ប្រទេសអូស្ត្រាលី និងបានការអញ្ជើញចូលរួមពីសំណាក់ ឯកឧត្តម កុយ គួង ឯកអគ្គរាជទូត នៃព្រះរាជាណាចក្រកម្ពុជា ប្រចាំនៅប្រទេសអូស្ត្រាលី និង ណូវែលហ្សេឡង់ ព្រមទាំងសមាជិក សមាជិការសមាគមយុវជនកម្ពុជាប្រចាំនៅទីក្រុងស៊ីដនីផងដែរ។
នាឱកាសនោះផងដែរលោកជំទាវក៏បានថ្លែងអំណរគុណដ៏ជ្រាលជ្រៅចំពោះសមាគមន៍ខ្មែរប្រចាំនៅប្រទេស អូស្ត្រាលី ដែលបានជំនួយឧបត្តម្ភដល់ការព្យាបាលជម្ងឺភ្នែក និងការផ្តល់អង្ករជូនដល់ប្រជាពលរដ្ឋខ្មែរនៅតាមជនបទប្រមាណជាង ៧ម៉ឺនគ្រួសារ។ លោកជំទាវក៏បានជម្រាបជូនបង្អូនខ្មែរទាំងអស់ដែលបានចូលរួមក្នុងពិធី នោះថា កម្ពុជាបច្ចុប្បន្ន ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានការរីកចម្រើនយ៉ាងខ្លាំងលើហេដ្ឋារចនាសម្ព័ន្ធ ដូចជា ផ្លូវ ថ្នល់ ស្ពាន សាលារៀន មន្ទីរពេទ្យ វត្តអារាម្យ មណ្ឌលសុខភាព ដោយរក្សាបានកំណើនសេដ្ឋកិច្ចក្នុងរវង់ប្រមាណ ៧% ក៏ដូចជា គិតគូរក្នុងការតម្លើងប្រាក់បៀវត្សមន្ត្រីរាជការជាដើម ។ល។ និងបានសំណូមពរកុំឲ្យបងប្អូនជឿតាមការញ៉ោះញ៉ុងរបស់ជនមួយក្តាប់តូច ដែលតែងតែរារាំងដល់រាជរដ្ឋាភិបាលកម្ពុជា ក្នុងការអភិវឌ្ឍន៍ប្រទេសម្តងហើយម្តងទៀត។
